કુટ્ટનીમત · શ્લોક 341-360

ત્વયિ સક્તેન મયા ગૃહમુજ્ઝિતમધુના પરેવ જાતાસિ ।
ઇતિ ઢૌકમલભમાનઃ કશ્ચિદ્ગણિકામુપાલેભે

ઉષિતામપરેણ સમં વૃદ્ધવિટાનાં પુરઃ પરાજિત્ય ।
ત્યાજયતિ સ્મ ભુજઙ્ગઃ કશ્ચિદ્ગણિકાં દ્વિગુણભાટીમ્

દૃષ્ટા ત્વયા વિશેષક વલયકલાપી શશિપ્રભાભુજયોઃ ।
બાઢં ભણ ભણ કીદૃક્ ચારુતરા સા મયા દત્તા

અદ્ય ચતુર્થો દિવસશ્ચીનામ્બરયુગલકસ્ય દત્તસ્ય ।
તદપિ પરુષા વિલાસા વદ મદનક કિં કરોમ્યત્ર

સ્નેહપરા મયિ કેલી કલહંસક કિં તુ રાક્ષસી તસ્યાઃ ।
માતા નાત્મીકર્તું વર્ષશતેનાપિ શક્યતે પાપા

સુમનઃકુઙ્કુમવાસં સજ્જીકુરુ કિમિતિ તિષ્ઠસિ વિચિત્તઃ ।
અદ્ય તવ દયિતિકાયાઃ કિઞ્જલ્કક નર્તનાવસરઃ

યદિ નામ પઞ્ચ દિવસાન્ત્વયિ કુરુતે પ્રેમ ધનલવં દૃષ્ટ્વા ।
તદપિ તરઙ્ગવતી સા કન્દર્પક કિં વૃથા ગર્વઃ

જીવદ્વેષિન્ લાસક પરિહર દૂરેણ મૂઢ હરિસેનામ્ ।
બદ્ધાવેશસ્તસ્યાં વ્યાપૃતપુત્રો મહાવિષમઃ

કેસરયા ક્ષણદત્તં કૃત્વાંશુકમુપરિ કામિજાલસ્ય ।
સ્તબ્ધગ્રીવં ભ્રમતશ્ચન્દ્રોદય પશ્ય માહાત્મ્યમ્

કૌમારકં વિધાતું વાઞ્છસિ કિલ રમણ મદનસેનાયાઃ ।
ઇચ્છામિ કિં તુ તસ્યા માત્રાતીવ પ્રસારિતં વદનમ્

વિભ્રમ કિયતસ્તપસઃ ફલમેતદ્યદુપભુજ્યતે મદિરા ।
સ્વકરેણ પીતશેષા મદઘૂર્ણિતદેવદત્તયા દત્તા

કુવલયમાલાનિલયો લીલોદય કિમિતિ સમ્પ્રતિ ત્યક્તઃ ।
કિં વિદધામસ્તસ્મિન્ ભ્રાતર્દાસ્યા વિના મૂલ્યમ્

મુષિતાશેષવિભૂતેરિન્દીવરકસ્ય યામિની યાતિ ।
સંવાહયતઃ સમ્પ્રતિ મઞ્જીરક તિલકમઞ્જરીચરણૌ

અદ્યાપિ બાલભાવં નિખિલં ન જહાતિ મદનિકા તદપિ ।
પ્રૌઢિમ્ના મકરન્દક સકલા લલના અધઃ કુરુતે

કુબ્જે ગત્વા વક્ષ્યસિ તં નિર્દયચિત્તનર્તનાચાર્યમ્ ।
હારા સુકુમારતનુઃ કિમિતિ શ્રમમદ્ય કારિતા ભવતા

નિઃસર કો ઽભિનિવેશઃ શુકશાવકપાઠને સુરતદેવિ ।
તિષ્ઠતિ બહિરુપવિષ્ટઃ પ્રતીક્ષમાણસ્તવ પ્રેયાન્

વીણાવાદનખિન્ના પતિતાસ્તે વાસભવનપર્યઙ્કે ।
ઉત્થાપય તાં ત્વરિતં સ્મરલીલાં ભટ્ટપુત્ર આયાતઃ

કિમિદં યથાસ્થિતત્વં તવ માધવિ યન્મુહુર્વદન્ત્યા મે ।
પરિધત્સે નાભરણં શ્રીવિગ્રહરાજસૂનુના દત્તમ્

ઈદૃક્ શૂન્યમનસ્ત્વં કિં કુર્મો માતરિન્દુલેખાયાઃ ।
પાનક્રીડાસક્ત્યા પતિતાપિ ન ચેતિતા કનકતાડી

નકુલઃ પયો ન પાયિત ઇતિ રોષવશાદિયં હિ દુઃશીલા ।
નાશ્નાતિ કામસેના પુનઃ પુનઃ પ્રાર્થ્યમાનાપિ