કુટ્ટનીમત · શ્લોક 421-440

શુશ્રૂષણમેવ ગુરોઃ પરિશીલિતમચલચેતસા સતતમ્ ।
કુટિલમતયો ભુજિષ્યાઃ કથં ત્વયારાધિતા નિપુણમ્

આમ્નાયપાઠ એવ સ્ફુટતરપદસૌષ્ઠવં તવ ખ્યાતમ્ ।
પ્રકુપિતવેશ્યાનુનયે ક્વ શિક્ષિતં વચનચાતુર્યમ્

અથવા કિં ક્રિયતે ઽસ્મિન્નવદાતકુલે ઽપિ લબ્ધજન્માનઃ ।
સદસંસ્તુતા ભવન્તિ પ્રાગુપચિતકર્મદોષેણ

ત્વયિ વિનિવેશ્ય કુટુમ્બં પરલોકહિતાર્જનૈકનિહિતાત્મા ।
સ્થાસ્યામીતિ સમીહિતમનુદિવસં તદ્વિસંવદિતમ્

ઇત્યવધૃતલેખાર્થે સુન્દરસેને વિધેયસમ્મૂઢે ।
આર્યામગાયદન્યઃ સ્વાવસરે ગીતિપરિકરિતામ્

વિષયતિમિરાવૃતાક્ષ્ણામવટે પતતામદૃષ્ટમાર્ગાણામ્ ।
પુંસાં ગુરુજનવચનદ્રવ્યશલાકાઞ્જનં શરણમ્

ઉદ્વેજયતિ તદાત્વે સુખસમ્પત્તિં કરોતિ પરિણામે ।
કટુકૌષધપ્રયોગો ગુરુનિગદિતકાર્યનિષ્ઠુરં ચ વચઃ

લબ્ધ્વાથ વચોવસરં મિત્રમવાદીત્પુરન્દરાપત્યમ્ ।
પુનરપિ ન હિ ખિદ્યન્તે પ્રિયજનહિતભાષણે સન્તઃ

અગણિતસહચરવચસો દુર્વ્યસનમહાબ્ધિમગ્નવપુષસ્તે ।
મન્યુવ્યથિતસ્ય પિતુર્યદિ પરમવલમ્બનં વચનમ્

નિજવંશદીપભૂતઃ કૃતચરિતાલઙ્કૃતો મહાસત્ત્વઃ ।
સુન્દર સમ્પ્રતિ તાતઃ સ્પૃષ્ટો દુષ્પુત્રદોષેણ

પુત્રાભાવઃ શ્રેયાન્ દુઃસુતતા પુત્રિણઃ કુલીનસ્ય ।
અન્તસ્તાપયતિ ભૃશં સચ્ચરિતકથાપ્રસઙ્ગેષુ

સાંવ્યવહારિક એવ પ્રાયો લોકે ગુણોન્નતા નિયતાઃ ।
યેન તુ સુતેન જનની વન્ધ્યાત્વં શ્લાઘતે સ પાપીયાન્

વિફલં શાસ્ત્રજ્ઞાનં ગુરુગૃહસેવાપિ નોપકારાય ।
વિષયવશીકૃતમનસો ન્યાય્યં પન્થાનમુત્સૃજતઃ

જીવન્નેવ મૃતો ઽસૌ યસ્ય જનો વીક્ષ્ય વદનમન્યોન્યમ્ ।
કૃતમુખભઙ્ગો દૂરાત્કરોતિ નિર્દેશમઙ્ગુલ્યા

નો પરિહર્તું વિષયાઃ શક્યાઃ સત્યં તથાપિ નિપુણધિયઃ ।
અભિધેયતાં ન ગચ્છન્ત્યપવાદવિશેષિતાભિધાનસ્ય

ગુરુપરિચર્યા જાયા કુલોદ્ગતા સ્નિગ્ધબન્ધુસમ્પર્કઃ ।
બ્રાહ્મે કર્મણિ સક્તિર્લોકદ્વયસાધનં સુધિયામ્

સુલભા તસ્ય વિભૂતિસ્તસ્ય ગુણા યાન્તિ જગતિ વિસ્તારમ્ ।
બહુ મનુતે તં સુજનસ્તસ્મૈ સ્પૃહયન્તિ બાન્ધવાઃ સતતમ્

નાસાદયતિ સ એકઃ સત્સેવિતમાર્ગતઃ પરિસ્ખલનમ્ ।
મણ્ડયતિ સો ઽન્વવાયં સ નિવાસઃ શર્મણામશેષાણામ્

સ ભવતિ વિનયાધારો યુક્તાયુક્તે વિવેકિતા તસ્ય ।
વૃદ્ધોપદેશવાચઃ શ્રવણોદરતર્પણં સદા યસ્ય

પ્રાક્તનકર્મવિપાકઃ ક્ષુદ્રાસુ શરીરિણાં યદાસક્તિઃ ।
આયતનં તુ સુખાનાં સંસારભુવાં કુલોદ્ગતા રામા