કુટ્ટનીમત · શ્લોક 21-40

પેશલવચસાં વસતિર્લીલાનામાલયઃ સ્થિતિઃ પ્રેમ્નઃ ।
ભૂમિઃ પરિહાસાનામાવસથો વક્રકથિતાનામ્

સા શુશ્રાવ કદા ચિદ્ધવલાલયપૃષ્ઠદેશમધિરૂઢા ।
કેનાપિ ગીયમાનાં પ્રસઙ્ગપતિતામિમામાર્યામ્

યૌવનસૌન્દર્યમદં દૂરેણાપાસ્ય વારવનિતાભિઃ ।
યત્નેન વેદિતવ્યાઃ કામુકહૃદયાર્જનોપાયાઃ

શ્રુત્વાથ વિપુલજઘના મનસીદં માલતી ચકાર ચિરમ્ ।
અતિસામ્પ્રતમુપદિષ્ટં સુહૃદેવાનેન સાધુના પઠતા

તદ્ગત્વા પૃચ્છામો વિકરાલાં કલિતસકલસંસારામ્ ।
યસ્યાઃ કામિજનૌઘો દિવાનિશં દ્વારદેશમધ્યાસ્તે

ઇતિ મનસિ સા નિવેશ્ય દ્રુતતરમવતીર્ય વેશ્મનઃ શિખરાત્ ।
વિકરાલાભવનવરં પરિજનપરિવારિતા પ્રયયૌ

અથ વિરલોન્નતદશનાં નિમ્નહનું સ્થૂલચિપિટનાસાગ્રામ્ ।
ઉલ્બણચૂચુકલક્ષિતશુષ્કકુચસ્થાનશિથિલકૃત્તિતનુમ્

ગમ્ભીરારક્તદૃશં નિર્ભૂષણલમ્બકર્ણપાલીં ચ ।
કતિપયપાણ્ડુરચિકુરાં પ્રકટશિરાસંતતાયતગ્રીવામ્

સિતધૌતવસનયુગલાં વિવિધૌષધિમણિસનાથગલસૂત્રામ્ ।
તન્વીમઙ્ગુલિમૂલે તપનીયમયીં ચ વાલિકાં દધતીમ્

ગણિકાગણપરિકરિતાં કામિજનોપાયનપ્રસક્તદૃશમ્ ।
આસન્દ્યામાસીનાં વિલોકયામાસ વિકરાલામ્

અવલોક્ય સા વિધાય ક્ષિતિમણ્ડલલીનમૌલિના પ્રણતિમ્ ।
પરિપૃષ્ટકુશલવાર્તા સમનુજ્ઞાતાસનં ભેજે

અથ વિરચિતહસ્તપુટા સપ્રશ્રયમાસનં સમુત્સૃજ્ય ।
ઇદમૂચે વિકરાલામવસરમાસાદ્ય માલતી વચનમ્

વિદધાસિ હરિમકૌસ્તુભમહરિં રવિમગજનાથમમરેન્દ્રમ્ ।
અદ્રવિણં દ્રવિણપતિં નિયતં મતિગોચરે પતિતમ્

અયમેવ બુદ્ધિવિભવં હૃતવિભવસ્તે પટચ્ચરાવરણઃ ।
કામુકલોકઃ કથયતિ સત્ત્રાગારેષુ ભુઞ્જાનઃ

ઉપસંહૃતાન્યકર્મા ધનવર્મા નર્મદાઙ્ઘ્રિયુગલસ્ય ।
સકલસમર્પિતસમ્પદ્યદુપેતઃ પાદપીઠત્વમ્

યદુપનતો નયદત્તઃ સાગરદત્તસ્ય મધ્યમઃ પુત્રઃ ।
પ્રીણયતિ મદનસેનાં વિધાય પિતૃમન્દિરં રિક્તમ્

યલ્લીલાર્પિતચરણૌ મઞ્જર્યા ભટ્ટપુત્રનરસિંહઃ ।
પરિતોષં વ્રજતિ પરં મૃદુ મૃદ્નન્ પાણિયુગલેન

યન્નિઃશેષિતવિભવો દીક્ષિતભવદેવપુત્રશુભદેવઃ ।
નિર્ભર્ત્સિતો ઽપિ નોજ્ઝતિ કેસરસેનાગૃહદ્વારમ્

અન્યા અપિ કામિજનં સાધારણયોષિતો યદાક્રમ્ય ।
વિદધતિ કર્પટશેષં વિલસિતમેતત્તવોપદેશાનામ્

હીનાન્વયજન્માનો ગુણહીના રોગિણો નિરાકૃતયઃ ।
ઉપસેવિતા મયાપિ પ્રકટીકૃતરાગસૌષ્ઠવં પુરુષાઃ