કુટ્ટનીમત · શ્લોક 41-60

માતઃ કિં વિદધામો હતધાતુર્વામતાભિયોગેન ।
નાસાદયામ ઇષ્ટં નિજતનુપણ્યપ્રસારકેણાપિ

તત્કુરુ માતરનુગ્રહમભિધત્સ્વ મમાપિ દેહિનો ભોગ્યાન્ ।
તેષાં ચ વેશચેષ્ટિતમનસિજશરજાલપાતનોપાયાન્

ઇતિ ગિરમુદીરયન્તીં સપ્રેમામૃશ્ય પાણિના પૃષ્ઠે ।
રુચિરવચો વિકરાલા રુચિરાકૃતિમાલતીમૂચે

અયમેવ દહ્યમાનસ્મરનિર્ગતધૂમવર્તિકાકારઃ ।
ચિકુરભરસ્તવ સુન્દરિ કામિજનં કિઙ્કરીકુરુતે

અયમેવ તે કૃશોદરિ મન્દોલ્લસિતભ્રુવિભ્રમાધારઃ ।
અધરીકરોતિ ધીરાન્ મધુરસ્મિતસુભગવીક્ષિતવિશેષઃ

ઇયમેવ વદનકાન્તી રતિકાન્તાકૂતમતિતરાં કુરુતે ।
શ્રુતિપથમપ્યુપયાતા નિયતં તવ કામિનાં મનસિ

ઇયમેવ દશનપઙ્ક્તી રુચિરાચિરકાન્તિકાન્તિસમકાન્તિઃ ।
ઉત્પાદયતિ નિતાન્તં તવ મન્મથદાહવેદનાં પુંસામ્

ઇદમેવ સમુલ્લપિતં લીલાવતિ વિજિતપરભૃતધ્વાનમ્ ।
તવ નિઃશેષભુજઙ્ગવ્યાકર્ષણસિદ્ધમન્ત્રવચ્ચિત્રમ્

ઇદમેવ મકરકેતનનિકેતનં સ્તનયુગં તવાભોગિ ।
ભોગવતિ ભોગસાધનમપરોપાયગ્રહો વ્યર્થઃ

ઇદમેવ બાહુયુગલં મૃણાલતનુસુન્દરં તવાભોગિ ।
કસ્ય ન જનયતિ મદનં કનકાઙ્ગદભૂષણં સુતનુ

અયમેવ મધ્યદેશઃ કન્દર્પાદેશકરણચતુરસ્તે ।
પ્રકૃશો ઽપિ શરીરભૃતો દશમીં પ્રાપયતિ મન્મથાવસ્થામ્

ઇયમેવ રોમરાજિઃ સઙ્કલ્પજચાપયષ્ટિગુણશોભામ્ ।
દધતી વિદધાતિ તવ સ્મરસાયકશલ્યવિક્લવાન્ યૂનઃ

ઇદમેવ પૃથુલજઘનં કલધૌતશિલાતલાભિરમણીયમ્ ।
તવ તરુણવશીકરણં યતિસંયતિનાશકારિ કરભોરુ

ઇદમેવ તવોરુયુગં રમ્ભાગર્ભોપમં મનોહારિ ।
વદ સુન્દરિ નાભિમતં મદનજ્વરતાપશાન્તયે કસ્ય

યૌવનકલ્પતરોસ્તે કનકલતાવિભ્રમં સુવૃત્તમ્ ઇદમ્ ।
જઙ્ઘાયુગલં નેચ્છતિ કામફલપ્રાપ્તયે ક ઇવ

નિર્જિતદાડિમરાગં વિજિતસ્થલકમલિનીવિલાસમિદમ્ ।
તવ ચરણસરોજયુગં કસ્ય ન માનસમલઙ્કુરુતે

હ્રેપયતિ વારણેન્દ્રં હંસં હસતિ પ્રયાતમિદમેવ ।
તવ લીલાવતિ લલિતં યૂનાં હૃદયાનિ મથ્નાતિ

તદપિ યદિ તે કુતૂહલમવધાનં સંવિધાય તનુમધ્યે ।
આકર્ણય કથયામિ સ્વબુદ્ધિવિભવાનુસારેણ

સ્વીકુરુ તાવત્પ્રથમં નૃપસેવકભટ્ટસૂનુમતિયત્નાત્ ।
સ્વાધીનામતિવિપુલાં યદિ સમ્પદમીહસે સુતનુ

પ્રત્યાસન્નગ્રામે સ્વયં પ્રભુઃ પિતરિ નિત્યકટકસ્થે ।
ભટ્ટસુતશ્ચિન્તામણિરાકૃષ્ટો ભવતિ પુત્રિ નિયમેન