કુટ્ટનીમત · શ્લોક 601-620

સંનિહિતકલત્રાણામનુચિતમિતિ બાહ્યલોકસંવદનાત્ ।
અન્યસ્મિન્નુદવસિતે વિસર્જિતામિષ્ટમાલતીકેન

લોકેન હાસ્યમાનાં બિભ્રાણાં વાસસી જલક્લિન્ને ।
રૂપમદમુત્સૃજન્તીં વૈલક્ષ્યવ્રીડિતેન નતવદનામ્

પશ્ચાત્તાપગૃહીતાં કણ્ટકદર્ભાગ્રભિન્નપાદતલામ્ ।
અસ્મદ્વચઃ સ્મરન્તીં દ્રક્ષ્યન્ત્યભિસારિકાં સુકર્માણઃ

ઇતિ પરુષમભિદધાનાં માતરમવધીર્ય યુષ્મદભ્યાસમ્ ।
ચૌરહતકા વ્રજન્તીં વિદ્રાવિતરક્ષિણઃ સખીં મુમુષુઃ

એષા પ્રપઞ્ચરચના યદિ ભવતિ વૃથા પુનઃ પુરસ્તસ્ય ।
વણિગિદમુપેત્ય વક્ષ્યતિ સહાયપરિચોદિતો ભવતીમ્

પૂર્વાદત્તસ્યોપરિ મુક્તાહારસ્ય કેદરાસ્ત્રિંશત્ ।
પરિચારિકયાનીતા અન્યાનપિ મૃગયતે વ્યયસ્ય કૃતે

યત્તુ ઘનસારકુઙ્કુમચન્દનધૂપાદિ મુક્તકં દત્તમ્ ।
તત્સમ્પુટકે લિખિતં શૃણુ પિણ્ડનિકાં કરોમિ તે પુરતઃ

એતાવન્તં કાલં નાવષ્ટભ્યાર્થિતા ત્વમસિ ।
રિક્તં ભાણ્ડસ્થાનં સામ્પ્રતમિતિ યાચના ક્રિયતે

એવંવાદિનિ તસ્મિન્કિં ચિલ્લજ્જાનતા ક્ષણં સ્થિત્વા ।
પ્રશ્રિતયા વાચા વાચ્યઃ સવૈલક્ષ્યમ્

હારસ્તવૈવ તિષ્ઠતુ મધ્યસ્થસ્થાપિતેન મૂલ્યેન ।
શેષં તતો યદન્યત્તદ્દિવસૈઃ સંપાદયિષ્યામિ

ઇયમપિ કપટગ્રથના ષણ્ડસમા ચેત્તદ્ ઈદૃગભિધેયમ્ ।
આશઙ્કન્તે ઽનિષ્ટં કાતરહૃદયા હિ યોષિતઃ પ્રાયઃ

અપટુશરીરે સ્વામિનિ વિજ્ઞપ્તા ભગવતી મયા ગત્વા ।
ભવતુ નિરામયદેહો જીવિતનાથસ્તવ પ્રસાદેન

સમ્પન્નવાઞ્છિતાહં બલ્યુપહારેણ પૂજયિષ્યામિ ।
સામગ્રીવિરહેણ તુ ન વિતીર્ણા તત્ર મે મનસિ શૂકા

અસ્મિન્ વ્યર્થીભૂતે રિક્તીકૃતશીર્ણવેશ્મનો દાહમ્ ।
ઉત્પાદ્ય મન્દગામિનિ સર્વવિનાશઃ પ્રકાશમુપનેયઃ

સ્નિગ્ધત્વમલં બુદ્ધ્વા સહભોજનશયનવસનલિઙ્ગેન ।
એભિરુપાયદ્રવ્યૈર્વાન્તવિરિક્તસ્ત્વયા કાર્યઃ

વાર્ધુષિકકદર્થનયા ભોગધ્વંસાત્સહાયવચનૈર્વા ।
અવધારિતે ઽપિ નિપુણં વરગાત્રિ વિલુપ્તસારત્વે

પરુષવચોનિર્ધારણમાયત્યામીહિતોપઘાતીતિ ।
યત્નાદમી વિધેયા ગમ્યસ્ય વિમોક્ષણોપાયાઃ

પૃથગાસનનિર્દેશઃ પ્રત્યુત્થાનાદિકેષુ શૈથિલ્યમ્ ।
સાસૂયસોપહાસા આલાપા મર્મવેધિ પરિહસિતમ્

તત્પ્રતિપક્ષશ્લાઘા તદધિકગુણરાગકીર્તનાવૃત્તિઃ ।
વદતિ પ્રિયમાભીક્ષ્ણ્યં બહુપ્રલાપિત્વદૂષણાખ્યાનમ્

વચનાન્તરોપઘાતૈસ્તત્પ્રસ્તુતસંકથાસમાક્ષેપઃ ।
તદ્વ્યવહારજુગુપ્સા સવ્યપદેશસ્તદન્તિકત્યાગઃ