કુટ્ટનીમત · શ્લોક 841-860

ભયશૃઙ્ગારવ્રીડામિશ્રીભૂતાનુભાવસન્દોહમ્ ।
જનયન્તી લોલાંશુકદૃષ્ટાદૃષ્ટાંસકુચનાભિઃ

નીવીશ્લથનારમ્ભં નિરુન્ધતી ન ન ન યામિ યામીતિ ।
નિભૃતાસ્ફુટાભિધાનૈઃ પલ્લવયન્તી સ્મરસ્ય કર્તવ્યમ્

નયતીવાન્તર્વિલયં ગ્રસમાના સર્વગાત્રાણિ ।
યં શ્લિષ્યતે ઽન્યયોષા તિક્તં તસ્યામૃતં પુરતઃ

ન કૃતં તવ રહસિ પુરો બાષ્પાવૃતકણ્ઠકુણ્ઠયા વાચા ।
ગેહસ્વામિતિરસ્કૃતિનિષ્પાદિતદુઃખવેગનિર્વહણમ્

ઉપધાનીકૃત્ય ભુજાવન્યોન્યં નિર્વિશઙ્કમાવાભ્યામ્ ।
સંવલિતોરુ ન સુપ્તં શિથિલાઙ્ગં રતિવિમર્દખિન્નાભ્યામ્

આત્મગૃહાદાનીતં પ્રચ્છાદ્ય સ્વાદુ ભોજનં વિજને ।
સ્વકરેણ મયા દત્તં નિર્વૃતહૃદયેન નાશિતં ભવતા

ન કૃતા ચરિત્રરક્ષા ન ચ ભુક્તં ત્વચ્છરીરમપયન્ત્રમ્ ।
દૃષ્ટાદૃષ્ટભ્રષ્ટા ક્વ યામિ કિં વા કરોમિ દુર્જાતા

અવગુણ્ઠનવિનયરતિં સ્વૈરાલપનં સુમન્દસંચારમ્ ।
સમ્પ્રતિ મમ પાપાયાઃ કરપિહિતમુખા હસન્તિ ભૂમિજ્ઞાઃ

યાસામાસીત્સખ્યં મયા સમં સમવયઃકુલસ્ત્રીણામ્ ।
તા વારયન્તિ મત્તઃ કુસઙ્ગ ઇતિ તન્નિયન્તારઃ

ધિગ્વાદાન્પરિજનતઃ સહમાના મન્યુરોધનતવદના ।
તિષ્ઠામિ નિરભિમાના સ્વવિનિર્મિતદોષદૌર્બલ્યાત્

સદ્ભિર્વિધીયમાનં પ્રસઙ્ગપતિતં પતિવ્રતાસ્તવનમ્ ।
હૃદયેન દૂયમાના મૂઢા સીદામિ શૃણ્વન્તી

આસન્ન ઉપવિશન્તીં મન્દાક્ષાન્માં નિષેદ્ધુમસમર્થાઃ ।
અન્યોન્યમીક્ષમાણા જ્ઞાતિજનાઃ સંકુચન્તિ ભુઞ્જાનાઃ

પ્રકટીકૃતા ત્વયૈવ ક્ષણમાત્રમમુઞ્ચતા ગૃહોપાન્તમ્ ।
અસ્માસુ દૃશં મગ્નાં પ્રેમસ્નિગ્ધામનુદ્ધરતા

પરગૃહવિનાશપિશુનાઃ સુભગંમન્યાભિરૂપ્યકૃતદર્પાઃ ।
કૃકલાસતુલ્યરાગા ભવન્તિ યુષ્મદ્વિધા એવ

અનભીષ્ટવ્યવહારપ્રભવશુચા પીડિતાક્ષરા ઇત્થમ્ ।
સોપાલમ્ભા વિજને ધન્યાઃ શૃણ્વન્તિ બન્ધકીવાચઃ

પરતરુણીસદ્ભાવસ્નેહાર્પિતનયનભાગદૃષ્ટસ્ય ।
વેશ્યારચિતવિલાસાઃ કથિતાઃ પુરતઃ પુરાણતૃણતુલ્યાઃ

ઉપનમતિ રતિમહોત્સવ આરાધિતદેવતાવિશેષાણામ્ ।
વચનમપિ પ્રેમાર્દ્રં સ્વૈરિણ્યાઃ શ્રવણમેતિ પુણ્યવતામ્

કા ગણના વિષયરતે પુંસિ વરાકે પરાઙ્ગના સ્પૃહયા ।
વ્યાજેન વીક્ષમાણા ધ્યાનધિયાં સ્પૃશતિ મજ્જાનમ્

શિરસા રચિતાઞ્જલયો દધતિ નિદેશં ત્રિવિષ્ટપે ગણિકાઃ ।
પરદારરસાકૃષ્ટસ્તથાપિ ભેજે શચીપતિરહલ્યામ્

અપ્સરસઃ કિં ન વશા વૈદગ્ધ્યવતાં ચ કિં ન ધૌરેયઃ ।
યેન ચકારાસક્તિં ગોવિન્દો ગોપદારેષુ