કુટ્ટનીમત · શ્લોક 501-520

ગન્ધો ઽપિ કુતઃ પ્રેમ્ણઃ પરભૃતહારીતગૃહકપોતાનામ્ ।
ઉજ્જ્વલયન્ત્યસમેષું વિરુતવિશેષૈસ્તથાપિ તે યૂનામ્

આહિતયુક્તાહાર્યઃ સમ્યક્સકલપ્રયોગનિષ્પત્ત્યા ।
ભાવવિહીનો ઽપિ નટઃ સામાજિકચિત્તરઞ્જનં કુરુતે

યે ઽપિ ધનક્ષયદોષં પશ્યન્તિ જડા વિલાસિનીશ્લેષે ।
પ્રષ્ટવ્યાસ્તે ભવતા કિમકૃતકશિપુવ્યયા દારાઃ

ન ચ લાભ એક એવ પ્રવર્તને કારણં મનુષ્યેષુ ।
રાગાદયો ઽપિ સન્તિ વૈશિકશાસ્ત્રપ્રણેતૃભિઃ કથિતાઃ

કા વા વિભૂતિરાપ્તા સુન્દરસેનાત્તયા તપસ્વિન્યા ।
તદ્વિરહકુલિશભિન્ના મુમોચ યા જીવિતં ક્ષણાર્ધેન

ઉત્તમતરુણપ્રકૃતિઃ પુલકાદિકસૂચિતાન્યતનુસક્તિઃ ।
સ્ફુટસંનિહિતવિભાવો નિવાર્યતે કેન શૃઙ્ગારઃ

અન્તઃકરણવિકારં ગુરુપરિજનસંકટે ઽપિ કુલટાનામ્ ।
બુધ્યન્તિ તદભિયુક્તા ભ્રૂભઙ્ગાપાઙ્ગમધુરદૃષ્ટેન

અન્યા વિહાય પતિગૃહ મવિચિન્તિતકુલકલઙ્કજનગર્હાઃ ।
રાગોપરક્તહૃદયા યાન્તિ દિગન્તં મનુષ્ય આસજ્ય

અપમાનઃ પતિવિહિતો ગુરુપરિકરતીવ્રતા ગૃહે ઽપિ દૌર્ગત્યમ્ ।
શીલક્ષતયે યાસાં તાસામપિ રાગતો ઽન્યનરસક્તિઃ

યા અપ્યચલિતવૃત્તા ભર્તુઃ પરિચરણતત્પરાઃ પ્રમદાઃ ।
તા અપિ રાગવિમુક્તાસ્તિષ્ઠન્ત્યૌચિત્યમાત્રેણ

તસ્માદસ્ત્વભિગમનં વિવિધનિમિત્તં નિવાર્યતે કેન ।
નિજપરપણ્યસ્ત્રીણાં રાગાધીનં તુ હૃદયનિર્વહણમ્

એવંવિધદૃષ્ટાન્તૈરુપપત્તિયુતૈસ્તથેદૃશૈર્વાક્યૈઃ ।
અન્યૈરપિ ચાટુપદૈરાવર્જિતમાનસં ગમ્યમ્

વિહિતસ્વાપવિબોધં કિઞ્ચિત્પ્રકટીકૃતશ્રમગ્લાન્યા ।
ઉત્પાદિતજૃમ્ભિકયા પરિરભ્ય ઘનં નિશાપગમે

વિઘટિતપુટમુદ્રદૃશા વિલોક્ય કકુભઃ સદીર્ઘનિઃશ્વાસમ્ ।
વક્તવ્યમિતિ ભવત્યા રજનિ ખલે કિં પ્રયાતાસિ

અબલા વિષહેત કથં દૃઢશક્તિમનુષ્યરતિરસપ્રસરમ્ ।
મદનજનિતો ઽનુરાગો ન વિદધ્યાદ્યદિ બલાધાનમ્

ધન્યા ચક્રાહ્વવધૂઃ પ્રિયતમસંઘટનસમયસમ્પ્રાપ્ત્યા ।
શશિના વિયુજ્યમાના કુમુદ્વતિ ક્ષીણપુણ્યાસિ

વિકસિતસુરભિમનોહરસંસ્થાનં સરસકુસુમમપ્રાપ્તમ્ ।
ન કરોતિ તથા પીડામાસ્વાદિતવિચ્યુતં યથા ભૃઙ્ગ્યાઃ

વિજ્ઞાપયામ્યતસ્ત્વાં રચિતાઞ્જલિમૌલિના વિધાય નતિમ્ ।
પરિચારકજનમધ્યે ગણનીયાહં પ્રસાદેન

અથ દીપિતરાગાઙ્ગૈરપહસ્તિતલાભદિક્ક્રમોપચિતૈઃ ।
મૃદુભિશ્ચિત્તાનુગતૈરુપચારૈઃ પાતિતસ્ય વિશ્વાસે

અવલોકિતો ઽસિ લમ્પટ કિમપિ વદન્ કર્ણસંનિધૌ નિભૃતમ્ ।
શઙ્કરસેનાધાત્ર્યા અદ્ય મયા જાલમાર્ગેણ