લક્ષ્મીતન્ત્રમ્ · અધ્યાય 25

પઞ્ચવિંશોઽધ્યાયઃ - 25
શ્રીઃ---
ઇત્થં તે કથિતઃ શક્ર તારકસ્યૈષ વિસ્તરઃ।
સંસારતારિકાયા મે તારિકાયાઃ શૃણુ ક્રમમ્

વર્ણાનાં વિધિસિદ્ધ્યર્થં સંજ્ઞાઃ પૂર્વં નિશામય।
શ્રુતાસુ વિધિવદ્યાસુ વિધિર્માન્ત્રઃ પ્રવર્તતે

અકારશ્ચાપ્રમેયશ્ચ પ્રથમો વ્યાપકઃ સ્મૃતઃ।
આદિદેવસ્તથાકાર આનન્દો ગોપનઃ સ્મૃતઃ

રામસંજ્ઞ ઇકારશ્ચ ઇદ્ધ ઇષ્ટઃ પ્રકીર્તિતઃ।
ઈકારઃ પઞ્ચબિન્દુર્વૈ વિષ્ણુર્માયા પુરંદર

ઉકારો ભુવનાખ્યશ્ચ ઉદ્દામ ઉદયસ્તથા।
ઊકાર ઊર્જો લોકેશઃ પ્રજ્ઞાધારાખ્ય એવ ચ

સત્યશ્ચ ઋતધામા ચ ઋકારઃ સ તુ ચાઙ્કુશઃ।
ૠકારો વિષ્ટરાખ્યશ્ચ જ્વાલા ચૈવ પ્રસારણમ્

લિઙ્ગાત્મા ભગવાન્ પ્રોક્તો લૃકારસ્તારકઃ સ્મૃતઃ।
લૃકારો દીર્ઘઘોણશ્ચ દેવદત્તસ્તથા વિરાટ્

ત્ર્યશ્ર એકારસંજ્ઞશ્ચ જગદ્યોનિરવિગ્રહઃ।
ઐશ્વર્યં યોગધાતા ચ ઐ સ ઐરાવણઃ સ્મૃતઃ

ઓકાર ઓતદેહશ્ચ ઓદનશ્ચૈવ વિક્રમી।
ઔર્વોઽથ ભૂધરાખ્યશ્ચ ઔ સ્મૃતો હ્યૌષધાત્મકઃ

ત્રૈલોક્યૈશ્વર્યદો વ્યાપી વ્યોમેશોંઽકાર એવ ચ।
વિસર્ગઃ સૃષ્ટિકૃત્ખ્યાતો હ્યઃકારઃ પરમેશ્વરઃ

કમલશ્ચ કરાલશ્ચ કકારઃ પ્રકૃતિઃ પરા।
ખકારઃ ખર્વદેહશ્ચ વેદાત્મા વિશ્વભાવનઃ

ગદધ્વંસી ગકારસ્તુ ગોવિન્દશ્ચ ગદાધરઃ।
ઘકારસ્ત્વથ ઘર્માંશુસ્તેજસ્વી દીપ્તિમાંસ્તથા

ઙકાર એકદંષ્ટ્રાખ્યો ભૂતાત્મા ભૂતભાવનઃ।
ચકારશ્ચઞ્ચલશ્ચક્રી ચન્દ્રાંશુઃ સ તુ કથ્યતે

છન્દઃપતિશ્છલધ્વંસી છકારશ્છન્દ એવ ચ।
જન્મહન્તાજિતશ્ચૈવ જકારશ્ચૈવ શાશ્વતઃ

ઝકારો ઝષસંજ્ઞશ્ચ સામગઃ સામપાઠકઃ।
ઈશ્વરશ્ચોત્તમાખ્યશ્ચ ઞકારસ્તત્ત્વધારકઃ

ચન્દ્રી ટકાર આહ્લાદો વિશ્વાપ્યાયકરસ્તથા।
ધારાધરષ્ઠકારશ્ચ નેમિઃ કૌસ્તુભ ઉચ્યતે

દણ્ડધારો ડકારશ્ચ મૌસલોઽખણ્ડવિક્રમઃ।
ઢકારો વિશ્વરૂપશ્ચ વૃષકર્મા પ્રતર્દનઃ

ણકારોઽભયદઃ શાસ્તા વૈકુણ્ઠ ઇતિ કીર્તિતઃ।
તકારસ્તાલલક્ષ્મા ચ વૈરાજઃ સ્રઘ્ધરઃ સ્મૃતઃ

ધન્વી ભુવનપાલશ્ચ થકારઃ સર્વરોધકઃ।
દત્તાવકાશો દમનો દકારઃ શાન્તિદઃ સ્મૃતઃ

ધકારઃ શાર્ઙ્ગધૃદ્ધર્તા માધવશ્ચ પ્રકીર્તિતઃ।
નરો નારાયણઃ પન્થા નકારઃ સમુદાહૃતઃ

પકારઃ પદ્મનાભશ્ચ પવિત્રઃ પશ્ચિમાનનઃ।
ફકારઃ ફુલ્લનયનો લાઙ્ગલી શ્વેતસંજ્ઞિતઃ

બકારો વામનો હ્રસ્વઃ પૂર્ણાઙ્ગઃ સ ચ કથ્યતે।
ભલ્લાતકો ભકારશ્ચ જ્ઞેયઃ સિદ્ધિપ્રદો ધ્રુવઃ

મકારો મર્દનઃ કાલઃ પ્રધાનઃ પરિપઠ્યતે।
ચતુર્ગતિર્યકારશ્ચ સુસૂક્ષ્મઃ શઙ્ખ ઉચ્યતે

અશેષભુવનાધારો રોઽનલઃ કાલપાવકઃ।
લકારો વિબુધાખ્યશ્ચ ધરેશઃ પુરુષેશ્વરઃ

વરાહશ્ચામૃતાધારો વકારો વરુણઃ સ્મૃતઃ।
શકારઃ શંકરઃ શાન્તઃ પુણ્ડરીકઃ પ્રકીર્તિતઃ

નૃસિંહશ્ચાગ્નિરૂપશ્ચ ષકારો ભાસ્કરસ્તથા।
સકારસ્ત્વમૃતસ્તૃપ્તિઃ સોમશ્ચ પરિકીર્તિતઃ

સૂર્યો હકારઃ પ્રાણસ્તુ પરમાત્મા પ્રકીર્તિતઃ।
અનન્તેશઃ ક્ષકારસ્તુ વર્ગાન્તો ગરુડસ્તથા

અશેષસંજ્ઞા વર્ણાનામિત્યેતાઃ કીર્તિતા મયા।
અનુલોમવિલોમેન વર્ણ્યા વર્ણસ્ય વૈ પુનઃ

28. સંજ્ઞાયામનુલોમેન સંખ્યાયાં વિલોમેન ચેત્યર્થઃ। "અઙ્કાનાં વામતો ગતિઃ" ઇતિ પ્રસિદ્ધમ્।
સંજ્ઞા સંખ્યા ચ યા શક્ર સામાન્યા સા મહામતે।
ચિદંશાઃ સર્વ એવૈતે વર્ણા ભાસ્વરવિગ્રહાઃ

કારણં સર્વમન્ત્રાણાં લક્ષ્મીશક્ત્યુપબૃંહિતાઃ।
સ્તુતા સંપૂજિતા ધ્યાતા વર્ણાઃ સંજ્ઞાભિરાદરાત્

પ્રયચ્છન્તિ પરામૃદ્ધિં વિજ્ઞાનં ભાવયન્ત્યપિ।
પરસ્પરાઙ્ગભાવં ચ મન્ત્રોત્પત્તૌ વ્રજન્ત્યમી

ચરાચરેઽસ્મિંસ્તન્નાસ્તિ યદમીભિર્ન ભાવિતમ્।
નિત્યા યદ્યપિ તા દિવ્યા મન્ત્રાણાં મૂર્તયઃ પરાઃ

તથાપ્યેવંવિધૈર્વર્ણૈર્ભાવિતા ઇતિ ચિન્તના।
ભવન્તિ પૂર્ણસામર્થ્યા મન્ત્રાઃ શાસ્રનિદર્શનાત્

આલમ્બનં ધિયાં ચૈવ ભવન્ત્યેવં મહામતે।
અભાગેઽપિ યથા વ્યોમ્નિ ધિયા ભાગઃ પ્રકલ્પ્યતે

સૌકર્યાય તથા મન્ત્રે વર્ણભાગોઽનુચિન્ત્યતે।
કૃત્વૈવ ભાવગાં વ્યાપ્તિં વર્ણાનાં પૂજનં ત્રિધા

ભૂમૌ પદ્મે તથા દેવ્યાસ્તનૌ મન્ત્રાન્ સમુદ્ધરેત્।
પરમાત્માનમાદાય યોજયેત્ કાલવહ્નિના

36. તારિકામન્ત્રમુદ્ધરતિ---પરમાત્માનમિતિ। પરમાત્મા હકારઃ। કાલવહ્નિઃ રેફઃ। માયા ઈકારઃ। ત્રૈલોક્યૈશ્વર્યદઃ અનુસ્વારઃ। એષાં યોગે હ્રીં ઇતિ તારિકામન્ત્રઃ।
ત્રૈલોક્યૈશ્વર્યદોપેતમાયામસ્મિન્નિયોજયેત્।
ઇયં સા પરમા શક્તિર્વૈષ્ણવી સર્વકામદા

સત્તા પૂર્ણા ચિદાનન્દા મમ મૂર્તિર્નિરન્તરા।
ઇયં સા પરમા નિષ્ઠા યા સા બ્રહ્મવિદાં ધ્રુવા

અસ્યાં નિષ્ઠાય તત્ત્વજ્ઞા વિશન્તિ બ્રહ્મ મન્મયમ્।
સૈષા તત્ત્વવિદાં મુખ્યૈઃ શાસ્રે શાસ્રે વિચિન્ત્યતે

ઓતં પ્રોતમમુષ્યાં વૈ જગચ્છબ્દાર્થતામયમ્।
અનયૈવ સદા સાંખ્યૈઃ સંખ્યાયેઽહં સનાતની

અનયૈવ સમાધિસ્થૈઃ સમાધીયે સમાધિના।
અભિધીયેઽનયૈવાહં શૈવૈઃ ષટ્‌ત્રિંશદન્તિમા

મહારાજ્ઞી તથૈવાહમનયૈવ ત્રયી પરા।
ઋગ્યજુઃસામસંઘાતે ચિન્ત્યે સૌરે ચ મણ્ડલે

તરુણીં રૂપસંપન્નાં સર્વાવયવસુન્દરીમ્।
અનયૈવ વ્યવસ્યન્તિ લોકાયતવિચક્ષણાઃ

ક્ષણભઙ્ગવિધાનજ્ઞૈશ્ચિન્ત્યે નિર્વિષયા ચ ધીઃ।
આર્હતૈશ્ચાનયૈવાહં યક્ષીનામ્ના સદોદિતા

પરમા તારિકા શક્તિસ્તારિણી તારિકાકૃતિઃ।
લક્ષ્મીઃ પદ્મા મહાલક્ષ્મીસ્તારા ગૌરી નિરઞ્જના

હૃલ્લેખા પરમાત્મસ્થા યા શક્તિર્ભુવનેશ્વરી।
ચિચ્છક્તિઃ શાન્તિરૂપા ચ ઘોષણી ઘોષસંભવા

કામધેનુર્મહાધેનુર્જગદ્યોનિર્વિભાવરી।
એવમાદીનિ નામાનિ શાસ્રે શાસ્રે વિચક્ષણૈઃ

તારિકાયા નિરુક્તાનિ વેદે વેદે ચ પણ્ડિતૈઃ।
અસ્યા એવાપરા મૂર્તિર્વિજ્ઞેયા ત્વનુતારિકા

શાન્તં નિયોજયેત્ સ્થાને પૂર્વસ્ય પરમાત્મનઃ।
શેષમન્યત્સમં હ્યેષા તનુર્મેઽન્યાનુતારિકા

49. શાન્તઃ શકારઃ। અન્યત્ સમમિતિ। તારિકયા સમમ્। રીં ઇતિ યોજનીયમિત્યર્થઃ। શ્રીં ઇત્યનુતારિકામન્ત્રઃ।
તારિકાયામિવાસ્યાં ચ વિજ્ઞેયં વૈભવં મહત્।
ઇમે શક્તી પરે દિવ્યે મમ તન્વૌ પુરંદર

યત્કિંચિદેતયા સાધ્યં સાધનીયં તદન્યયા।
ઇમે પૂર્વાપરીભાવં પ્રજતોઽન્યોન્યવાઞ્છયા॥
સમ્યક્સાધયતશ્ચૈવ સાધકાનામભીપ્સિતમ્

ઇતિ શ્રીપાઞ્ચરાત્રસારે લક્ષ્મીતન્ત્રે તારાનુતારાપ્રકાશો નામ પઞ્ચવિંશોઽધ્યાયઃ
********ઇતિ પઞ્ચવિંશોઽધ્યાયઃ********