કુટ્ટનીમત · શ્લોક 961-980

ગત્વાથ સ્વાવસથં નિર્વર્તિતભોજનાદિકર્તવ્યઃ ।
મઞ્જરિકાકૃષ્ટમના અભિદધ્યૌ સચિવસંનિધાવેવમ્

ભ્રૂભઙ્ગસ્મિતવીક્ષિતમૃદુવક્રવચોઙ્ગહારગમનેષુ ।
કુસુમપ્રહરણ એકો યુગપદ્વિહિતાશ્રયઃ કથં તસ્યાઃ

સુન્દોપસુન્દનાશઃ ફલમાત્મભુવસ્તિલોત્તમાસૃષ્ટેઃ ।
જનમૃતયે તાં સૃજતા કિં દૃષ્ટં સુરહિતં તેન

સુમનોભિઃ પરિકરિતા મૃગશાવકતરલચક્ષુષસ્તસ્યાઃ ।
કામોચિતફલહેતુર્દેહભૃતાં દીર્ઘિકા વેણી

કમલમિવ વદનકમલં પિબન્તિ તસ્યાસ્ત્રિપિષ્ટપભ્રષ્ટાઃ ।
સદલિકમપેતદોષં સવિભ્રમં મધુમદાતામ્રમ્

યઃ શૈલેન્દ્રનિતમ્બં સુરતાપ્ત્યૈ સેવતે તપોનિરતઃ ।
સ્પૃહયતિ સો ઽપિ નિતમ્બં સુરતાપ્ત્યૈ સમવલોક્ય તન્વઙ્ગ્યાઃ

ત્રિકરો મધ્યવિભાગો બાહ્વોર્યુગલં કરદ્વયોપેતમ્ ।
જનયતિ તદપિ મૃગાક્ષી સહસ્રકરતો ઽધિકં તાપમ્

સા સ્રગ્ધરા સુવદના પ્રહર્ષિણી સૈવ સૈવ તનુમધ્યા ।
ન કરોતિ કસ્ય વિસ્મયમિતિ રુચિરા મઞ્જુભાષિણી સૈવ

અનુકુર્વત્યા કન્યાં તથા તથા નાયકસ્તયા દૃષ્ટઃ ।
યેન જરત્સ્વપ્યટની ધનુષઃ સ્પૃષ્ટા દશાર્ધબાણેન

રૂપં યૌવનચિત્રિતમનઙ્ગવિકૃતાનિ નાટ્યદીપ્તાનિ ।
શમિનામપિ શમગર્વં મુષ્ણન્ત્યવિકલ્પિતં તસ્યાઃ

દગ્ધે ઽપિ વપુષિ ભીતિં ન વિમુઞ્ચતિ નીલલોહિતસમુત્થામ્ ।
તત્ક્ષેત્રે વસતિ યતઃ પ્રમદારૂપેણ શમ્બરધ્વંસી

યદિ વઃ પરલોકમતિઃ શૃણુત શ્રેયસ્તપોધના મત્તઃ ।
ઉત્સૃજ્ય યાત તૂર્ણં વારવધૂદૂષિતં સ્થાનમ્

ચિરમપિ વિકલ્પ્ય નિશ્ચિતિરિયમેવ સ્થાપ્યતે ન ગતિરન્યા ।
તન્નિર્માણે જાતા લાવણ્યમયાઃ કણા વિધેરણવઃ

આસાદ્ય સમુચ્છ્રાયં તસ્યાઃ સ્તનયુગલમવિહતપ્રસરમ્ ।
ક્ષપયતિ યજ્જનમેવં કઃ સ્પ્રક્ષ્યતિ તદ્વિવેકવાન્ પતિતમ્

સ કથં ન સ્પૃહણીયો વિષયરતૈસ્તન્નિતમ્બવિન્યાસઃ ।
શાન્તાત્મનાપિ વિહિતં વિશ્વસૃજા ગૌરવં યસ્ય

સ્મરણાદ્યસ્યોત્પત્તિઃ સુમનસ ઇષવો ઽબલાશ્રયા શક્તિઃ ।
સો ઽપિ વ્યઙ્ગઃ પ્રહરતિ ધાતુરહો ચિત્રમાચરિતમ્

તિષ્ઠન્ત્વન્યે દૃષ્ટ્વા સારં જગતાં તદઙ્ગનારત્નમ્ ।
નષ્ટપઠનાવધાનો ભવતિ બ્રહ્મા સનિર્વેદઃ

યદિ પશ્યતિ તાં શર્વસ્તદપરરામાસમાગમાદ્વિમુખઃ ।
નિન્દતિ મૂર્ધનિ સોમં સ્મરાગ્નિસંધુક્ષણં શરીરં ચ

કેશવ ઇહ સંનિહિતઃ સાપિ મનોહારિરૂપસમ્પન્ના ।
તદ્વક્ષશ્ચ્યવનભુવં કથમુજ્ઝતિ સૈન્ધવીશઙ્કામ્

ઉદયતિ ન પણ્ડિતાનાં કથમાત્મનિ કૌતુકં ગજેન્દ્રગતિઃ ।
યન્નવવયસાં પુંસાં વિના ક્રિયાયોગમુપસર્ગઃ