કુટ્ટનીમત · શ્લોક 681-700

કિં નિર્મિતો ઽસિ ધાત્રા નવો ઽપરઃ કિમુ વસન્તગુણ એષઃ ।
કુસુમશરપૂર્ણતૂણઃ કિમુતાભવદન્ય એવ કન્દર્પઃ

નો પશ્યસિ યદિ કકુભઃ પ્રચુરોજ્જ્વલસુરભિકુસુમરમણીયાઃ ।
પરભૃતકૂજિતમિશ્રાન્ન શૃણોષિ યદિ દ્વિરેફઝઙ્કારાન્

ગન્ધં યદિ નો લભસે વાસિતદિગ્વ્યોમ સુમનસાં હૃદ્યમ્ ।
અનુભવસિ યદિ સ્પર્શં નો શીતલદાક્ષિણાત્યપવનસ્ય

રસનેન્દ્રિયૈકશેષઃ પરસંચાર્યો જનેન પરિભૂતઃ ।
નાર્હસિ તતો ઽપિ મુક્ત્વા નિજાશ્રયં ગન્તુમન્યતો નિતરામ્

અસ્મિન્સરસિ સલીલં કરયન્ત્રવિનિર્યદમ્બુધારાભિઃ ।
દયિતેન તાડિતાહં મયાપ્યસાવાહતો મૃણાલિકયા

પુનરન્તર્જલમગ્નો મામુપગમ્યાવિભાવિતઃ સહસા ।
ઉચ્ચિક્ષેપ સહાસં હાસિતસંનિહિતપરિવારઃ

સંસક્તાર્દ્રાવરણં જઘનં નઃ પશ્યતસ્તદા તસ્ય ।
પ્રથમાકાઙ્ક્ષાકૂતં ભેજે સમ્ભોગશૃઙ્ગારઃ

કાલપ્રદેશવેશવ્યાપારસ્થિતિવિશેષઘટનાભિઃ ।
ચિરરૂઢો ઽપિ હિ યૂનાં નવત્વમુપનીયતે રાગઃ

સાદરમર્પયતો ઽબ્જં ગોત્રસ્ખલનાપરાધિનસ્તસ્ય ।
સખ્યઃ સ્મરામિ સહસા વિલક્ષતાં ક્લિષ્ટહસિતસ્ય

પ્રત્યગ્રનખવ્રણિતે સ્તનાન્તરે ક્ષિપતિ લોચને સ્પૃહયા ।
પ્રેયસિ હ્રીતાચ્છાદનમકરવમહમબ્જિનીપત્રમ્

ક્ષિપ્ત્વાતર્કિતમમ્ભો ગર્ભિતનલિનીપલાશપુટમારાત્ ।
આહતયા યદ્વિકૃતં સ્વસ્થધિયા તન્ન શક્યતે કર્તુમ્

સુશ્લિષ્ટો હાવવિધિર્મદનાલસગાત્રજૃમ્ભિતં લલિતમ્ ।
ગૂઢસ્થાનપ્રકટનમઙ્ગુલિવિસ્ફોટનં સ્મિતં સુભગમ્

નીવિવિમોચનબન્ધૌ મુહુર્મુહુઃ કેશપાશવિશ્લેષઃ ।
સ્વાધરદશનગ્રહણં બાલકપરિચુમ્બનં રતોત્સુકતા

સાકાઙ્ક્ષિતં ક્ષિપન્ત્યાસ્તરલાયતલોચને મુહુઃ કામ્યે ।
ઉદ્દિશ્ય તદ્વયસ્યકમિતિ શોકગ્રસ્તવર્ણગિરઃ

એકીભાવં ગતયોર્જલપયસોર્મિત્રચેતસોશ્ચ તથા ।
વ્યતિરેકકૃતૌ શક્તિર્હંસાનાં દુર્જનાનાં ચ

અતિપેલવમતિપરિમિતવર્ણં લઘુતરમુદાહરતિ શણ્ઠઃ ।
પરમાર્થતઃ સ હૃદયં વહતિ પુનઃ કાલકૂટઘટિતમિવ

યેન તદા મામૂચે પરિજનમુત્સાર્ય વિવૃતનટમન્યુઃ ।
દર્શિતહિતસ્વરૂપઃ પરપીડાકરણપણ્ડિતઃ પ્રખલઃ

અવિદિતગુણાન્તરાણાં કો દોષઃ પ્રાન્તદેશવાસાનામ્ ।
સ્વાધીનકુઙ્કુમા અપિ યદ્વિદધતિ બહુમતિં નીલે

ક્વ મહીતલરમ્ભા ત્વં ન્યક્કૃતચન્દ્રપ્રભા સ્વદેહરુચા ।
ચિત્રલતા ક્વ વરાકી નીચૈરુપસેવિતા વોટા

યસ્યાર્થે ન વિગણિતાઃ પ્રહ્વાત્માનો મહાધનાઃ કુલજાઃ ।
સો ઽદ્ય હૃદયેન તસ્યાં ત્વયિ તિષ્ઠતિ બાહ્યવૃત્તેન