કુટ્ટનીમત · શ્લોક 941-960

સુકુમારાવિદ્ધક્રિય ઉપરઞ્જકરઞ્જિતો વિવિધવૃત્તિઃ ।
આદેયહેયમધ્યૈર્ભાવૈઃ સંપાદિતઃ પ્રયોગો ઽયમ્

ગમ્ભીરમધુરશબ્દં પરિરક્ષિતગીતવિવિધભઙ્ગયુતમ્ ।
દર્શયતો વૈચિત્ર્યં ન ભ્રષ્ટો વાદકસ્ય લયકાલઃ

અપરિત્યક્તસ્થાનકરસકાકુવ્યઞ્જિતસ્ફુટાર્થપદમ્ ।
અભિરામાવિશ્રાન્તં પઠિતં નિરવદ્યમખિલભાષાસુ

નિયમિતદીપનગમનં દ્રુતમધ્યવિલમ્બિતાલસંયુક્તમ્ ।
રસવત્સ્વરોપપન્નં કૃતસામ્યં સાધુ ગાતૃભિર્ગીતમ્

પ્રકૃતિવિશેષાવસ્થાપ્રતિપાદકવેષરચનસામગ્ર્યા ।
અનુકરણમભ્યતીતં સિદ્ધિદ્વયસમ્પદાધારમ્

ભરતસુતૈરુપદિષ્ટં ક્ષિતિપતિનઘુષાવરોધનારીણામ્ ।
મન્યે તા અપિ નાટ્યે શોભાસંદોહમીદૃશં નાપુઃ

સુશ્લિષ્ટસન્ધિબન્ધં સત્પાત્રસુવર્ણયોજિતં સુતરામ્ ।
નિપુણપરીક્ષકદૃષ્ટં રાજતિ રત્નાવલીરત્નમ્

એવંવિધગુણકથનપ્રસઙ્ગિનિ વિભાવિતાત્મનૃપતનયે ।
પઠતિ સ્માર્યામન્યઃ સ્મૃતિવિષયમુપાગતાં પ્રસઙ્ગેન

સંગ્રામાદનપસૃતિઃ પ્રેક્ષાભિજ્ઞા સુભાષિતાભિરતિઃ ।
આચ્છોદનાભિયોગઃ કુલવિદ્યા રાજપુત્રાણામ્

એતદ્વસ્તુનિ યાતે શ્રુતિમાર્ગં નૃપતિનન્દનો રસતઃ ।
આરબ્ધકથાચ્છેદકમાખેટકવર્ણનં ચક્રે

ચલલક્ષ્યવેધકૌશલમશ્વપ્રજવે સ્થિરાસનાભ્યસનમ્ ।
ભૂમિવિભાગજ્ઞાનં ભવન્તિ મૃગયાભિયોગેન

વહતિ જવેન તુરઙ્ગે નિબિડસ્થિતપાદકટકપાદાગ્રઃ ।
તિર્યક્પ્રણિહિતકાયો નિમ્નોન્નતમગ્રતો ભુવઃ પશ્યન્

યાવત્પ્રાણં ધાવત્યાકુલિતે વિશ્વકદ્રુભિર્ભીત્યા ।
ગોચરપતિતે જીવે લઘુક્રિયઃ ક્ષિપતિ માર્ગણં ધન્યઃ

મૂલે સ્થિતસ્ય નિભૃતં મૃગયુભિરુચ્ચાટ્ય ઢૌકિતં નિકટે ।
પાતયતો મૃગમુત્પ્લુતમવ્યપદેશ્યં સુખં કિમપિ

ગીતશ્રવણોત્કર્ણં નિશ્ચલતૃણકવલગર્ભમુખહરિણમ્ ।
ઉપવેશિતમસ્પન્દં સ્પૃહણીયા એવ ગૃહ્ણન્તિ

દાવાનલસંતાપાન્નિર્યાન્તં ગહનવીરુધો ઽભિમુખમ્ ।
યો નિરુણદ્ધિ સ વન્દ્યઃ સૂકરમેકપ્રહારેણ

ઘનકક્ષોદરસુપ્તં સમુપેત્ય સ્વૈરમકૃતપદશબ્દમ્ ।
વ્યાધવર એવ કુરુતે નિર્જીવં હેલયા શશકમ્

ઇતિ વિદધતિ સૈંહભટાવાખેટકશક્તિલાઘવશ્લાઘામ્ ।
હૃદયાગતામગાયત્પ્રસઙ્ગતો ગીતિકામપરઃ

આસ્તાં વ્યાપારરસઃ પ્રવર્તિતા સંકથાપિ મૃગયાયાં ।
અન્તરયતિ તન્મનસામાહારાદિક્રિયોચિતં કાલમ્

અવધાર્ય ગીતિકાર્થં દાનં પ્રતિ ધનનિયુક્તમભિધાય ।
ઉત્તસ્થૌ સમરભટઃ મઞ્જરિકાં સમવલોકયન્પ્રેમ્ણા