કુટ્ટનીમત · શ્લોક 581-600

ચક્રાહ્વપરિષ્વજનં હંસસમાશ્લેષનકુલપરિરમ્ભમ્ ।
પારાવતાવગૂહનમાચરતિ સુમધ્યમા યથાવસરમ્

તદ્વક્રવચનહાસવ્યવહૃતિહૃતમાનસસ્ય જાયન્તે ।
અનુકૂલસુન્દરા અપિ ભરણીયભરાય કેવલં દારાઃ

સૂચયતિ પૃથક્કરણં ભ્રાતઋણાં વક્તિ વિષમશીલત્વમ્ ।
વિવૃણોતિ ગૃહવિસંસ્થામભિનન્દતિ પિતૃકુલસ્ય ગુણવત્તામ્

અન્યસુતપક્ષપાતં કથયતિ માતુસ્તિરસ્કરોતિ પતિમ્ ।
પાર્શ્વનિમગ્ના જાયા મા યાતુ વિમુચ્ય કાર્મુકં મદનઃ

એવં કૃતે ઽપિ સુન્દરિ યદિ તિષ્ઠતિ નાયકઃ પ્રકૃત્યૈવ ।
ઇત્થં પથિ પરિમોષસ્ત્વત્સખ્યા નૈપુણેન વક્તવ્યઃ

ગૃહકાર્યવ્યગ્રતયા ચિત્તગ્રહણાય વા કુલસ્ત્રીણામ્ ।
નાયાતે ભવતિ સખી પ્રાવૃડ્ઘનકલુષિતે દિશાં ચક્રે

પ્રગ્રીવકશયનગતા સ્ફારીભવદાત્મસમ્ભવવિકારા ।
ત્વન્માર્ગનિહિતનેત્રા ગીતામન્યેન ગીતિકામશૃણોત્

યદિ જીવિતેન કૃત્યં સંભાવય વિરહિણિ પ્રિયં તૂર્ણમ્ ।
ઘનરસિતસ્ય હિ પુરતઃ કદલીદલકોમલઃ કુલિશપાતઃ

આકર્ણ્ય મામવાદીદ્ધન્યાસ્તા યુવતયઃ સખિ કઠોરાઃ ।
યા વિષહન્તે દીર્ઘં પ્રિયતમવિરહાનલાસઙ્ગમ્

મમ તુ દિનાન્તરિતે ઽપિ પ્રેયસિ લબ્ધ્વા સહાયસામગ્રીમ્ ।
વિદધાતિ મકરકેતન ઉત્કલિકાવિધુરિતં હૃદયમ્

ઉત્કણ્ઠયતિ ભૃશં માં સમીરણો બકુલકુસુમગન્ધાઢ્યઃ ।
પ્રચ્યાવયન્તિ ધૈર્યાન્મધુરધ્વનિતૈઃ કલાપભૃતઃ

સતડિન્મિલદ્બલાકામસિતામ્બુધરાવલીં સમુદ્યન્તીમ્ ।
ઉત્સહતે સા વીક્ષિતુમવિરલમાલિઙ્ગિતો યયા કાન્તઃ

સ્વેચ્છાગમનલઘુત્વં બહુલાપાયં નિશાસુ પન્થાનમ્ ।
ન વિચારયન્તિ મહિલા અભીષ્ટતમસઙ્ગતાવુત્કાઃ

ક્રિયતાં ભૂષણશોભા ત્વરયતિ મે માનસં મનોજન્મા ।
રઞ્જયતિ મનો નિતરાં કલધૌતનિવેશિતં રત્નમ્

ઘનજલદાવૃતકકુભિ પ્રદોષસમયે પ્રદોષગમનાય ।
વિદધાનયા કુબુદ્ધિં રાગાન્ધે કિમિદમારબ્ધમ્

વચનપ્રપઞ્ચસારં જાયાશ્રિતમન્યદેશસમ્બદ્ધમ્ ।
પુરુષમભિગન્તુકામા નવેયમભિસારિકા દૃષ્ટા

દરધૌતતિલકરચનાં ગલદમ્ભોબિન્દુલુલિતકેશાગ્રામ્ ।
તિમ્યત્તનુલીનાવૃતિચણ્ડાનિલસલિલપાતકણ્ટકિતામ્

અવિભાવિતસમવિષમપ્રસ્ખલદઙ્ઘ્રિં સહાયકરલગ્નામ્ ।
પુરતો ઽધ્વનઃ પ્રમાણં મુહુર્મુહુઃ સાધ્વસેન પૃચ્છન્તીમ્

અન્યસ્મિન્ પ્રેતપતૌ વ્યગ્રે કૃચ્છ્રેણ કથમપિ પ્રાપ્તામ્ ।
તત્કાલયોગ્યપરિજનનિવેદિતામિતિ વિકલ્પ્ય સહ સચિવૈઃ

કિં પ્રેમ્ણો ઽયં મહિમા કિમુતાનન્ત્યં ધનપ્રલોભસ્ય ।
કિં વાન્યતઃ પ્રવૃત્તા પ્રવેશિતા વાતવર્ષેણ