કુટ્ટનીમત · શ્લોક 321-340

પુરુષાક્રાન્તાઃ સતતં કૃત્રિમશૃઙ્ગારરાગરમણીયાઃ ।
આહન્યમાનજઘનાઃ કરેણવો વારયોષાશ્ચ

ઉચિતગુણોત્ક્ષિપ્તા અપિ પુરતો વિનિવેશિતે સુવર્ણલવે ।
ઝગિતિ પતન્તિ મુખેન પ્રકટપ્રમદાઃ કલાધિકાશ્ચ તુલાઃ

બહિરુપપાદિતશોભા અન્તસ્તુચ્છાઃ સ્વભાવતઃ કઠિનાઃ ।
દાસ્યઃ સમુદ્ગિકા ઇવ મણન્તિ યન્ત્રપ્રયોગેણ

બધ્નન્તિ યે ઽનુરાગં દૈવહતાસ્તાસુ વારવનિતાસુ ।
તે નિઃસરન્તિ નિયતં પાણિદ્વયમગ્રતઃ કૃત્વા

ઇત્યુપદિશતિ વયસ્યે સુન્દરસેને ચ મન્મથવ્યથિતે ।
આવાદુપયાતં ગીતિત્રયમભ્યધાયિ કેનાપિ

તરુણીં રમણીયાકૃતિમુપનીતાં સ્મૃતિભુવા વશીકૃત્ય ।
પરિહરતિ યો જડાત્મા પ્રથમો ઽસૌ નાલિકો વિના ભ્રાન્તિમ્

ઇદમેવ હિ જન્મફલં જીવિતફલમેતદેવ યત્પુંસામ્ ।
લડહનિતમ્બવતીજનસમ્ભોગસુખેન યાતિ તારુણ્યમ્

સુમનોમાર્ગણદહનજ્વાલાવલિદહ્યમાનસર્વાઙ્ગ્યઃ ।
પ્રબલપ્રેમપ્રવણાઃ પ્રમદાઃ સ્પૃહયન્તિ નાલ્પપુણ્યેભ્યઃ

એવમુપશ્રુત્ય વચઃ સમુવાચ પુરન્દરાત્મજઃ સુહૃદમ્ ।
મમ હૃદયાદિવ કૃષ્ટ્વા ગીતમિદં સાધુનાનેન

તદતનુસાયકવિકલાં હારલતાં હરિણશાવતરલાક્ષીમ્ ।
આશ્વાસયિતું યામો ગુણપાલિત કિં વિકલ્પિતૈર્બહુભિઃ

અથ યત્ર કાપિ ગણિકા ગણયન્તી પરિચિતં હૃતદ્રવિણમ્ ।
પ્રવિશન્તમેવ મન્દિરમીર્ષ્યાવ્યાજેન નિરુરોધ

કા ચિદ્વઞ્ચકદત્તં લુણ્ડીકૃતજીર્ણવસનમવલોક્ય ।
વેશ્યા વિષીદતિ સ્મ ક્ષપાક્ષયે વૃત્તકર્તવ્યા

દૈવસ્મૃત્યા પતિતં દૃષ્ટિપથં ભગ્નમૂલ્યવિટમેકા ।
જ્વલિતા રુષા ભુજિષ્યા જગ્રાહ જવેન ધાવિત્વા

અન્તઃસ્થિતકામિગૃહદ્વારગતં લુપ્તવિત્તનરમન્યા ।
સમુવાચ કુટ્ટની વ્રજ કલ્લોલાકલ્પદેહેતિ

પ્રકટિતદશનનખક્ષતિરભિદધતી રાજપુત્રરતિયુદ્ધમ્ ।
અપરા પુરઃ સખીનાં વારવધૂરાતતાન સૌભાગ્યમ્

અન્યા કામિસ્પર્ધાવર્ધિતભાટી સમુચ્છ્રિતા ખેડા ।
સૌભાગ્યગર્વદર્પં સમુવાહ વિલાસિનીમધ્યે

એકગણિકાનુબન્ધક્રોધોદ્યતશસ્ત્રકામિનોઃ કાપિ ।
સમ્ભ્રમતો ધાવિત્વા નિવારયામાસ કુટ્ટની કલહમ્

ધનમાહૃત્ય બહુભ્યો ભુજ્યત એકેન કેન ચિત્સાર્ધમ્ ।
ઇતિ ધનવન્તં કામિનમાવર્જયતિ સ્મ કાપિ વારવધૂઃ

ગાયન્ગાથામાત્રં દ્વિપદકમથ સૌષ્ઠવેન વિટ એકઃ ।
બભ્રામ પુરો દાસ્યા વિદધદ્વિકૃતીરનેકવિધાઃ

કશ્ચિત્પણ્યસ્ત્રીણાં વિભવોપચિતાન્યપુરુષયોજનયા ।
વિદધાતિ સ્મારાધનમધનત્વમુપાગતઃ કામી