કુટ્ટનીમત · શ્લોક 861-880

ત્રૈલોક્યગતા વેશ્યાઃ સ્વાધીના યાતુધાનનાથસ્ય ।
તદપિ જહાર કલત્રં દશરથતનયસ્ય રામસ્ય

અથ મઞ્જર્યા જનની નિજપક્ષસમર્થને કૃતોત્સાહા ।
આક્ષેપ્તુમાચચક્ષે નૃપસુતસચિવાશ્રિતં વાક્યમ્

ઘટયુવતિષુ પ્રગલ્ભો નાગરિકાદર્શનેન હૃતપુંસ્ત્વઃ ।
ગ્રામોષિતો ઽવિદગ્ધો નિન્દતિ ગણિકાં ભવદ્વિધો ઽવશ્યમ્

નાર્દ્રયતિ મનઃ પુંસામવગાહિતમીનકેતુશાસ્ત્રાણામ્ ।
નખદશનક્ષતિહીનં જીવત્પતિબન્ધકીસુરતમ્

સ્થાપય ઘટકં તાવત્કુરુ ભૂમિતલે તૃણૈઃ સમાસ્તરણમ્ ।
સુરતોપક્રમ ઈદૃક્પ્રાયો ગ્રામીણતરુણમિથુનાનામ્

બહલોશીરવિલિપ્તસ્થિતજૂટકકાણમલ્લિકામાલ્યઃ ।
પામરનાર્યા દૃષ્ટઃ સ્મરો ઽહમિતિ મન્યતે વિટો ગ્રામ્યઃ

ગૃહકર્મકૃતાયાસપ્રસ્વિન્નાં સલિલકાર્યનિર્યાતામ્ ।
ઉપપતિરુપૈતિ હર્ષં નિશાગમે પામરીં પ્રાપ્ય

કૂપાવતારિતઘટાયા નાર્યાઃ કાષ્ઠનિહિતચરણાયાઃ ।
વલિતગ્રીવં વીક્ષિતમુન્નમયતિ માનસં યૂનઃ

લગ્નો ઽસિ યત્ર ગાત્રે કથમપિ દૈવેન દેવયાત્રાયામ્ ।
અદ્યાપિ તન્ન મુઞ્ચતિ પુલકોદ્ગમકણ્ટકં તસ્યાઃ

ઉચ્ચેતું કર્પાસં પ્રવિષ્ટયા ગહનવાટિકાં શૂન્યામ્ ।
ખઙ્કારિતેન સંજ્ઞા કૃતા તયા ત્વં તુ વેત્સિ નો મૂર્ખઃ

આલિઙ્ગિતમુસલાયાસ્ત્વય્યેવ નિવિષ્ટચક્ષુષસ્તસ્યાઃ ।
આવૃત્ત્યા ભ્રમતિ પુરો જાતઃ ખલુ શાલિખણ્ડને વિઘ્નઃ

ત્વાં વિલ્વકં ક્ષિપન્તં પાર્શ્વસ્થૈઃ સ્તૂયમાનસામર્થ્યમ્ ।
ગૃહકર્તવ્યં ત્યક્ત્વા સાપશ્યદ્ દ્વારરન્ધ્રેણ

ત્વયિ માર્ગનિકટવર્તિન્યવિવેચિતખેદયા તયા સુભગ ।
પ્રત્યાસન્નગૃહેષ્વપિ કૃતઃ પ્રસહ્ય સ્મરાતુરો લોકઃ

ઇતિ ચતુરદૂતિકોદિતવર્ધિતસૌભાગ્યગર્વપૂર્ણસ્ય ।
ઊર્મિસહસ્રોલ્લલિતં ભવતિ મનો ગ્રામષિઙ્ગસ્ય

વિનિવાર્ય તં પ્રવર્તિતવાક્યવિકાસં નતોત્તમાઙ્ગેન ।
શ્રીસિંહભટસ્ય સુતં સમુવાચ વચો ઽથ નર્તકાચાર્યઃ

નાયકભૂમૌ ભરતઃ કુશીલવાઃ કોહલાદયો મુનયઃ ।
અપ્સરસઃ સ્ત્રીનાટ્યે ગાન્ધર્વઃ કમલજન્મનસ્તનયઃ

સુષિરસ્વરપ્રયોગપ્રતિપાદનપણ્ડિતઃ મતઙ્ગમુનિઃ ।
યદિ રઞ્જયન્તિ હૃદયં ભવતો ભૂમિસ્પૃશાં કુતઃ શક્તિઃ

અભ્યધિકં ધૃષ્ટત્વં પ્રાયેણ હિ શિલ્પજીવિનાં ભવતિ ।
આશ્રિતનર્તકવૃત્તેર્વિશેષતો વિજિતરઙ્ગસ્ય

વિજ્ઞાપયામ્યતસ્ત્વાં નિર્મિતનાટ્યે પ્રજાસૃજા સદૃશમ્ ।
અવલોકયાઙ્કમેકં મા ભવતુ મમ શ્રમો વન્ધ્યઃ

ઇતિ કથયન્નરભર્તુઃ પુત્રેણ સ ચોદિતો ભ્રુવોન્નતયા ।
રચિતે સકલાતોદ્યે નિયોજયામાસ સૂત્રધૃતમ્