કુટ્ટનીમત · શ્લોક 101-120

મહિષીવ પઙ્કદિગ્ધા હંસીવ મૃણાલવલયપરિવારા ।
સુભગ મયૂરીવાસૌ ભુજઙ્ગવિદ્વેષિણી જાતા

કદલી ચન્દનપઙ્કઃ પઙ્કેરુહનીરહારઘનસારમ્ ।
શશધરશશધરકાન્તં શાન્ત્યૈ નો મદનહુતભુજસ્તસ્યાઃ

અપસારય ઘનસારં કુરુ હારં દૂર એવ કિં કમલૈઃ ।
અલમલમાલિ મૃણાલૈરિતિ વદતિ દિવાનિશં બાલા

સંકલ્પૈરુપનીતં ત્વામન્તિકમુલ્લસન્મનોવૃત્તિઃ ।
દૃઢમાલિઙ્ગતિ પશ્ચાત્સ્વભુજાપીડેન યાતિ વૈલક્ષ્યમ્

કુસુમામોદી પવનઃ પિકકૂજિતભૃઙ્ગસાર્થરસિતાનિ ।
ઇયમિયતી સામગ્રી ઘટિતા વિધિનૈવ તદ્વિનાશાય

અબલાં બલિના નીતાં દશામિમાં મકરકેતુના રક્ષ ।
આપત્પતિતોદ્ધૃતયે ભવતિ હિ શુભજન્મનાં જન્મ

નો ગૃહ્ણન્તિ યથાર્થા અર્થિજનૈર્નિગદિતા ગિરઃ પ્રાયઃ ।
માલત્યા ગુણલેશં શૃણુ ધૃષ્ટતયા તથાપિ કથયામિ

આસ્ફાલયતો નૂનં ધનુરતનોઃ કૌસુમં રજઃ પતિતમ્ ।
સંહૃત્ય સા સુમધ્યા વિશ્વસૃજા નિર્મિતા તેન

ઉપહસતિ ગિરિસુતાયા લાવણ્યં યેન સતતલગ્નેન ।
ન દ્રવતામુપનીતં ભોગીન્દ્રવિભૂષણસ્ય દેહાર્ધમ્

શશધરબિમ્બાર્ધગતાં છાયામિવ સૈંહિકેયવદનસ્ય ।
અલિપટલનીલકુટિલામલકાવલિમલિકસંનિધૌ વહતિ

સરસિજમસ્થિરશોભં વિભ્રમરહિતં ચ મણ્ડલં શશિનઃ ।
કેન સમેતુ સમત્વં હૃદયપ્રિય માલતીવદનમ્

અલિરુપરિ તદીક્ષણયોર્ભ્રાન્ત્વાસૌગન્ધ્યસૂચિતવિશેષઃ ।
નિપતતિ કર્ણામ્બુરુહે નિર્ગુણતાપ્યવસરે સાધ્વી

બિભ્રાણે ઽરુણિમાનં સહજં જિતબન્ધુજીવરુચિમધરે ।
યદલક્તકવિન્યસનં તત્તસ્યા મણ્ડનક્રીડા

ચિત્રમિદં યત્કૃશતા તસ્યા વલિપરિગૃહીતમધ્યસ્ય ।
અથવા નો વિધિવિહિતા મહતાપ્યપનીયતે તનુતા

આસ્તામપરસ્તાવત્તસ્યાઃ સ્મરવસતિપૃથુતરનિતમ્બઃ ।
શ્લથયતિ કપિલમુનેરપિ દૃક્પથપતિતઃ સમાધાનમ્

તસ્યા રમ્ભાવપુષો રમ્ભોપમમૂરુયુગલમવલોક્ય ।
મકરધ્વજો ઽપિ સહસા નિજસાયકલક્ષ્યતાં યાતિ

જઘનભરાલસયાતા નો યાતા સા વિલોચનપ્રસરમ્ ।
તિષ્ઠતિ તેન મનોહર શરજન્મા બ્રહ્મચર્યેણ

યદિ કથમપિ મધુમથનઃ પશ્યતિ તામસમબાણસર્વસ્વમ્ ।
તદસારભારભૂતં લક્ષ્મીવપુરુરસિ વિનિહિતં મનુતે

યદિ પતતિ સા કથં ચિદ્વીક્ષણવિષયં હરસ્ય તદવશ્યમ્ ।
ત્રિભુવનમશિવં કુરુતે વામેતરદેહભાગમાસાદ્ય

સૌન્દર્યં તત્તાદૃશમશેષયોષિદ્વિલક્ષણં સૃજતઃ ।
યન્નિષ્પન્નં ધાતુસ્તન્મન્યે કાકતાલીયમ્