કુટ્ટનીમત · શ્લોક 881-900

વાંશિકદત્તસ્થાનક ઉદ્ગ્રાહિતભિન્નપઞ્ચમે સમ્યક્ ।
પ્રાવેશિક્યા ધ્રુવયા દ્વિપદીગ્રહણાન્તરે ઽવિશત્સૂત્રી

ઉત્સાહભાવયુક્તઃ સામાજિકહૃદયરઞ્જનં કુર્વન્ ।
કવિનૈપુણવત્સેશ્વરચરિતસ્વવિધેયદાક્ષ્યસામગ્ર્યા

અષ્ટકલાપરિમાણાં ધ્રુવાં પરિક્રમ્ય તાલલયયુક્તામ્ ।
આહૂય નટીં કૃત્વા તયા સમં સ્વગૃહકાર્યસંલાપમ્

સૂચિતપાત્રાગમનઃ કિં ચિદ્દત્ત્વા પદાનિ લલિતાનિ ।
નિશ્ચક્રામ ગૃહિણ્યા સાર્ધં નિઃસરણગીતેન

આશ્રિત્ય કથોદ્ઘાતં પ્રવિવેશ તતઃ સવિસ્મયો ઽમાત્યઃ ।
દુર્ઘટસંઘટનેન ક્ષિતિનાથસ્યોદયેન મુદિતશ્ચ

પ્રાસાદમારુહન્તં કુસુમાયુધપર્વચર્ચરીં દ્રષ્ટુમ્ ।
નિર્દિશ્ય વત્સનાથં સમનન્તરકાર્યસિદ્ધયે નિરગાત્

અથ વિશતિ સ્મ નરેન્દ્રઃ પ્રાસાદગતઃ સમં વયસ્યેન ।
અવલોકયન્પ્રમોદં પ્રમુદિતચેતાઃ સ્વસૌખ્યસમ્પત્ત્યા

વિસ્મયભાવાકૃષ્ટઃ પ્રોત્ફુલ્લવિલોચને તતો વિસૃજન્ ।
નૃત્યતિ પૌરજનૌઘે પ્રોવાચ વયસ્ય પશ્ય પશ્યેતિ

તુલ્યશિશુતરુણવૃદ્ધં સમગુપ્તાગુપ્તયુવતિપરિચેષ્ટમ્ ।
અગણિતવાચ્યાવાચ્યં ક્રીડતિ જનતા પ્રવૃદ્ધહર્ષરસા

પિષ્ટાતકપિઞ્જરિતં રચિતોલ્બણવિવિધકુસુમનિર્યૂહમ્ ।
ગાત્રાયાસસમુત્થિતબહુનિઃશ્વાસપ્રકીર્ણપદગીતમ્

તૂર્યરવવ્યામિશ્રિતકરતાલૈરુદ્ભુજં પ્રનૃત્યન્તમ્ ।
મુહુરપિ જાતસ્ખલનં સંદર્શિતદાર્ઢ્યસૌષ્ઠવં સ્થવિરમ્

અસ્તુ વસન્તઃ સતતં સ્વાધીનાભીષ્ટજનસમાશ્લેષઃ ।
ઇતિ ગાયન્તી રભસાદાલિઙ્ગતિ મદવશાત્તરુણી

ક્રીડન્ત્યાશયરહિતં શૃઙ્ગકસલિલેન તાડિતસ્તરુણઃ ।
સીમન્તિન્યા ગણયતિ દુષ્ટાત્મા સુભગમાત્માનમ્

ભગ્ને લજ્જાસેતૌ પર્વાવસરેણ કુલવધૂવદનાત્ ।
અશ્લીલોક્તિજલૌઘે નિર્યાતે કેન વાર્યતે પ્રસરઃ

તુલ્યવ્યાપારગિરાં લલનાનાં દેવનપ્રસક્તાનામ્ ।
આર્યાનાર્યાવગમં વદનાવૃતિજાલિકા કુરુતે

અથ સહચરનિર્દિષ્ટે મદસ્ખલચ્ચરણવિઘટિતાભિનયમ્ ।
વાસવદત્તાપ્રહિતે નૃત્યન્ત્યૌ વિવિશતુશ્ચેટ્યૌ

દર્શિતસરોજવર્તનમાત્રાભિનયે શરે ઽભિનેતવ્યે ।
વિદધાને વીરદૃશાવાયુધમાત્રં સમાશ્રિત્ય

તદ્વલિતનયનવૃત્તિઃ કૌતુકહૃતમાનસો નરાધિપતિઃ ।
નિજગાદ નિર્ભરમહો ક્રીડિતમનયોર્વિલાસિન્યોઃ

કરપીડનોપમર્દવ્યતિકરસમયે કદર્થ્યમાનો ઽપિ ।
સ્તનમણ્ડલે સ્થિતો ઽહં ત્વં પુનરાકૃષ્ય કુત્ર ચિત્ક્ષિપ્તઃ

અધુનાન્તરયસિ મામિતિ કોપાદિવ વારવાણમભિરામમ્ ।
બહુચિત્રપદન્યાસૈર્વલ્ગન્ત્યા હન્તિ હાર ઉચ્છલિતઃ