કુટ્ટનીમત · શ્લોક 401-420

પ્રિયસખિ લોકસમક્ષં નગરપ્રભુણા હઠેન નીતાસ્મિ ।
એવં બન્ધકદાતુર્દ્વિગુણાર્થપ્રાર્થને કુતો ઽન્યાયઃ

આકર્ષન્તી જઘનં વ્રજસિ યથા વિક્ષતા નખૈસ્તિલશઃ ।
મન્યે તથોપભુક્તા ત્વં કેરલિ દાક્ષિણાત્યેન

અધરે બિન્દુઃ કણ્ઠે મણિમાલા કુચયુગે શશપ્લુતકમ્ ।
તવ સૂચયન્તિ કેતકિ કુસુમાયુધશાસ્ત્રપણ્ડિતં રમણમ્

ઇતિ શૃણ્વન્નુષસિ ગિરો નિર્વૃત્તનિશાભિયોગગણિકાનામ્ ।
સો ઽપિ યથાક્રિયમાણં પ્રવિધાતું નિર્જગામ કર્તવ્યમ્

સુરચિતરાગોપચિતિસ્વીકૃતમનસસ્તયા સમં તસ્ય ।
યૌવનસુખમનુભવતો જગામ સંવત્સરઃ સાર્ધઃ

વિશ્રમ્ભકથાઃ કુર્વન્વિચરન્નુદ્યાનવેદિકાપૃષ્ઠે ।
સહચરકરસક્તકરઃ સુન્દરસેનઃ કદા ચિત્તુ

સ્થૂલઘનતન્તુસન્તતિતાનિતનાનામ્બરાવરણમ્ ।
યષ્ટિપ્રાન્તનિયન્ત્રિતદલવીટકકુતપતુમ્બકપ્રાયમ્

ત્રુટિતચરણત્રસંગતવિસ્ફુટિતાભ્યક્તપાદમલિનતનુમ્ ।
ત્વરિતગતિલેખવાહકમારાદાયાન્તમદ્રાક્ષીત્

પ્રત્યાસન્નીભૂતં ક્રમેણ પૌરન્દરિઃ પરિજ્ઞાય ।
સાકૂતમના ઊચે વયસ્ય હનુમાનયં પ્રાપ્તઃ

અવનિતલલીનશિરસા કૃતનતિના તેન વિનિહિતં ભૂમૌ ।
ઉત્ક્ષિપ્ય ઝટિતિ લેખં સુન્દર ઇતિ વાચયામાસ

સ્વસ્તિ શ્રીકુસુમપુરાત્પુરન્દરઃ સુન્દરં સમભિધત્તે ।
અન્તર્જૃમ્ભિતશોકગ્રસ્તો ઽવિસ્પષ્ટવર્ણપદમ્

કુલમકલઙ્કં ન ગણિતમવધીરિતમગ્રજન્મનામુચિતમ્ ।
નાપેક્ષિતમવગીતં શઠસેવિતવર્ત્મનિ ત્વયા પતતા

વંશે ઽકુટિલગતીનાં દ્વિજિહ્વતાદોષરહિતચરિતાનામ્ ।
અપરવિનાશરતાનામુત્પન્નઃ કથમસિ ભુજઙ્ગઃ

ક્વ પુરોડાશપવિત્રિતવેદપદોદ્ગારગર્ભવદનં તે ।
ક્વ ચ મદિરાસવવાસિતવારવધૂમુખરસાસ્વાદઃ

ક્વ કુશવિપાટનજન્મા સહસોદિતવેદનાચમત્કારઃ ।
ક્વ ચ દાસીરતસઙ્ગરનિર્દયનખરક્ષતિઃ પ્રીત્યૈ

ક્વ ત્રેતાનલધૂમક્ષોભિતનયનામ્બુધૌતવદનત્વમ્ ।
ક્વ ચ ગણિકાનિર્ભર્ત્સનશોકભરાયાતબાષ્પસલિલૌઘઃ

ક્વ વષટ્કારધ્વાનઃ ષટ્કર્મવિભૂષણં શ્રવણપૂરઃ ।
ક્વ ચ સાધારણવનિતારતિમણિતાકર્ણનૌત્સુક્યમ્

ક્વાચાર્યપ્રતનુલતાતાડનસંક્ષોભસમ્ભવઃ કમ્પઃ ।
ક્વ ચ કુપિતવારલલનાનિષ્ઠુરપાદપ્રહારવિષહિત્વમ્

ક્વ હરિણચર્માવરણં સ્મૃતિશાસ્ત્રનિવેદિતં વ્રતં ચરતઃ ।
ક્વ ચ પણ્યસ્ત્રીગાત્રસ્પૃષ્ટામ્બરધારણેષુ બહુમાનઃ

સમિધામેવ ચ્છેદનમભ્યસ્તં શૈશવાત્સમારભ્ય ।
શઠવનિતાધરખણ્ડન ઉત્પન્નં કૌશલં કુતો ભવતઃ