લક્ષ્મીતન્ત્રમ્ · અધ્યાય 47

સપ્તચત્વારિંશોઽધ્યાયઃ - 47
શ્રીઃ---
વ્યૂહાનાં પ્રથમા લક્ષ્મી ર્મત્સંજ્ઞૈવોદિતા હિ યા।
તસ્યાઃ સિદ્ધિરિયં પ્રોક્તા દ્વિતીયાયા નિશામય

ન્યાસોપાયં પદ્મયાગં સર્વં વિદ્ધિ પુરોદિતમ્।
પૂર્વોક્તં મણ્ડલં કૃત્વા સિતપીતં તદન્તરે

કિંતુ વૈ પઙ્કજં કુર્યાદ્વિન્યસેત્તદનન્તરમ્।
વિભોરુત્સઙ્ગગાં કીર્તિં હૃદાદીનિ યથા પુરા

ક્રમાદ્ધ્યાનં સખીનાં ચ યથા તદવધારય।
દ્વિભુજા હેમવર્ણા ચ કીર્તિરૂપા સ્મિતાનના

સુપુસ્તકં કરે વામે દક્ષિણે ચામરં કરે।
ધ્યાયેત્ કિંશુકવર્ણાભં કાન્તરૂપં મનોરમમ્

તત્રાનુગચતુષ્કં તુ ચતુર્હસ્તં સિતામ્બરમ્।
વામદક્ષિણહસ્તાભ્યાં મુખ્યાભ્યાં તેષુ ચિન્તયેત્

શઙ્ખમિન્દુશતાભં ચ કદમ્બાખ્યં મહાદ્રુમમ્।
સપુષ્પં ષટ્‌પદોપેતમપરાભ્યાં નિબોધ મે

પૂર્ણચન્દ્રોપમં વામે દર્પણં દક્ષિણે કરે।
મયૂરવ્યજનં શુભ્રં ધ્યાત્વૈવં દર્શયેત્તતઃ

મુદ્રાઃ સર્વાઃ પ્રતિસ્વં યાઃ સાધકઃ પૂજયેત્તતઃ।
અર્ઘ્યપુષ્પાદિના સમ્યગ્જપ્ત્વા શક્ત્યાથ હોમયતે

તિલાનિ ચાજ્યસિક્તાનિ ગન્ધશાલ્યન્વિતાનિ ચ।
દેવીરૂપં તુ હોમાન્તે કૃત્વા પુષ્પાઞ્જનામ્બરૈઃ

એકાન્તે વિજને સ્થિત્વા મૌની મૂલફલાશનઃ।
જપેલ્લક્ષત્રયં મન્ત્રં જપાન્તે હોમમાચરેત્

લક્ષૈકસંખ્યં દેવેન્દ્ર તણ્ડુલૈસ્તિલમિશ્રિતૈઃ।
કાપિલેન ઘૃતેનૈવ તાદૃક્ક્ષીરયુતેન ચ

એકૈકં ચ હૃદાદીનાં સહસ્રં ચાથ હોમયેત્।
દદ્યાત્પૂર્ણાહુતિં પશ્ચાત્ ક્ષીરેણાજ્યાન્વિતેન ચ

પતિતાયાં તુ પૂર્ણાયામાયાતિ પરમેશ્વરી।
સાધુ સાધ્વિતિ વૈ બ્રૂતે સ્થિત્વાગ્રે સાધકસ્ય તુ

એહ્યેહિ પરમં ધામ ત્યજેદં ભૌતિકં પુરમ્।
ઉપભુઙ્ક્ષ્વામરાન્ ભોગાન્ મર્ત્યમધ્યગતોઽપિ ચ

મદીયેનાખિલં કર્મ મન્ત્રેણ કુરુ સાધક।
એવમુક્ત્વા તુ સા દેવી ગગનં ચ વ્રજેત્તતઃ

સાધકઃ કીર્તિમન્ત્રેણ કુર્યાત્ કર્મ યથેપ્સિતમ્।
દદાતિ યસ્ય યત્કિંચિત્તત્તસ્યાપ્યક્ષયં ભવેત્

તેનાસૌ લભતે કીર્તિં યાવચ્ચન્દ્રાર્કતારકમ્।
પ્રચણ્ડાનાં મનુષ્યાણાં મધ્યસ્થો યદિ બુધ્યતે

વક્તિ સંસદિ વા કિંચિત્ પ્રાપ્નુયાદ્વિપુલં યશઃ।
અભિભૂય જનાન્ સર્વાનુત્કૃષ્ટત્વં પ્રપદ્યતે

જપ્ત્વા સિદ્ધાન્નભાણ્ડં તુ સ્વલ્પકાલેઽન્નસંકટે।
યદેચ્છતિ જનાનાં તુ યથેચ્છમશનં ભવેત્

દદાતિ ચાક્ષયં તસ્ય સપ્તાહમનિશં યદિ।
પ્રાપ્નુયાન્મહતીં કીર્તિં યાવદાભૂતસંપ્લવમ્

સુભિક્ષે લવમાત્રં તુ આદાય કનકસ્ય ચ।
પરિજપ્ય સહસ્રં તુ વિધિના પરિતઃ સ્થિતમ્

પ્રયાતિ તત્ પ્રભૂતત્વં દીયતેઽર્થિજનસ્ય ચ।
અવ્યુચ્છિન્નં દ્વિસપ્તાહં સંશયં નાધિગચ્છતિ

તેનાસૌ મહતીં કીર્તિં પ્રાપ્નુયાલ્લોકસત્કૃતામ્।
આદાય તોયકલશં નાગેન્દ્રભવનહ્રદાત્

પ્રયાયાન્મરૂભૂમિં વૈ તત્ર નિમ્ને તુ ભૂતલે।
નિક્ષિપેત્ પર્વતાગ્રે વા સહસ્રપરિમન્ત્રિતમ્

સ પન્નગેશ્વરસ્તત્ર પરિવારસમન્વિતઃ।
રક્ષન્નુદકમાતિષ્ઠેદ્યાવત્તિષ્ઠતિ મેદિની

તેનાસૌ મહતીં લોકે કીર્તિમાપ્નોતિ વાસવ।
કાલે તુ બીજરોહી ચ યદિ દેવો ન વર્ષતિ

આદાય મૃત્કણં હસ્તે તટાકજલમર્દિતમ્।
તન્મધ્યસ્થં ચ વા ક્લિન્નં પરિજપ્ય શતત્રયમ્

મુખવાતૈસ્તુ સંતપ્તં કૃત્વા કીર્તિમનું સ્મરેત્।
પ્રક્ષિપેદ્ગગને તદ્વૈ મઘત્વં પ્રતિપદ્યતે

પૂરયેન્મેદિનીં સર્વાં જલેન જલદસ્તુ સઃ।
તદાજ્ઞયા વસેત્તાવત્તસ્મિન્ દેશે સ મેઘરાટ્

વર્ષંસ્તદુપયોગ્યં ચ યાવત્ સંપદ્યતે જલમ્।
તેનાસૌ મહતીં કીર્તિં પ્રાપ્નુયાચ્ચ ત્રિલોકગામ્

સંપાદયતિ તત્તસ્ય યસ્ય યન્મનસેપ્સિતમ્।
પ્રભાવં મન્ત્રરાજસ્ય કીર્ત્યાખ્યસ્ય સુરોત્તમ

લિખિતં પૂર્વવદ્બદ્ધ્વા હસ્તે વા દક્ષિણે કરે।
પ્રાપ્નુયાન્મહતીં કીર્તિં પૂજામૃદ્ધિં સરસ્વતીમ્

એતત્ સંક્ષેપતઃ પ્રોક્તં કીર્તેર્મન્ત્રસ્ય વાસવ।
દ્વિતીયાયા વિધાનં મે તન્વાસ્તનુભૃતાં વર

એતદ્વિધાનમાતિષ્ઠન્ કીર્તિમન્ત્રસ્ય શોભનમ્।
પ્રાપ્નુયાદ્વિમલાં કીર્તિં સંતતેરપિ ભૂતિદામ્

ઇતિ શ્રીપાઞ્ચરાત્રસારે લક્ષ્મીતન્ત્રે કીર્તિમન્ત્રસિદ્ધિપ્રકાશો નામ સપ્તચત્વારિંશોઽધ્યાયઃ
********ઇતિ સપ્તચત્વારિંશોઽધ્યાયઃ********