કુટ્ટનીમત · શ્લોક 61-80

શૃણુ તસ્ય ચારુહાસિનિ વેષગ્રહણં ચ ચેષ્ટિતં ચૈવ ।
નિપતતિ ચ યથા તૂર્ણં પ્રિયસુરભિકુસુમશરાસનપ્રસરે

સ્થૂલસ્થાપિતચૂલકપઞ્ચાઙ્ગુલમાત્રકેશવિન્યાસઃ ।
લમ્બશ્રવણનિવેશિતકરપત્રિકઘટિતદશનપઙ્ક્તિશ્ચ

કરશાખાશ્રિતમુદ્રિકચામીકરકણ્ઠસૂત્રિકાભરણઃ ।
પરિમૃષ્ટગાત્રકુઙ્કુમકિઞ્ચિત્પિઞ્જરિતવસનસંવીતઃ

પ્રવિલમ્બિકુસુમદામકગલમણ્ડનજાતરૂપકૃતશોભઃ ।
અન્તર્નિવિષ્ટસિક્થિતતૌરુષ્કિકખુશ્શિકાદિચરણત્રઃ

નાનાવર્ણવિવેષ્ટિતબહલદશાપાશબદ્ધતતકેશમ્ ।
એકસ્મિન્દલવીટકમપરસ્મિન્સીસપત્રકં કર્ણે

ઉચ્ચણ્ડકનકગર્ભિતકુઙ્કુમપિઞ્જરિતવસ્તિપરિધાનમ્ ।
સ્થૂલતરકાચવર્તકમાલાં ચ ગલે દધાનેન

વૃશ્ચિકરઞ્જિતકરરુહકરમૂલનિબદ્ધશઙ્ખચક્રેણ ।
પ્રથમવયસ્ત્વં ભજતા તામ્બૂલકરઙ્કવાહિનાનુગતઃ

શ્રેષ્ઠિવણિગ્વિટકિતવપ્રધાનરઙ્ગસ્ય સુમહતો મધ્યે ।
શૂલાપાલસ્થાપિતકતિપયવધ્રોરુપીઠિકાસીનઃ

ઉત્સઙ્ગાર્પિતખડ્ગૈરયથાતથભાષિભિર્મહૌદ્ધત્યમ્ ।
બિભ્રાણૈરનુજીવિભિરધિષ્ઠિતઃ પઞ્ચષૈઃ પુરુષૈઃ

ચતુરતરસેવકાર્પિતપૃષ્ઠપરિક્ષિપ્તપૂર્વદેહાંશઃ ।
અન્તર્વિધૃતાવેલપ્રોચ્છૂનકપોલકલિતકરપર્ણઃ

અનપેક્ષિતપ્રસઙ્ગઃ પુનઃ પુનઃ પઠતિ સોન્નતભ્રૂકઃ ।
ગાથાશ્લોકપ્રાયં ભાવિતચેતા યથાતથાધીતમ્

વિસ્મયલોલિતમૌલિઃ પાર્શ્વગતાન્તાડયન્રસાવેગાત્ ।
હાકષ્ટસાધુવાદૈરન્તરયતિ પરસુભાષિતશ્રવણમ્

ઇદમુક્તો રહસિ રુષા તાતેન નૃપો નૃપેણ તાતો ઽપિ ।
ઇતિ પિતુરાવિષ્કુરુતે મહીભૃતઃ પ્રણયવિશ્વાસૌ

પત્રચ્છેદમજાનન્ જાનન્વા કૌશલં કલાવિષયે ।
પ્રકટયતિ જનસમાજે બિભ્રાણઃ પત્રકર્તરીં સતતમ્

બ્રહ્મોક્તનાટ્યશાસ્ત્રે ગીતે મુરજાદિવાદને ચૈવ ।
અભિભવતિ નારદાદીન્ પ્રાવીણ્યં ભટ્ટપુત્રસ્ય

વસુનન્દચિત્રદણ્ડકમુક્તાયુધખડ્ગધેનુબન્ધેષુ ।
વ્રજતિ પુરતો ઽસ્ય નિયતં ભાર્ગવતાં પરશુરામો ઽપિ

વાત્સ્યાયનમયમબુધં બાહ્યં દૂરેણ દત્તકાચાર્યમ્ ।
ગણયતિ મન્મથતન્ત્રે પશુતુલ્યં રાજપુત્રં ચ

યઃ પ્રાર્થિતો ઽપિ યત્નાત્કવચં રાધાસુતો દદાતિ સ્મ ।
અવિચિન્તિતવસુવર્ષસ્ત્યાગગુણં હસતિ તસ્યાયમ્

પ્રપલાયનૈકહૃદયે યો વિક્રમમાતનોતિ હરિણે ઽપિ ।
સિંહસ્ય તસ્ય શૌર્યં ત્રપાકરં ભટ્ટપુત્રસ્ય

આખેટકે ઽપિ કૌતુકમસ્ત્યેવ જયશ્ચ ચઞ્ચલે લક્ષ્યે ।
ભટ્ટભયેન ન ખેલતિ ભટ્ટસુતઃ કિં ત્વતિપ્રકટમ્