કુટ્ટનીમત · શ્લોક 441-460

નિર્વિણ્ણે નિર્વિણ્ણા મુદિતે મુદિતા સમાકુલાકુલિતે ।
પ્રતિબિમ્બસમા કાન્તા સંક્રુદ્ધે કેવલં ભીતા

યાવદ્વાઞ્છિતસુરતવ્યાયામસહાવિરુદ્ધસંભાષા ।
ચિત્તાનુવૃત્તિકુશલા પુણ્યવતામેવ જાયતે જાયા

સદ્ભાવપ્રેમરસં વલયાવલિશબ્દશઙ્કિતા નિભૃતમ્ ।
વિદધાનાઙ્ગસમર્પણમુન્મીલિતકુસુમસાયકાકૂતા

હા હા કિમુદ્ધતત્વં શ્રોષ્યતિ કશ્ચિદ્ગતત્રપ સ્વૈરમ્ ।
નિકટે પરિવારજનો વિસ્મૃત એવ સ્મરાતુરસ્ય તવ

ઇતિ હુઙ્કૃતિસંવલિતૈરાયાસનિવેદિતાર્થપદવાક્યૈઃ ।
દ્વિગુણીકરોતિ કુલજા નાયકકર્માણિ મોહનપ્રસરે

ઇત્થમુદીરિતવાચં સુહૃદમવોચત્પુરન્દરસ્ય સુતઃ ।
સમુપસ્થિતજીવસમાવિયોગભયકમ્પિતો વચનમ્

તાતાદેશે ઽલઙ્ઘ્યે હારલતાવિરહપાવકે તીવ્રે ।
વિધિવશવર્તિનિ મરણે નો વિદ્મઃ કાર્યપરિણામમ્

અનપેક્ષિતધનલાભાં સ્નેહૈકનિબદ્ધમાનસાં દયિતામ્ ।
દૈવાકૃષ્ટો મુઞ્ચતિ ઘટિતો વા લોહવજ્રકણિકાભિઃ

અથ કૃતગમનવિનિશ્ચિતિરભિમતરામાં ચકાર વિદિતાર્થામ્ ।
સાપિ તમનુવવ્રાજ પ્રસ્તુતયાત્રં શુચાકુલિતા

આસાદ્ય વટસ્ય તલં બાષ્પપયઃકણચિતાક્ષિપક્ષ્માગ્રામ્ ।
વિઘ્નિતચરણવિહારો હારલતામભિદધાતિ સ્મ

આ ક્ષીરવતો વૃક્ષાદા સલિલાદ્વા પ્રિયે પ્રિયં યાન્તમ્ ।
અનુયાયાદિતિ વચનં તેન ત્વમિતો નિવર્તસ્વ

કિં કુર્મો દૈવહતાઃ પ્રભવતિ યસ્મિન્ કૃશોદરિ પ્રસભમ્ ।
પ્રેમગ્રન્થિચ્છેત્તા ગુરુશાસનસાયકો નિરાવરણઃ

ન દ્રવિણચયપ્રાપ્તિર્નૈકાશ્રયપરિચયો ન ચાટુગુણઃ ।
ન સ્વામિસમાદેશો નાકારવિલોભનં ન ચ ખ્યાતિઃ

હેતુસ્તવ પ્રવૃત્તેરસ્માસુ તથાપિ દૈવવશાત્ ।
ઈદૃક્કો ઽપ્યનુબન્ધો યસ્ય વિપાકો ઽપ્રતીકારઃ

પરુષં યદભિહિતાસિ પ્રણયરુષા શઙ્કિતં ચ નર્મણિ વા ।
સુદતિ ન તત્સ્મરણીયં દુર્ભાષણકીર્તનોદ્ઘાતે

તવ હૃદયે હૃદયમિદં વિન્યસ્તં ન્યાસપાલનં કષ્ટમ્ ।
યત્નાત્તથા વિધેયં સ્થાનભ્રંશો યથા ન સ્યાત્

અથ વિરતવચોદયિતં બાષ્પભરક્લિષ્ટવર્ણપદયોગાત્ ।
ઇતિ કથમપિ હારલતા સંમૂર્છિતવસ્તુભારતીમૂચે

અવિશુદ્ધકુલોત્પન્ના દેહાર્પણજીવિકા શઠાચરણા ।
ક્વાહં રૂપાજીવા ક્વ ભવન્તઃ શ્લાઘનીયજન્મગુણાઃ

યત્તુ વિષયાવલોકનકુતૂહલાભ્યાગતેન વિશ્રાન્તમ્ ।
ઇયતો દિવસાનસ્મિન્ તન્મે પરજન્મકૃતશુભસ્ય ફલમ્

ગુરુસેવાં બન્ધુજનં સ્વદેશવસતિં કલત્રમનુકૂલમ્ ।
અનુષઙ્ગદૃષ્ટપરિચિત આસ્થાં પ્રવિધાય કઃ પરિત્યજતિ