કુટ્ટનીમત · શ્લોક 821-840

દુર્ભર્તૃકરાસ્ફાલનમલિનીક્રિયમાણશોભમનુદિવસમ્ ।
તુઙ્ગમપિ પતિતકલ્પં સ્તનશાલિનિ તવ પયોધરદ્વન્દ્વમ્

પર્યઙ્કઃ સ્વાસ્તરણઃ પતિરનુકૂલો મનોહરં સદનમ્ ।
તુલયન્તિ ન લક્ષાંશં ત્વરિતક્ષણચૌર્યસુરતસ્ય

સહસા સંકટવર્ત્મન્યવિતર્કિતસમ્મુખાગતેન વિશા ।
અભિલષિતેનોદ્ઘૃષ્ટકમનલ્પશુભકર્મણા લભ્યમ્

પ્રીતિઃ કિલ નિરતિશયા સ્વર્ગઃ પરલોકચિન્તકૈર્ગદિતઃ ।
તસ્યાસ્તુ જન્મલાભો હૃદયેપ્સિતપુરુષસંભોગાત્

અતટસ્થસ્વાદુફલગ્રહણવ્યવસાયનિશ્ચયો યેષામ્ ।
તે શોકક્લેશરુજાં કેવલમુપયાન્તિ પાત્રતાં મન્દાઃ

કિં પ્રતિકૂલા ગ્રહગતિરુત પરિણતમન્યજન્મદુશ્ચરિતમ્ ।
સ્વાનુષ્ઠાનાભ્યસનં કિં વા તસ્યાત્મયોનિહતકસ્ય

યેન તપસ્વી સ યુવા સ્તૌતિ સમીરં ત્વદઙ્ગસંસ્પૃષ્ટમ્ ।
ત્વત્પાદાક્રાન્તભુવે સ્પૃહયતિ કકુભં ત્વદાશ્રિતાં નમતિ

ધ્યાયતિ યુષ્મદ્રૂપં ત્વન્નામકવર્ણમાલિકાં જપતિ ।
એકાગ્રીકૃતચેતાસ્ત્વત્સંગતસૌખ્યસિદ્ધિમભિકાઙ્ક્ષન્

ઉત્સૃષ્ટસકલકાર્યસ્તિર્યગ્ગ્રીવં વિલોકયન્ભવતીમ્ ।
કુરુતે ગૃહાગ્રરથ્યાં યાતાયાતૈઃ શતાવર્તામ્

દૃષ્ટો ઽસિ તયા સુચિરં ગેહાભ્યાશે પરિભ્રમન્સ્પૃહયા ।
સંદેશ એષ દત્તઃ પ્રાભૃતમેતત્તવ પ્રહિતમ્

શુષ્યતિ સાલભમાના ભવત્કૃતે વેશ્મનિર્ગમાવસરમ્ ।
ઇતિ ચતુરશઠસ્ત્રીભિર્વિલુપ્યતે ત્વદપદેશેન

કિં વા કથિતૈરધિકૈરસ્થાનાવિષ્ટચેતસસ્તસ્ય ।
અનુતિષ્ઠ યથાયુક્તં ત્વત્તો નાશશ્ચ જીવરક્ષા ચ

કુલપતનં જનગર્હાં નરકગતિં પ્રાણિતવ્યસંદેહમ્ ।
અઙ્ગીકરોતિ તત્ક્ષણમબલા પરપુરુષમભિયાન્તી

સ તુ લિખતિ દાસપત્રં ત્યજતિ કુટુમ્બં દદાતિ સર્વસ્વમ્ ।
યાવન્ન ભવતિ પુરતઃ પરયુવતિઃ પ્રોજ્ઝિતાવરણા

દૃષ્ટં યદ્દ્રષ્ટવ્યં વ્યપયાતં કૌતુકં વિદિતમન્તઃ ।
ઇતિ યાતિ મનસિ કૃત્વા વિહિતવિધેયસ્તતસ્તૂર્ણમ્

સાપિ ચ્છિન્ના ચ્છોટનગૃહીતમુક્તા વિલોકયન્ત્યાશાઃ ।
વિશતિ ગૃહં સંત્રસ્તા સર્વત આશઙ્કિતા સવૈલક્ષ્યા

નવચારિત્રભ્રંશાત્સુરચિતકુલટોત્તરેષુ નો નિપુણા ।
પૃષ્ટા ક્વ ગતાસિ ત્વં ન ક્વ ચિદિતિ સમ્ભ્રમાદ્ બ્રૂતે

એતે દોષા બહવઃ પુરુષા અપિ ચપલકૌતુકાઃ પ્રાયઃ ।
ત્વં ચ ગ્રહેણ લગ્ના કાર્યવિમૂઢાત્ર તિષ્ઠામિ

ઇતિ દોલાગતહૃદયા સ્થિરીકૃતાભ્યસ્તકર્મણા દૂત્યા ।
દૃષ્ટેતિ શઙ્કમાના પદે પદે ચલતિ પર્ણે ઽપિ

સર્વત્ર વિક્ષિપન્તી મુહુર્મુહુશ્ચકિતતરલિતે નેત્રે ।
પ્રાપ્તા સંકેતભુવં શતગુણિતમનોરથાકૃષ્ટા