કુટ્ટનીમત · શ્લોક 721-740

જીવ્યત એવ કથં ચિદ્ધિગ્વૃત્તિમિમાં મહદ્ભિરવગીતામ્ ।
વિજહાતિ યન્ન ગણિકા તદ્વાઞ્છિતરમણલાભલોભેન

કણ્ટકિનઃ કટુકરસાન્ કરીરખદિરાદિવિટપતરુગુલ્માન્ ।
ઉપભુઞ્જાના કરભી દૈવાદાપ્નોતિ મધુરમધુજાલમ્

કા શ્રીરપ્રણયિવશા કા વિલસિતયો મનોભવવિહીનાઃ ।
કો ધર્મો નિરુપશમઃ કિં સૌખ્યં વલ્લભેન રહિતાનામ્

સ્વાચ્છન્દ્યફલં બાલ્યં તારુણ્યં રુચિતસુરતભોગફલમ્ ।
સ્થવિરત્વમુપશમફલં પરહિતસમ્પાદનં ચ જન્મફલમ્

અભિદધતીમિદમાલીમવકર્ણ્ય ગૃહીતયેવ ભૂતેન ।
યૌવનસુખેન સાર્ધં મયૈવ યૂયં પરિચ્છિન્નાઃ

અધુનાનુતાપપાવકમધ્યગતા પચ્યમાનસર્વાઙ્ગી ।
નિષ્ફલજન્મપ્રાપ્તિર્જીવામ્યુચ્છ્વાસમાત્રેણ

સ્થાનેષુ યેષુ યુષ્મત્સંગતયા ક્રીડિતં ચિરં ધૃત્યા ।
તાનિ ખલુ વીક્ષમાણા ભવામિ કણ્ઠસ્થિતપ્રાણા

અન્યવશેન વિસંજ્ઞા કૃતભૂષા યન્ત્રસૂત્રસંચારા ।
દારુમયીવ પ્રતિમા વિદધામિ વિડમ્બના બહ્વીઃ

યદિ નામોદરભરણપ્રાપ્ત્યૈ કુરુતે ઽન્યપુષ્પસંશ્લેષમ્ ।
તદપિ ન પુષ્ટિર્ભૃઙ્ગ્યા અપિબન્ત્યા આરવિન્દમકરન્દમ્

આસ્તામપરો લોકઃ ક્રીડાપેક્ષી પરાપદિ પ્રીતઃ ।
વ્યસનાર્ણવે પતન્તી ન વારિતા પરિજનેનાસ્મિ

કિં વા બહુભિઃ કથિતૈઃ સમ્પ્રતિ નિયમે તુ નિયમિતા બુદ્ધિઃ ।
સ્થાસ્યામિ સંનિયુક્તા ભવદ્ગૃહે પ્રેષ્યકાર્યેષુ

ઇતિ નેત્રાદિવિકારૈર્વશમુપનીતં પ્રલીનધૈર્યાઙ્ગમ્ ।
મારગ્રહાભિભૂતં પરિમૃષ્ટપ્રાઙ્નિરાકૃતિસ્મરણમ્

પ્રાદુર્ભૂતરિરંસં ક્ષણે ક્ષણે જત્રુદેશગતદૃષ્ટિમ્ ।
પક્વામ્રમિવ વિમોક્ષ્યસિ પૂર્વવદાચૂષ્ય સુભ્રુ નિઃશેષમ્

સ્વશરીરામિષદિગ્ધં વક્રસ્મિતદૃષ્ટિપાતવાગ્બડિશમ્ ।
પ્રક્ષિપ્યાકૃશ્ય જડં સ્ફુરણેન વિવર્જિતં સુપરિપુષ્ટમ્

હસ્તદ્વયાન્તરાગતમુપચારપરિવ્યયેન સંસ્કૃત્ય ।
ભુક્ત્વા યાવન્માંસં ત્યક્ષ્યસિ ચર્માસ્થિશેષિતં મત્સ્યમ્

શૃણુ સુશ્રોણિ યથાસ્મિન્ કલશેશ્વરપાદમૂલમઞ્જર્યા ।
પ્રવરાચાર્યદુહિત્રા રાજસુતશ્ચર્વિતશ્ચ મુક્તશ્ચ

આસીચ્છ્રીસિંહભટો નામ્ના નૃપતિર્મહીયસાં પ્રષ્ઠઃ ।
તસ્યાત્મજો ઽધિતસ્થૌ નિવેશનં દેવરાષ્ટ્રસંબદ્ધમ્

સ કદા ચિદ્વૃષભધ્વજદિદૃક્ષયા પરિમિતાપ્તપરિવારઃ ।
અનુવર્તમાન આગાત્તારુણ્યોદીર્ણવેશચરિતાનિ

મૂર્ધત્રિભાગસંસ્થિતબૃહદમ્બરચીરકેશસંયમનઃ ।
અલ્પાચ્છગાત્રરાગો ઘનકુઙ્કુમલિપ્તકર્ણકેશાગ્રઃ

સિદ્ધાર્થબીજદન્તુરલલાટતિલકોપયુક્તતામ્બૂલઃ ।
શ્રવણનિવેશિતકુણ્ડલટીટિભકપ્રાયકન્ધરાભરણઃ