કુટ્ટનીમત · શ્લોક 541-560

પુંસ્ત્વખ્યાપનકામો ન સ્ત્રી ન પુમાન્ કિલ પ્રભુસ્વામી ।
અનુબધ્નન્નુપહસિતસ્ત્વયા જડે સ્વાર્થયોગમનપેક્ષ્ય

વાજીકરણૈકમતિર્નરનાથાનુગ્રહેણ વિખ્યાતઃ ।
પ્રત્યાખ્યાતઃ સ તથા રવિદેવઃ કિઙ્કરત્વમાકાઙ્ક્ષન્

કિં કન્દર્પકુટુમ્બે જાતો ઽસાવુત વશીકરણયોગમ્ ।
જાનાતિ કમપિ સિદ્ધં યેનાકૃષ્ટાસિ સર્વભાવેન

બાલ્યે તાવદયોગ્યા પશ્ચાદપિ વૃદ્ધભાવપરિભૂતા ।
તારુણ્યે રાગહૃતા યદિ ગણિકા ભ્રમતુ તદ્ભિક્ષામ્

ઉપનય ભાણ્ડકમેતદ્યદર્જિતં મામકેન દેહેન ।
વિદધામિ તીર્થયાત્રામાસ્સ્વ સુખં પ્રેયસા સાર્ધમ્

આર્યજનનિન્દિતાનાં પાપૈકરસપ્રકાશનારીણામ્ ।
એતાવાનેવ ગુણો યદભીષ્ટસમાગમો નિરાવરણઃ

નો ધનલાભો લાભો લાભઃ ખલુ વલ્લભેન સંસર્ગઃ ।
અક્ષિગતાદર્થાપ્તિર્ન ભવતિ મનસઃ પ્રમોદાય

ગાઢાનુરાગભિન્નં તારુણ્યરસામૃતેન સંસિક્તમ્ ।
ન ભજતિ સહૃદયહૃદયં વિભવાર્જનસમ્ભવા ચિન્તા

લાભઃ સ એવ પરમઃ પર્યાપ્તં તેન તેન તૃપ્તાસ્મિ ।
વિનિવેશ્ય યદુત્સઙ્ગે નિક્ષિપતિ મુખે મુખેન તામ્બૂલમ્

સુરતશ્રમવારિકણાન્ પરિમાર્ષ્ટિ નિજાંશુકેન ગાત્રેષુ ।
યદુરસિ નિધાય વિહસંસ્તસ્ય ન મૂલ્યં વસુન્ધરા સકલા

શિથિલિતનિજદારરતિર્મયિ સક્તમના અનન્યકર્તવ્યઃ ।
યદસૌ જિતનલરૂપસ્તિરસ્કૃતં તેન ગાણિક્યમ્

બહુકુસુમરસાસ્વાદં કુર્વાણા મધુકરી વિધિનિયોગાત્ ।
ઈદૃક્પ્રસવવિશેષં લભતે ખલુ યેન ભવતિ કૃતકૃત્યા

અયિ સરલે તાવદિમા ઉપદેશગિરો વિશન્તિ કર્ણાન્તઃ ।
યાવન્નાન્તર્ભૂતં તચ્ચેતસિ મામકં ચેતઃ

શ્રીરસ્તુ દુર્ગતિર્વા વેશ્મનિ વાસો મહત્યરણ્યે વા ।
સ્વર્લોકે નરકે વા કિં બહુના તેન મે સાર્ધમ્

ઇદમાસ્તે ઽલઙ્કરણં દુર્જનનિ ગૃહાણ કિં મમૈતેન ।
તેનૈવ ભૂષિતાહં ગુણનિધિના ભટ્ટપુત્રેણ

ઉચિતસ્થાનનિયુક્તાન્યપનીય વિભૂષણાનિ સાવેગમ્ ।
એવમભિધાય યાસ્યસિ માતુઃ પુરતઃ સમુત્સૃજ્ય

ઇતિ રાગાન્ધઃ શ્રુત્વા ચેતસિ કુરુતે કદા ચિદેવમિદમ્ ।
સ્નેહાધિષ્ઠિતમનસામવિધેયં નાસ્તિ નારીણામ્

જનનીં જન્મસ્થાનં બાન્ધવલોકં વસૂનિ જીવં ચ ।
પુરુષવિશેષાસક્તાઃ સીમન્તિન્યસ્તૃણાય મન્યન્તે

રણશિરસિ હતે વજ્રે વજ્રોપમયન્ત્રનિર્ગતગ્રાવ્ણા ।
પ્રાણાન્મુમોચ દયિતા ન મન્ત્રવિધિના હૃતા નામ

કાલવશેનાયાસીત્પઞ્ચત્વં દાક્ષિણાત્યમણિકણ્ઠઃ ।
પ્રેમોપગતા વેશ્યા તેનૈવ સમં જગામ ભસ્મત્વમ્