કુટ્ટનીમત · શ્લોક 981-1000

શ્રુતિકુવલયમીક્ષણતાં કુવલયતાં વા વિલોચનં યાયાત્ ।
હરિણદૃશો યદિ ન સ્યાત્કનકોજ્જ્વલકેસરં મધ્યે

લલનાસ્તદતુલ્યતયા પુરુષા અપિ તદુપભોગવિરહેણ ।
ગચ્છન્તિ શોષમનિશં પ્રકૃતિદ્વયવર્જિતાઃ સ્વસ્થાઃ

દુર્વૃત્તયોર્ન વૃત્તં શ્લાઘાસ્પદમેતિ તત્પયોધરયોઃ ।
યૌ દત્ત્વામલમૂર્તિં મધ્યે હારં જનક્ષયં કુરુતઃ

ભૂમણ્ડલે ઽત્ર સકલે નાતઃ પરમપરમદ્ભુતં કિં ચિત્ ।
નો જાતા યદપાર્થા કૃશોદરી ધાર્તરાષ્ટ્રયાતાપિ

કૃશ એષ મધ્યદેશસ્તન્વ્યા નાહાર્યમણ્ડનં વોઢુમ્ ।
શક્ત ઇતિ કૃતં વિધિના રોમાવલિભૂષણં સહજમ્

સાકમ્પો ઽધર ઈક્ષણયુગલસ્યાધીરતા ભ્રુવોર્ભઙ્ગઃ ।
તન્વઙ્ગ્યા બલમીદૃગ્જયતિ જગત્તદપિ નિઃશેષમ્

વહતુ નિતમ્બઃ સ્થૂલો રશનાં હારં ચ કુચયુગં પીનમ્ ।
તદ્બાહુમૃણાલિકયોઃ સાપાયં કટકયોજનમયુક્તમ્

બહલોપાયાભિજ્ઞા ગુણવિષયે સતતમાહિતપ્રીતિઃ ।
બલિનઃ સ્થાપયતિ વશે કરભોરુર્વિગ્રહેણ મૃદુનૈવ

ઇતિ તત્સ્તુતિમુખરમુખે રાજસુતે મકરકેતનાકુલિતે ।
સમુપાગતા પ્રગલ્ભા મઞ્જરિકાચોદિતા દૂતી

સા સપ્રણતિઃ પુરતઃ સુમનસ્તામ્બૂલપટલકં નિદધે ।
વ્યજ્ઞાપયચ્ચ તદનુ સ્વાવસરે સહચરીકાર્યમ્

મુરરિપુનાભિસરોરુહમવતંસીકર્તુમીહતે મૂઢા ।
નક્ષત્રરાજમણ્ડલમિચ્છતિ વિયતઃ સમાદાતુમ્

નિશ્ચેતનાભિકાઙ્ક્ષતિ પીયૂષં ત્રિદિવસદ્મનામશનમ્ ।
અભિલષતિ શયનમુષ્ણે નવચન્દનપલ્લવાસ્તરણે

વિદધાતિ પારિજાતકસુમનોનિર્યૂહધારણશ્રદ્ધામ્ ।
દુર્વ્યવસિતા જિઘૃક્ષતિ નારાયણવક્ષસો રત્નમ્

અનિયતપુરુષસ્પૃશ્યાઃ પાપા વયમન્યથા ક્વ હીનકુલાઃ ।
ક્વ ચ યૂયમિન્દ્રકલ્પા અનલ્પમનસો ગુણાભરણાઃ

દુષ્પ્રકૃતેઃ પ્રકૃતિરિયં તસ્ય તુ દગ્ધાત્મજન્મનઃ કાપિ ।
અગણિતયુક્તાયુક્તો લગયતિ ચેતો યદસ્થાને

યા હસતિ સરોજવતીં રસાન્વિતા સહજરાગરક્તેતિ ।
ધ્યાનધિય આત્મવૃત્તિં નિન્દત્યેકત્ર પુરુષ આસક્તામ્

સ્નિગ્ધેતિ નાભિનન્દતિ જન્મશતેનાપિ સર્પિષો ધારામ્ ।
પઞ્ચાક્ષદ્યૂતગતિં નાનર્થકરમણસંગતાં સ્તૌતિ

ન સ્તૌતિ ચન્દનલતાં ભુજઙ્ગપરિવેષ્ટિતાં રસાર્દ્રેતિ ।
ન શૃણોતિ કીર્ત્યમાનાં સ્વપ્નેષ્વપિ મદનમૂર્છિતાં મત્સીમ્

વિદ્વેષ્ટિ કરણમધ્યે રસનાં તામ્બૂલરાગયુક્તેતિ ।
શંસતિ મતિં મુમુક્ષોરવિશિષ્ટાં શશવૃષાશ્વપુરુષેષુ

નો બહુ મનુતે રમ્ભાં નલકૂબરમભિસૃતેતિ કામાર્તા ।
ગર્હતિ ચ દેવગણિકામનુરક્તામુર્વશીં પુરૂરવસિ