કુટ્ટનીમત · શ્લોક 901-920

ચૂતલતા ધમ્મિલ્લસ્થાનચ્યુતશેખરં દધૌ શ્લાઘ્યમ્ ।
અધૃત પતન્નિર્યૂહાં ન ત્વેષા મદનિકા વેણીમ્

સ્તનભારાવનતસ્ય પ્રતનોર્મધ્યસ્ય નાસ્તિ તે ઽપેક્ષા ।
ઇત્થમિવ પાદલગ્નૌ ક્રીડન્ત્યા નૂપુરૌ રસતઃ

વહતિ સ્મ યં નિતમ્બં કથમપિ કૃચ્છ્રેણ મન્દસંચારા ।
કલયતિ તં તૂલલઘું જયતિ મનોજન્મનો મહિમા

ઉદયનસમનુજ્ઞાતો નર્નર્તિ વસન્તકો ઽપિ મુદિતાત્મા ।
હાસ્યત્રપાભિરામં ચર્ચરિતાલેન તન્મધ્યે

ધીરોદ્ધતલલિતપદૈઃ ક્રીડિત્વા તે ચિરાય નરનાથમ્ ।
પ્રદ્યોતસ્ય સુતાયાઃ સંદેશકમૂચતુઃ સમુપગમ્ય

આદિશતિ દેવ દેવીત્યર્ધોક્તે તે સલજ્જમન્યોન્યમ્ ।
અવલોક્ય મુખં ન હિ ન હિ વિજ્ઞાપયતિ પ્રણમ્ય વિનયેન

મકરધ્વજસ્ય પૂજાં ત્વત્પાદસરોજસંનિધૌ કર્તુમ્ ।
પૃથિવીમણ્ડલમણ્ડન સમીહતે મે મનોવૃત્તિઃ

પ્રિયરતિભોગો મદનો દયિતવસન્તો જનસ્ય મનસિ વસન્ ।
ભાવેન ભવાન્ પૂજ્યો લોકસ્થિત્યા તુ કુસુમશરપાણિઃ

ઇતિ દત્ત્વા સંદેશં પ્રકૃતિવયઃકાલસમુચિતં ભ્રાન્ત્વા ।
તે મદમદનાવિષ્ટે બભૂવતુર્જવનિકાન્તરિતે

અપનીતતિરસ્કરિણી તતો ઽભવન્નૃપસુતા સમં ચેટ્યા ।
અવિદિતરત્નાવલ્યા પૂજોચિતવસ્તુહસ્તયાનુગતા

અથ દૃષ્ટ્વા સાગરિકાં પ્રમાદિતાં પરિજનસ્ય નિન્દિત્વા ।
કાઞ્ચનમાલામવદન્નૃપમહિષી જાતસંક્ષોભા

પ્રેષય કન્યામેનામવરોધં ત્વં ગૃહાણ કુસુમાદિ ।
યાવન્ન ભવતિ વિષયે વીક્ષણયોર્ભૂમિનાથસ્ય

ઉપગમ્ય તતશ્ચેટી તામવદત્ત્વં કિમર્થમાયાતા ।
મેધાવિનીં વિમુચ્ય વ્રજ તસ્મિન્મા વિલમ્બસ્વ

વિહિતે દેવ્યાદેશે મનસીદં સન્નિધાય સા તસ્થૌ ।
વિહગી સુસઙ્ગતાયા હસ્તે નિહિતા મનોભવસપર્યામ્

અવલોકયામિ તાવત્તિરોહિતા સિન્દુવારવિટપેન ।
તાતાન્તઃપુરિકાભિર્યથાર્ચ્યતે કિં તથેહ નો વેતિ

પિણ્ડીકૃતમિવ રાગં હૃચ્છયમિવ લબ્ધવિગ્રહોત્કર્ષમ્ ।
સમુપેત્ય વત્સરાજં જગાદ સા જયતુ દેવ ઇતિ

પરિભુક્તમપિ નવત્વં શૃઙ્ગારં મદનપર્વણા નીતમ્ ।
ભજમાનો ભજમાનાં સ્વાગતવચસાભિનન્દ્ય તામૂચે

શર્વવિલોચનપાવકદાહાભ્યધિકાં મનોભવો મન્યે ।
પ્રાપ્સ્યતિ તવ કરસઙ્ગતિસુખવિરહસમુત્થિતાં પીડામ્

અથ મન્મથમભ્યર્ચ્ય ક્ષિતિનાથં તદનુ સમધિકં તસ્યામ્ ।
પરમાં મુદં વહન્ત્યાં વિગ્રહવન્મદનમનસિ કન્યાયામ્

શૃઙ્ગારરસસમુદ્રં સોત્કલિકં નિપતિતે તથા નૃપતૌ ।
તારમધુરસ્ફુટાર્થં નગ્નાચાર્યઃ પપાઠ નેપથ્યે