કુટ્ટનીમત · શ્લોક 361-380

શ્રીબલસુતપરિપાલિત ઊર્ણાયુઃ કિમનયા વિજેતવ્યઃ ।
મુકુલા મુક્તસુખસ્થિતિરહર્નિશં મેષપોષણે લગ્ના

આતામ્રતાં સમુપગતમુચ્છૂનં કરતલં તવ સુલલિતે ।
મા પુનરતિચિરમેવં પ્રવિધાસ્યસિ કન્દુકક્રીડામ્

અભિરામ ડોમ્બ ભાટી પ્રથમમિયં ગૃહ્યતે સમુત્પન્ને ।
સ્નેહે તુ કુસુમદેવ્યાસ્ત્વં પ્રભવસિ જીવિતસ્યાપિ

ગ્રહણકમર્પય તાવદ્યદિ કૌતુકમુપરિ ચન્દ્રસેનાયાઃ ।
નિર્વર્તિતકર્તવ્યો દાસ્યસિ કિં ચિદ્યથાભિમતમ્

ન પરમદાતા માતઃ સૂનુરસૌ નગરરોટભટ્ટસ્ય ।
નિર્લજ્જઃ શઠવૃત્તિઃ પુનઃ પુનર્વાર્યમાણો ઽપિ

ક્ષપયતિ વસનાનિ સદા હઠેન સકલાનિ સુરતસેનાયાઃ ।
ન દદાત્યેકામૂર્ણામુરણઃ પરમત્તિ કર્પાશમ્

ભગિનિ ન મુઞ્ચતિ વેશ્મ ક્ષણમપિ મે કપટરાજપુત્રો ઽસૌ ।
ભગ્નો ઽન્યનરાવસરો નગ્નેનાધિષ્ઠિતં યથા તીર્થમ્

ઇત્થંપ્રાયા વાચઃ શૃણ્વન્ વિટકુટ્ટનીસમુદ્ગીર્ણાઃ ।
તં વેશસંનિવેશં પશ્યન્ પ્રવિવેશ દયિતિકાવેશ્મ

આકૃષ્ટમિવોત્કતયા સ્નપિતમિવ સ્નિગ્ધચક્ષુષઃ પ્રસરૈઃ ।
તમુપાગતમભ્યર્ણં હારલતા પૂજયામાસ

સંવિહિતસમુચિતસ્થિતિરવનતશિરસા પ્રણમ્ય તત્સખ્યા ।
ઇદમભિદધે ઽતિનમ્રં સુન્દરસેનઃ શુભે ઽવસરે

પ્રિયદર્શન કિં બહુભિઃ સ્મરપીડિતદીનવચનસંદર્ભૈઃ ।
ઇયમાસ્તે હારલતા જીવિતમસ્યાસ્ત્વદાયત્તમ્

નિર્યન્ત્રકેલિવિશદં સહજપ્રેમાનુબન્ધરમણીયમ્ ।
કાર્યાન્તરાન્તરાયૈઃ સુપરિહૃતં યાતુ યૌવનં ભવતોઃ

નિર્દયમવિરતવાઞ્છં ધ્વસ્તત્રપમવ્યવસ્થિતાચરણમ્ ।
ઉપચીયમાનરાગં સતતં ભૂયાદ્ભવત્સુરતમ્

ઇતિ દત્ત્વાશિષમન્તર્નિર્યાતે પરિજને તદઙ્ગેષુ ।
વિસ્રમ્ભવિવિક્તરસો વવૃધે કુસુમાયુધઃ સુતરામ્

યદમન્દમન્મથોચિતમનુરૂપં યન્નવાનુરાગસ્ય ।
યદ્યૌવને ઽભિરામં યચ્ચ ફલં જીવિતવ્યસ્ય

અવિનય એવ વિભૂષણમશ્લીલાચરણમેવ બહુમાનઃ ।
નિઃશઙ્કતૈવ સૌષ્ઠવમનવસ્થિતિરેવ ગૌરવાધાનમ્

કેશગ્રહણમનુગ્રહ ઉપકારસ્તાડનં મુદે દંશઃ ।
નખવિલિખનમભ્યુદયો દૃઢદેહનિપીડનં સમુત્કર્ષઃ

નિગરણલોલં ચુમ્બનમવયવનિષ્પેષણસ્પૃહો મર્દઃ ।
અન્તઃપ્રવેશનેચ્છં નિર્ભરપરિરમ્ભણં યસ્મિન્

યદનઙ્ગૈરિવ વિહિતં રાગૈરિવ દીપ્તિમત્ત્વમુપનીતમ્ ।
પ્રેમભિરિવ નિશ્ચલિતં શૃઙ્ગારૈરિવ વિકાશમાનીતમ્

અપ્રાગલ્ભ્યં વ્યસનં ધૈર્યમકાર્યં વિવેક ઉપઘાતઃ ।
હ્રેપણમગુણો યસ્મિન્ તત્સુરતં પ્રસ્તુતં તાભ્યામ્