કુટ્ટનીમત · શ્લોક 481-500

ગત્વાથ તમુદ્દેશં યસ્મિન્ સા પઞ્ચભાવમાપન્ના ।
વિલલાપ મુક્તનાદં વિલુઠન્ ભુવિ સહચરેણ ધૃતમૂર્તિઃ

એતે વયં નિવૃત્તા મુઞ્ચ રુષં દેહિ કોપને વાચમ્ ।
ઉત્તિષ્ઠ કિમિતિ તિષ્ઠસિ ભૂમિતલે રેણુરૂષિતશરીરા

વિનિમીલ્ય દૃશૌ કસ્માદપ્રતિપત્ત્યા સ્થિતાસિ શુભવદને ।
ત્વદવારિતગમનવિધેરપરાધિતયા ન મે યોગઃ

નાકાધિપતિપુરન્ધ્રીરભિભવિતું ત્વયિ દિવં પ્રયાતાયામ્ ।
સત્સ્વપિ શરેષુ પઞ્ચસુ નિરાયુધઃ સામ્પ્રતં મદનઃ

વઞ્ચકવૃત્તા વેશ્યા ઇત્યપવાદો જનેષુ યો રૂઢઃ ।
અપનીતો ઽસૌ નિપુણં ત્વયા પ્રિયે જીવમોક્ષેણ

વન્દ્યઃ સદ્વ્રત એકસ્ત્રિપુરાન્તકનન્દનો મહાસેનઃ ।
હૃદયં યસ્ય સ્પૃષ્ટં ન મનાગપિ વામલોચનાપ્રેમ્ણા

મન્યે ઽભીષ્ટવિયોગં નિમેષમપિ દુઃસહં સમવધાર્ય ।
હરિણા વક્ષસિ લક્ષ્મીર્વિધૃતા ગૌરી હરેણ દેહાર્ધે

અયિ લોકપાલ સા ભુવિ લલામભૂતા તયા વિના શૂન્યમ્ ।
વિશ્વમિતિ કિં ન ચિન્તિતમાત્મસ્થાનં પ્રિયાં નયતા

ભગવન્ હુતવહ મા મા લાવણ્યસમુદ્રસારમુદ્ધૃત્ય ।
કથમપિ વિહિતાં ધાત્રા ધક્ષ્યસ્યેનાં જગદ્ભૂષામ્

ઇતિ વિલપન્તં બહુવિધમવધીર્ય સુહૃત્ પુરન્દરસ્ય સુતમ્ ।
કાષ્ઠૈર્વિરચય્ય ચિતાં તામકરોદગ્નિસાદ્ગણિકામ્

તસ્મિન્નિદ્ધહુતાશનવિનિપતને કૃતમતૌ શુચાકુલિતે ।
મનસિ સ્ફુરિતામાર્યાં પપાઠ કશ્ચિત્પ્રસઙ્ગેન

અનુમરણે વ્યવસાયં સ્ત્રીધર્મે કઃ કરોતિ સવિવેકઃ ।
સંસારમુક્ત્યુપાયં દણ્ડગ્રહણં વ્રતં મુક્ત્વા

શ્રુત્વા સુન્દરસેનઃ સચિવમવોચદ્વ્યપેતવૈક્લવ્યઃ ।
પ્રતિબોધિતં મનો મે ધીરેણાનેન યુક્તમુપદિશતા

ક્ષણદૃષ્ટનષ્ટવલ્લભજન્મજરાવ્યાધિમરણપરિભૂતે ।
આવર્તિનિ સંસારે કઃ કુર્યાદાગ્રહં સુમતિઃ

યાતુ ભવાન્ કુસુમપુરં વયમપ્યન્ત્યાશ્રમે સમાશ્રયણમ્ ।
અઙ્ગીકુર્મો ઽવિદ્યાપ્રહાણસંસિદ્ધયે વિહિતમ્

સો ઽવદદભિજાતજનો બાલ્યાત્પ્રભૃતિ ત્વયા ચ ન વિયુક્તઃ ।
સંન્યસનબુદ્ધિમધુના કથમુજ્ઝતિ વિષયનિઃસ્પૃહં સુહૃદમ્

એવમિતિ સો ઽભિધાય સ્થિરયતિનિયમૈસ્તપોધનૈર્જુષ્ટમ્ ।
ગુણપાલિતેન સહિતઃ સુન્દરસેનો જગામ વનમ્

એવં ભવન્તુ વેશ્યાઃ સ્વાર્થૈકદૃશો વ્યપેતસદ્ભાવાઃ ।
અભિલષિતવિષયસિદ્ધેઃ કા હાનિસ્તદપિ યુષ્માકમ્

રમણહૃદયાનુવર્તનચતુરચતુઃષષ્ટિકર્મકુશલાનામ્ ।
ન સ્પૃશતિ તત્ત્વચર્ચા પણ્યવધૂનાં વિદગ્ધચેતાંસિ

વલિતપ્લુતચિત્રગતિસ્થિતિવેગૈશ્ચોદનાનુવૃત્ત્યા ચ ।
રાગસ્પર્શેન વિના વિશતિ મનઃ સાદિનાં તુરગઃ