કુટ્ટનીમત · શ્લોક 81-100

ઇતિ નિજસેવકનિગદિતરામણિકાવચનજનિતપરિતુષ્ટ્યા ।
અન્તર્મુદિતો બ્રૂતે મામેષ ખલીકરોતીતિ

કતમત્કતમલ્લગ્નં પ્રસ્થાનં કા ચ નર્તકી ભદ્રા ।
ષિઙ્ગટકે કા નૃત્યતિ કોહલભરતોદિતક્રિયયા

કીદૃક્ ત્વં લયમાર્ગે ધવલુકરચિતે ચ ભાણકે કીદૃક્ ।
પ્રેક્ષણકાદાવેવં પૃચ્છતિ નૃત્તોપદેશકં યત્નાત્

સુમનોમાલાં કણ્ઠાત્સાદરચેતા દદાતિ નર્તક્યૈ ।
અપનીય સતામ્બૂલકમનવસરે સાધુવાદં ચ

ભુજપતનગાત્રસંસ્થિતિલાલિત્યોદ્વહનપાર્શ્વવલિતાનિ ।
અનયૈવ નિર્મિતાનિ સ્થાનકશુદ્ધિશ્ચ ચાતુરસ્ર્યં ચ

પ્રવિભક્તૈર્ભાવરસૈરભિનયભઙ્ગ્યા પરિક્રમૈશ્ચિત્રૈઃ ।
રમ્ભામપ્યતિશેતે કિમુતેતરમર્ત્યનર્તકીલોકમ્

ઇત્યપસારકવિરતાવવિરતમુત્સ્નાયુકણ્ઠમત્યુચ્ચૈઃ ।
વર્ણયતિ ભાવિતાત્મા લક્ષિતપદમાત્રયા પાત્રમ્

પ્રાયેણ ભટ્ટતનયો ભવતીદૃશવેષચેષ્ટિતો વત્સે ।
તં મદનવાગુરાન્તઃ પાતયસિ યથા તથા બ્રૂમઃ

ચતુરા પ્રાગલ્ભ્યવતી પરચિત્તજ્ઞાનકૌશલોપેતા ।
યોજ્યા તસ્મિન્દૂતી વક્રોક્તિવિભૂષિતા પ્રયત્નેન

સ ઉપેત્ય તયાવસરે તામ્બૂલં સુમનસશ્ચ દત્ત્વેત્થમ્ ।
અભિધાતવ્યઃ સુન્દરિ મકરધ્વજદીપકૈર્વચનૈઃ

જન્મસહસ્રોપચિતૈઃ પુણ્યચયૈરદ્ય ફલિતમસ્માકમ્ ।
યત્ત્વં નયનાનન્દન નયનાવસરં સમેતો ઽસિ

ચાટુક્રમમનુરાગં પ્રણયરુષૌ વિરહજનિતશોકાર્તિમ્ ।
પ્રકટયતિ વારરમણી નટીવ શિક્ષાભિયોગેન

પ્રવયસિ યૌવનશાલિનિ હીનકુલે સત્કુલપ્રસૂતે ચ ।
રોગવતિ દૃઢશરીરે સમચિત્તા યોગિનશ્ચ ગણિકાશ્ચ

ઉપચરિતાપ્યતિમાત્રં પ્રકટવધૂઃ ક્ષીણસમ્પદઃ પુંસઃ ।
પાતયતિ દૃશં વ્રજતઃ સ્પૃહયા પરિધાનમાત્રે ઽપિ

ઇત્થં દૃઢતરવાસિતમનસાં પુંસાં ત્વસામ્પ્રતં પુરતઃ ।
વેશવિલાસવતીનામશરીરશરવ્યથાકથનમ્

કેવલમગણિતલાઘવદૂરપરિત્યક્તધીરતાભરણા ।
મુખરયતિ માં દુરાશાદગ્ધસખી તેન કથયામિ

હૃદયમધિષ્ઠિતમાદૌ માલત્યાઃ કુસુમચાપબાણેન ।
ચરમં રમણીવલ્લભ લોચનવિષયં ત્વયા ભજતા

ક્ષણમુત્કણ્ટકિતાઙ્ગી ક્ષણમુલ્બણદાહવેદનાવસ્થા ।
ક્ષણમુપજાતાકમ્પા સ્વેદાર્દ્રવપુઃ ક્ષણં ભવતિ

મુહુરવિભાવિતહાસ્યા મુહુરુજ્ઝિતધીરભાવમત્યુચ્ચૈઃ ।
રોદિતિ ગાયતિ ચ પુનઃ પુનશ્ચ મૌનાવલમ્બિની ભવતિ

પતતિ મુહુઃ પર્યઙ્કે મુહુરઙ્કે પરિજનસ્ય મુહુરવનૌ ।
કિસલયકલ્પિતતલ્પે મુહુરમ્ભસિ મુહુરનઙ્ગસંતપ્તા