કુટ્ટનીમત · શ્લોક 741-760

કેયૂરસ્થાનગતસ્વર્ણાવૃતમન્ત્રગર્ભજતુગુડકઃ ।
મણિબન્ધનવિન્યસ્તપ્રચલાઙ્કુરજાતરૂપમણિમાલઃ

ધૃતવેત્રદણ્ડ ઊર્ણકપરિવેષ્ટિતસાસિધેનુકનિતમ્બઃ ।
મૃદુતરપટિકાવરણઃ શબ્દોલ્બણચુર્ચુરાઙ્કચરણત્રઃ

ગમ્ભીરેશ્વરદાસ્યાં લગ્નઃ કિલ તવ વયસ્યકો વીરઃ ।
પ્રાપ્સ્યતિ સાપિ દુરાશાવર્ષત્રિતયેન યન્મયા પ્રાપ્તમ્

દર્શયતિ દિશઃ ફલિતા અમૃતગભસ્તિં કરે ઽવતારયતિ ।
સુરદેવિ ચન્દ્રવર્મા નિર્વસ્તુકવાક્પ્રપઞ્ચેન

ત્વામનુયાન્તં સમ્પ્રતિ પશ્યામિ કુરઙ્ગિ વસુષેણમ્ ।
સુનિરૂપિતા ભવિષ્યસિ વિષમા ગુડજિહ્વિકા તસ્ય

ચર્વયતિ જલં યો ઽસૌ હરિણિ હરો ધૂર્તતાભિમાનેન ।
લિખતિ શતં દશવૃદ્ધ્યા સ નિમગ્નસ્તરલિકાવર્તે

ગૃહ્ણાસિ યત્પટાન્તે મમ પશ્યત એવ નન્દ મદિરાખ્યામ્ ।
અત આવયોરવશ્યં મા વક્ષ્યસિ નોક્તમન્તરં ભવતિ

યો ઽયં ગૃહીતબૃસિકઃ કુશકર્ણો વિધૃતદણ્ડકાષાયઃ ।
લોકસ્પર્શાશઙ્કી કૃતાપસારો વિલોકયન્ પાર્શ્વૌ

કુર્વાણો મૌનવ્રતમુત્પાદિતસકલવૈષ્ણવશ્રદ્ધઃ ।
હરિશાસનં પ્રપન્નસ્ત્રિપુરાન્તકદર્શનાપદેશેન

સ્ત્રૈણં પશ્યતિ યુક્ત્યા સાકાઙ્ક્ષં વર્જિતાન્યજનદૃષ્ટિઃ ।
કુમુદિનિ મમ હૃદયગતં ભવિતવ્યં વ્યાજલિઙ્ગિનાનેન

પશ્યત્યદૃશ્યમાનો નિરીક્ષિતો વીક્ષતે પરાં કકુભમ્ ।
બ્રૂતે કિં ચિત્સસ્પૃહમભિયુક્તો ભવતિ કીલિતધ્વાનઃ

ન જહાતિ સમાસન્નં નોત્સહતે સ્પર્શગોચરે સ્થાતુમ્ ।
એષ મનુષ્યો મન્યે નિષ્પ્રતિભઃ સાભિલાષશ્ચ

તે ઽતીતાઃ ખલુ દિવસાઃ ક્રિયતે નર્મ ત્વયા સમં યેષુ ।
અધુનાચાર્યાની ત્વં ભાશુદ્ધાચાર્યસમ્બન્ધાત્

ભ્રમસિ યથેષ્ટં તાવત્કુર્વાણો યુવતિપલ્લવગ્રહણમ્ ।
લોલિકદાસ ન યાવન્નરદેવીપાશિકાં વિશસિ

એવંપ્રકારવાક્યપ્રસક્તવિટચેટિકાસમાકીર્ણમ્ ।
સેવાચતુરપુરઃસરવિજનીકૃતવર્ત્મ દેવકુલમ્

સમ્પાદિતહરપૂજો નિષ્ઠુરયાષ્ટીકનિયમિતે લોકે ।
ત્વરિતનિયોગિસ્થાપિતમાસનમધ્યાસ્ત સમરભટઃ

અગ્રોપવિષ્ટનર્તકવાંશિકગાતૃપ્રકાશયુવતિગણઃ ।
શ્રેષ્ઠિપ્રમુખવણિગ્જનઢૌકિતતામ્બૂલકુસુમપટવાસઃ

વિવિધવિલેપનખરટિતચક્રકધરખડ્ગધારિણાશૂન્યઃ ।
પૃષ્ઠત આત્તકૃપાણૈઃ શિરોભિરક્ષૈશ્ચ વિશ્વસ્તૈઃ

તામ્બૂલકરઙ્કભૃતા સન્દંશગૃહીતવીટિકાગ્રહણે ।
ઈષત્સ્પૃષ્ટં કુર્વન્મન્દં ખટકામુખેન વામેન

પાર્શ્વાવસ્થિતનર્મપ્રિયસચિવન્યસ્તપૂર્વતનુભાગઃ ।
પપ્રચ્છ કુશલવાર્તાં સ વણિગ્જનનર્તકપ્રભૃતીન્