કુટ્ટનીમત · શ્લોક 521-540

માલત્યા સહ કેલિં વિદધાસિ સખી મમેતિ ન વિરોધઃ ।
યત્તુ ચિરં સ્નિગ્ધદૃશા પશ્યસિ તાં તત્ર મે શઙ્કા

ત્વામાગતા ન વીક્ષિતુમનુબધ્ય ન યાચિતઃ પ્રયત્નેન ।
આહૂય વદ કિમર્થં તામ્બૂલં ગ્રાહિતા કમલદેવી

કઞ્ચુકમપકર્ષન્ત્યાઃ પ્રકટીભવદંસકક્ષકુચપાર્શ્વમ્ ।
સાભિનિવેશં દૃષ્ટં ભવતા કિં કુન્દમાલાયાઃ

પરિહાસેન ગૃહીતા યદ્યંશુકપલ્લવે ત્વયા હીરા ।
આચ્છોટ્યાપક્રાન્તા કિં મામવલોક્ય પૃષ્ઠતઃ સહસા

વિજ્ઞાનેન ખ્યાતાં કુસુમલતાં ત્વં તુ વર્ણયસ્યનિશમ્ ।
નૃત્યન્તીં મૃગદેવીં વિસ્ફારિતલોચનઃ પશ્યન્

કારણમત્ર ન વેદ્મ્યહમૃજુપન્થાનં પ્રસિદ્ધમુત્સૃજ્ય ।
વક્રેણ યદેષિ સદા માધવસેનાગૃહાગ્રેણ

ઇતિ સેર્ષ્યોપન્યાસૈરન્યૈશ્ચામર્મવેધિલઘુકોપૈઃ ।
પ્રણયપ્રભવૈર્વિદિતે ચ્છાતોદરિ રૂઢરાગત્વે

શ્રુતિવિશયે ઽન્તરિતતનુર્જનિતસ્થિતિરાયતાક્ષિ સહ માત્રા ।
પરુષગિરા ત્વં કુર્યા ઇત્થં મિથ્યાવચઃકલહમ્

અક્લેશોપનતધનઃ પ્રેમપ્રહ્વો નિરર્ગલત્યાગઃ ।
ભટ્ટાનન્દસ્ય સુતો નિધિભૂતો ઽભવ્યયા ત્વયા ત્યક્તઃ

વ્યસનોપહતવિવેકો દૈવૈકગતિઃ સ્વદારવિદ્વેષી ।
મામવિગણય્ય મૂઢે નિર્ભર્ત્સિત એવ કેશવસ્વામી

અગણિતરાજાપાયો ઽવિચ્છિન્નાયઃ સ્વભાવતસ્ત્યાગી ।
કિમુપેક્ષિતો ઽનુરક્તો વામધિયા શૌલ્કિકાધ્યક્ષઃ

પિતુરેક એવ પુત્રશ્ચતુર્થવયસો ગદાભિભૂતસ્ય ।
દ્રવિણવતઃ પ્રભુરાતો નિરાકૃતો ઽભૂતિકામયા સો ઽપિ

સ્વકરેણ પરિત્યક્તા ત્વયા વિભૂતિઃ કરોમિ કિં પાપા ।
સર્વભરેણોપનતં વસુદેવમનાદરેણ પશ્યન્ત્યા

પુરુષાન્તરસંઘર્ષપ્રોત્સાહિતચિત્તવૃત્તિરનપેક્ષમ્ ।
વસુ વિસૃજતિ યો રભસાત્તસ્ય ન વાર્તા ત્વયા પૃષ્ટા

ચિત્રાદિકલાકુશલઃ સ્મરશાસ્ત્રવિચક્ષણો વૃષપ્રકૃતિઃ ।
ઉપકુર્વન્નપિ સર્વો વિદ્વેષિગણે ત્વયા ક્ષિપ્તઃ

ચન્દ્રવતીમાભરણં દત્તં મધુસૂદનસ્ય પુત્રેણ ।
પશ્યન્તી બિભ્રાણામયિ રાગિણિ કિં ન જિહ્રેષિ

ગ્રામોત્પત્તિરશેષા પ્રવિશન્તી સિંહરાજવિનિયોગાત્ ।
મન્મથસેનાવાસં લઘયતિ તે રૂપસૌભાગ્યમ્

આસ્તામપરો લાભો હેડાવુકનન્દિસેનતનયેન ।
શિવદેવ્યા ઉપચારઃ ક્રિયતે યસ્તેન પર્યાપ્તમ્

પશ્યેદં ધવલગૃહં પાશુપતાચાર્યભાવશુદ્ધેન ।
કારિતમનઙ્ગદેવ્યા આભરણં પત્તનસ્ય સકલસ્ય

આપણિકાર્થસ્ય કુતો રાજા લભતે ચતુર્થમપિ ભાગમ્ ।
હટ્ટપતિરામસેનપ્રસાદતો નર્મદા તમુપભુઙ્ક્તે