કુટ્ટનીમત · શ્લોક 561-580

ભાસ્કરવર્મણિ યાતે સુરવસતિં વારિતાપિ ભૂપતિના ।
તદ્દુઃખમસહમાના પ્રવિવેશ વિલાસિની દહનમ્

જ્વાલાકરાલહુતભુજિ નગ્નાચાર્યઃ પપાત નરસિંહઃ ।
તસ્મિન્નેવ શરીરં નિજમજુહોચ્છોકપીડિતા દાસી

પ્રીતિભરાક્રાન્તમતિસ્ત્રિદશાલયજીવિકાં ક્રમોપનતામ્ ।
અઙ્ગીચકાર મુક્ત્વા જીહલ્લા ભટ્ટવિષ્ણુમા મૃત્યોઃ

દેશાન્તરાદુપેતે પ્રસાદમાત્રેણ વીક્ષિતે વનિતે ।
પાદયુગં તત્યજતુર્ન વામદેવસ્ય સમિતિ નિહતસ્ય

ભટ્ટકદમ્બકતનયે યાતે વસતિં પરેતનાથસ્ય ।
ચક્રે દેહત્યાગં રણદેવી વારયોષિતાં મુખ્યા

અસ્યામેવ નગર્યાં દ્રવિણમદાત્ કાલસઞ્ચિતમશેષમ્ ।
પ્રેમ્ણાકૃષ્ટા ગણિકા ભટ્ટાત્મજનીલકણ્ઠાય

ઇયમપિ મયિ વિહિતાસ્થા માતૃવચઃશ્રવણકલુષિતા ક્વ ગતા ।
ત્યક્ત્વાભરણં સર્વં પ્રવિજૃમ્ભિતમન્યુસંવેગા

ઉત્સૃષ્ટાલઙ્કરણાં પરિશેષિતમાતૃમુક્તપરિવારામ્ ।
સંતર્પયામિ સમ્પ્રતિ સર્વસ્વેનાપિ હરિણાક્ષીમ્

ગેહેન કિં પ્રયોજનમન્યૈરપિ બન્ધુદારપરિવારૈઃ ।
સંસારગ્રહકારણમેકા ખલુ માલતી મમ હિ

અમૃતકરાવયવૈરિવ ઘટિતા સા દૃઢતરં પરિષ્વક્તા ।
ચેતો નયતિ સમત્વં બ્રહ્મણ આનન્દરૂપસ્ય

આવિર્ભવદાત્મભવક્ષોભક્ષતધીરતા ઘનં રભસાત્ ।
વિગલિતકુચયુગલાવૃતિરાલિઙ્ગતિ માલતી ધન્યમ્

નિર્દયતરોષ્ઠખણ્ડનસવ્યથહુઙ્કારમૂર્છિતં સુરતે ।
અહહેતિ વચસ્તસ્યા અપુણ્યભાજો ન શૃણ્વન્તિ

સ્મૃતિજન્મજનિતવિકૃતિવ્રતતિચ્છન્નં કરોતિ સંસારમ્ ।
આવિદ્ધસુરતસઙ્ગરવિમર્દસંક્ષોભિતા દયિતા

ગાઢતરાશ્લિષ્ટવપુર્ભજતે કાન્તા પ્રમોદસમ્મોહમ્ ।
શિથિલીકૃતા તુ કિં ચિદ્વિવિધવિકારં સમુચ્છ્વસિતિ

સન્ત્યન્યા અપિ સત્યં પુરુષોચિતકર્મપણ્ડિતાઃ પ્રમદાઃ ।
સૃષ્ટા તુ તયા નિયતં વિપરીતરતિક્રિયાગોષ્ઠી

તન્ત્રીવાદ્યવિશેષાનુદ્દામાનન્યજન્મનસ્તસ્યાઃ ।
કુહરિતરેચિતકમ્પિતસમ્પાદનનૈપુણં કરોતિ જડાન્

લલિતાઙ્ગહારજૃમ્ભિતવલિતસ્મિતવેપનાનિ માલત્યાઃ ।
પશ્યઞ્જહાતિ કામઃ રતિમોહનચેષ્ટિતેષુ બહુમાનમ્

ન ગ્રામ્યં પરિહસિતં નાવિભ્રમતરલિતો ઽક્ષિવિક્ષેપઃ ।
સુરતોદ્યોગનિરોધો દોહદદાનં ન પુષ્પબાણસ્ય

નાર્થપરો લપનરસો ન પરાશયવેદને ઽવિચક્ષણતા ।
નાસૌષ્ઠવં પ્રસઙ્ગેનોલ્વણગુણકીર્તનેષુ ભારત્યાઃ

નાપરપુરુષશ્લાઘા ન ત્યાગઃ કાલદેશવેશસ્ય ।
વૈદગ્ધ્યજન્મભૂમેર્ગુરુજઘનભરેણ મન્દયાતાયાઃ