કુટ્ટનીમત · શ્લોક 381-400

પ્રારમ્ભ એવ તાવત્પ્રજ્વલિતો ધગિતિ મનસિજો યસ્મિન્ ।
તસ્ય વિશેષાવસ્થા વક્તુમશક્યાઃ પ્રવૃદ્ધસ્ય

સહજરસેન જડીકૃતમિતિ યૂનોઃ કામશાસ્ત્રનિર્ણીતે ।
નાનાકરણગ્રામે માલિન્યમવાપ પાણ્ડિત્યમ્

અવિધેયમનાખ્યેયં પ્રવિચાર્યં છાદનીયમવિષહ્યમ્ ।
ન બભૂવ તયોસ્તસ્મિન્નાવિદ્ધારબ્ધસુરતસંમર્દે

અભ્યસ્તા યા તન્વ્યા સુરતવિધૌ વિવિધચાટુપરિપાટી ।
તામાલૂનવિશીર્ણાં ચકાર સહજઃ સ્મરાવેશઃ

સદ્ભાવરાગદીપિતમદનાચાર્યોપદિષ્ટચેષ્ટાનામ્ ।
કઃ પરિગણનં કર્તું રતિચક્રાવિષ્ટરમણયોઃ શક્તઃ

બાલા મૃદુગાત્રલતા દૃઢપુરુષાક્રાન્તવિગ્રહા ન પરમ્ ।
ન વ્યથિતા મુદમાપ પ્રભવતિ ખલુ ચિત્તજન્મનઃ શક્તિઃ

કિં રમણીં રમણો ઽવિશદુત રમણી રમણમિતિ ન જાનીમઃ ।
સ્વાવયવાવગમસ્તુ પ્રણાશમગમત્તયોસ્તદા નિપુણમ્

તસ્યા નિમીલિતદૃશો નિઃસ્પન્દતનોર્બભૂવ સુરતાન્તે ।
લિઙ્ગમનઙ્ગચ્છાયા જીવિતસત્તાનુમાનસ્ય

શ્રમજલબિન્દૂપચિતા વૃત્તસ્મરણેન જાતવૈલક્ષ્યા ।
સા શુશુભે રતિવિરતૌ પર્યાકુલકેશભૂષણા નિતરામ્

નિર્વ્યાજાર્પિતવપુષોર્નિર્વૃતિમયમેવ ગણયતોર્વિશ્વમ્ ।
ક્ષણદા વિરરામ તયોરક્ષીણાકાઙ્ક્ષયોરેવ

મોહનવિમર્દખિન્ના વિજૃમ્ભમાણા સ્ખલદ્ગતિર્મન્દમ્ ।
નિદ્રાકષાયિતાક્ષી હારલતા વાસવેશ્મનો નિરગાત્

પરિચિતપાર્શ્વગતાહં તેન સમં પાનભોજનં કૃત્વા ।
નીતા નિશા કથાભિર્મોહનકાર્યં તુ યત્કિં ચિત્

અવિદગ્ધઃ શ્રમકઠિનો દુર્લભયોષિદ્યુવા જડો વિપ્રઃ ।
અપમૃત્યુરપક્રાન્તઃ કામિવ્યાજેન મે રાત્રૌ

નેચ્છાવિરતિઃ ક્ષણમપિ ન ચ શક્તિર્વસ્તુશૂન્યરતિયત્નૈઃ ।
કેવલમલમદ્યાહં કદર્થિતા વૃદ્ધપુરુષેણ

મદ્યવશાદભિયોક્તરિ મૃતકલ્પે તલ્પભાગમગ્નાયાઃ ।
અનિરોધિતનિદ્રાયાઃ સુખેન મે યામિની યાતા

સુકુમારસમ્પ્રયોગઃ પેશલવચનઃ સવક્રપરિહાસઃ ।
શકુનવશેનોપનતો મમ સખિ રમણો મનોહરાકારઃ

પર્યઙ્કાન્તનિલીનઃ પરાઙ્મુખો મુક્તમન્દનિઃશ્વાસઃ ।
મચ્ચોદનયા સુતરાં નિષ્પન્દઃ સ્વેદસલિલસંસિક્તઃ

પર્યસ્તમિતાનઙ્ગો વ્યપગતનિદ્રઃ ક્ષપાક્ષયાકાઙ્ક્ષી ।
ગ્રામોષિતઃ પ્રહીણો નિષ્પ્રતિપત્તિઃ સ્થિતો ઽદ્ય સખિ મનુજઃ

શૃણુ સખિ કૌતુકમેકં ગ્રામીણકકામિના યદદ્ય કૃતમ્ ।
સુરતસુખમીલિતાક્ષી મૃતેતિ ભીતેન મુક્તાસ્મિ

અવિદિતદેશપ્રકૃતેઃ શઠાત્મકાદ્દુર્વિદગ્ધતો ઽસ્માભિઃ ।
અનુભૂતો રાજસુતાદપિ ભાણ્ડવિડમ્બનાક્લેશઃ