કુટ્ટનીમત · શ્લોક 281-300

તે ઽવશ્યં સ્વયમેવ ત્વામનુબધ્નન્તિ મદનશરભિન્નાઃ ।
ન હિ મધુલેહાઃ સુન્દરિ મૃગ્યન્તે ચૂતમઞ્જર્યા

ઇતિ ગદિતવતીમાલીં કામશરાસારભિન્નસર્વાઙ્ગી ।
અવ્યક્તસ્ખલિતાક્ષરમૂચે કૃચ્છ્રેણ હારલતા

સખિ કુરુ તાવદ્યત્નં બહુમતમતિવેદનાપ્રતીકારે ।
ક્રોડીકૃતા વિપત્ત્યા ન ભવન્ત્યુપદેશયોગ્યા હિ

અસ્વાયત્તઃ પ્રેયાન્મૃદુપવનઃ સુરભિકુસુમમુદ્યાનમ્ ।
ઇયતી ખલુ સામગ્રી ભવતિ ક્ષીણાયુષામેવ

મત્વા મદનાશીવિષવિષવેગાકુલિતવિગ્રહામાલીમ્ ।
સમુપેત્ય શશિપ્રભયા પૌરન્દરિરભિદધે કૃતપ્રણતિઃ

યદિ નામ રુણદ્ધિ ગિરં ગણિકાભાવોપજનિતવૈલક્ષ્યમ્ ।
તદપિ કથિતવ્યમેવ સ્નિગ્ધાપદિ ન હિ નિરૂપ્યતે યુક્તમ્

એતાવતિ સંસારે પરિગણિતા એવ તે સુજન્માનઃ ।
આપત્સુ પરિત્રાણવ્યાકુલમનસાં સ્ફુરન્તિ યે બુદ્ધૌ

યસ્મિન્નેવ મુહૂર્તે ચક્ષુર્વિષયં ગતો ઽસિ મમ સખ્યાઃ ।
તત એવારભ્ય ગતા વિધેયતાં દગ્ધમદનસ્ય

રોમોદ્ગમસંનહનં ભિત્ત્વાન્તર્વિગ્રહં પરાપતિતાઃ ।
તસ્યા માનસસમ્ભવકોદણ્ડવિનિઃસૃતા ઇષવઃ

કિં વિદધાતુ વરાકી કુત્ર સમાશ્વસિતુ યાતુ કં શરણમ્ ।
પીડયતિ ભૃશં યસ્યા નિત્યશુચિર્દક્ષિણો મૃદુઃ પવનઃ

વચસિ ગતે ગદ્ગદતામુજ્ઝિતમૌનવ્રતાશ્ચિરાય પિકાઃ ।
હૃષ્ટા વ્યથયન્તિ સખીં જાતાવસરા નિરર્ગલં વિરુતૈઃ

સ્ખલિતાકુલિતે ગમને તન્વઙ્ગ્યા અગણિતશ્રમા હંસાઃ ।
સુચિરાલ્લબ્ધાવસરાઃ કુર્વન્તિ ગતાગતાનિ પરિતુષ્ટાઃ

ઉષ્ણોચ્છ્વસિતસમીરૈર્વિદહ્યમાનો ઽપિ મધુકરસ્તસ્યાઃ ।
અલકકુસુમં ન મુઞ્ચતિ કૃચ્છ્રેષ્વપિ દુસ્ત્યજા વિષયાઃ

નો વારયસિ તથા માં સામ્પ્રતમિતિ કથયતીવ મધુલેહઃ ।
નિઃસહવપુષઃ કર્ણે શ્રુતિપૂરકપુષ્પસંગતો ગુઞ્જન્

પ્રશિથિલભુજલતિકાતસ્તસ્યાઃ પતિતસ્ય હેમકટકસ્ય ।
યત્પ્રાપણં પૃથિવ્યાસ્તસ્મિન્ખલુ મુક્તહસ્તતા હેતુઃ

રશનાગુણેન વિગલિતમેકપદે તન્નિતમ્બતશ્ચિત્રમ્ ।
પતનાય નિયતમથવા નિષેવણં ગુરુકલત્રસ્ય

અઙ્ગીકૃત્ય મનોભવમુરસિ તથા લાલિતો ઽપિ હતહારઃ ।
તાપયતિ સખીં તત્ક્ષણમન્તર્ભિન્નાત્કુતઃ કુશલમ્

વાસસિતં સ્વેદજલં કજ્જલમલિનાશ્રુવારિણા મિશ્રમ્ ।
કુચતટપતિતં તસ્યાઃ પ્રયાગસમ્ભેદસલિલમનુકુરુતે

પિકરુતમલયસમીરણસુમનઃસ્મરભૃઙ્ગદહનપરિકરિતા ।
પઞ્ચતપશ્ચરતિ ભવત્પરિરમ્ભણસૌખ્યલમ્પટા બાલા

ન પરાં પતતિ વરાકી દશમીં યાવન્મનોભવાવસ્થામ્ ।
ત્રાયસ્વ સુભગ તાવચ્છરણાગતરક્ષણં વ્રતં મહતામ્