કુટ્ટનીમત · શ્લોક 461-480

યૌવનચાપલમેતદ્યન્માદૃશિ ભવતિ કૌતુકં ભવતામ્ ।
યત્તુ સુખમનવગીતં તસ્ય સ્થાનં નિજા દારાઃ

તે મધુરાઃ પરિહાસાસ્તા વક્રગિરઃ સ વામતાસમયઃ ।
નો હૃદયે કર્તવ્યા રહસિ ક્ષેમાર્થિના ભવતા

લાઘવતો યન્મનસઃ પ્રણયાદ્વા યત્તવાચરિતમ્ ।
પ્રતિકૂલં તત્ર મયા નાથાઞ્જલિરેષ વિરચિતો મૂર્ધ્નિ

દુઃસંચારા માર્ગા દૂરે વસતિર્વિસંષ્ઠુલં હૃદયમ્ ।
ગુણપાલિત તવ સુહૃદા ભવિતવ્યમતો ઽપ્રમત્તેન

હૃદયદ્વય એકત્વં યાતે યૂનોર્વિયોગજં ક્લેશમ્ ।
અનુભવતોરપરેણ પ્રસઙ્ગતઃ પઠ્યતે પથ્યા

અન્યોન્યસુદૃઢચેષ્ટિતસદ્ભાવસ્નેહપાશબદ્ધાનામ્ ।
વિચ્છેદકરો મૃત્યુર્ધીરાણાં વા પરિચ્છેદઃ

અથ તચ્છ્રવણાનન્તરમાસ્સ્વ સુખં દયિતિકે વ્રજામીતિ ।
અભિધાય યાતિ મન્દં સુન્દરસેને વિવર્તિતગ્રીવમ્

વટશાખાલમ્બિભુજાં શ્વસિતોષ્ણસમીરશુષ્યદધરમુખીમ્ ।
પર્યસ્તાં બિભ્રાણાં તન્માર્ગવિલોકનાનિમેશદૃશમ્

દોલાયમાનવેણીં તિર્યગ્ગતકણ્ઠભૂષણવિશેષામ્ ।
ગલદશ્રુવારિપૂર્ણાં પતિતાંશુકભાગનિઃસહાઙ્ગલતામ્

રુન્ધાનામિવ હૃદયં સ્ફુટદિતરકરેણ કુચયુગાશ્રયિણા ।
પરિશેષિતાં વિલાસૈરુત્સૃષ્ટાં જીવલોકકર્તવ્યૈઃ

અઙ્ગીકૃતાં વિપત્ત્યા વશીકૃતાં મર્મઘટ્ટનૈર્વિષમૈઃ ।
હારલતામપરિસ્ફુટમન્તઃપરિકૃષ્યમાણભારત્યા

મા મા તાવદ્યાત ક્ષણમેકં યાવદેષ નિષ્કરુણઃ ।
વનગુલ્મૈર્ન તિરોહિત ઇત્યભિદધતીં જહુઃ પ્રાણાઃ

અથ પશ્ચાત્સમુપેતં પપ્રચ્છ પુરન્દરાત્મજઃ પથિકમ્ ।
દૃષ્ટા શોકવ્યથિતા નિવર્તમાનાઙ્ગના ભવતા

સ ઉવાચ વટતરોરધ ઉર્વ્યાં પતિતા વિનિશ્ચલાવયવા ।
તિષ્ઠતિ વનિતા નાન્યા નયનાવસરં ગતાસ્માકમ્

ઇતિ તદ્વચનાશ્મહતો વિહ્વલમૂર્તિઃ પપાત ભૂપૃષ્ઠે ।
ઉત્થાપિતશ્ચ સુહૃદા સો ઽભિદધે તેન શોકદીનેન

ભવતુ કૃતાર્થસ્તાતસ્ત્વમપિ સુમિત્રાસ્સ્વ સામ્પ્રતં પ્રીતઃ ।
સમકાલમેવ મુક્તા પાપેન મયાસુભિશ્ચ હારલતા

હા હા હાવ હતો ઽસિ ધ્વસ્તા લીલા વિલાસ કિં કુરુષે ।
ઉચ્ચ્છિન્ના વિચ્છિત્તિર્ભ્રમ વિભ્રમ દશ દિશો નિરાધારઃ

કિલકિઞ્ચિત ગચ્છ વનં મોટ્ટાયિતમશરણત્વમુપયાતમ્ ।
કુટ્ટમિત પ્રવ્રજ્યાં ગૃહાણ બિબ્બોક વિશ ભુવો વિવરમ્

લલિતમનાથીભૂતં વિહૃતસ્ય ન વિદ્યતે ગતિઃ ક્વાપિ ।
શશધરબિમ્બદ્યુતિમુષિ યાતાયામન્તકાન્તિકં તસ્યામ્

વિનિવૃત્ત્ય યામિ દગ્ધું મદ્વિરહે મુક્તવલ્લભપ્રાણામ્ ।
ભવતુ વરાક્યાસ્તસ્યાઃ સપ્તાર્ચિર્દાનમાત્રમુપકારઃ