કુટ્ટનીમત · શ્લોક 261-280

વિચરન્નુપવનમણ્ડપપુષ્પપ્રકરાભિરામભૂપૃષ્ઠે ।
રમમાણાં સહ સખ્યા લલનામાલોકયામાસ

અવલોકયતસ્તસ્ય સ્મરમાર્ગણવેધ્યતામુપેતસ્ય ।
ઇદમાસીન્મનસિ ચિરં વિસ્મયભારાભિભૂયમાનસ્ય

ક્વેદં ખલુ વિશ્વસૃજઃ કૌશલમત્યદ્ભુતં સમુપજાતમ્ ।
યેન વિરુદ્ધાનામપિ ઘટિતૈકત્ર સ્થિતિસ્તથા હીયમ્

લલિતવપુર્નિર્દોષા સ્ફુરદુજ્જ્વલતારકાભિરામા ચ ।
નિર્વાચ્યવદનકમલા જિતવીણાક્વણિતવાણી ચ

સંવિહિતવિગ્રહસ્થિતિરતિશોભનઘટિતસન્ધિબન્ધા ચ ।
ઉન્નતપયોધરાઢ્યા શરદિન્દુકરાવદાતા ચ

અભિમતસુગતાવસ્થિતિરભિનન્દિતચરણરચના ચ ।
અતિવિપુલજઘનદેશા વિધ્વસ્તશરીરવિહિતશોભા ચ

આવિર્ભવદનુરાગે તસ્મિન્નથ વલિતલોચના સહસા ।
સાપિ બભૂવ મૃગાક્ષી હસ્તગતા કુસુમચાપસ્ય

તરુમૂલમાશ્રિતાયા વિસ્મૃતસકલાન્યકર્મણઃ સપદિ ।
તસ્યા ગાત્રલતાયામઙ્કુરિતં સાત્ત્વિકૈર્ભાવૈઃ

સૈવોપવનસમૃદ્ધિસ્તસ્મિન્નેવ ક્ષણે સ્મરં સ્મૃત્વા ।
તાં વ્યથયિતુમારેભે પ્રભોર્હિ કૃત્યં કરોતિ ખલુ સર્વઃ

ગાત્રસરસેન્ધનેભ્યઃ પ્રસ્વેદજલં વિનિર્યયૌ તસ્યાઃ ।
અન્તર્જ્વલિતમનોભવહવ્યભુજા દહ્યમાનેભ્યઃ

કુસુમશરજાલપતિતા મુહુર્મુહુર્વિદધતી વિવૃત્તાનિ ।
અનિમેષં પશ્યન્તી મત્સ્યવધૂમનુચકાર સા તન્વી

સ્તબ્ધતનું સોત્કમ્પાં પુલકવતીં સ્વેદિનીં સનિઃશ્વાસામ્ ।
વિદધે તામસમશરઃ ક્રીડતિ હિ શઠો વિશિષ્ટમાસાદ્ય

ઉચ્છ્વાસૈરુલ્લસનં કુચયુગલે સૌષ્ઠવં વિલાસાનામ્ ।
અભિલષિતેન પ્રેમ્ણા સ્નિગ્ધત્વં ચક્ષુષોર્મનોહારિ

અનુરક્ત્યા વદનરુચિં વચસિ ચ ગમને ચ સાધ્વસસ્ખલનમ્ ।
તસ્યા મદનઃ કુર્વન્નુપનિન્યે ચારુતામધિકામ્

પાર્શ્વગતે ઽપિ પ્રેયસિ કામશરાસારતાડ્યમાનાપિ ।
ન શશાક સાભિધાતું ચિત્તગતં પ્રણયભઙ્ગતો ભીતા

અથ વિદિતચિત્તવૃત્તિઃ સક્તદૃશં પ્રિયતમે સમાકૃષ્ય ।
મદનેન દહ્યમાનાં વિહસિતવિશદં જગાદ તામાલી

અયિ હારલતે સંહર હરહુઙ્કૃતિદગ્ધદેહસંક્ષોભમ્ ।
સદ્ભાવજાનુરક્તિર્ન હિ પણ્યં પણ્યનારીણામ્

અવધીરય ધનવિકલં કુરુ ગૌરવમકૃશસમ્પદઃ પુંસઃ ।
અસ્માદૃશાં હિ મુગ્ધે ધનસિદ્ધ્યૈ રૂપનિર્માણમ્

અભિરામે ઽભિનિવેશં વિદધાના વિભવલાભનિરપેક્ષા ।
ઉપહસ્યસે સુમધ્યે વિદગ્ધવારાઙ્ગનાવારૈઃ

યેષાં શ્લાઘ્યં યૌવનમભિમુખતામુપગતો વિધિર્યેષામ્ ।
ફલિતં યેષાં સુકૃતં જીવિતસુખિતાર્થિતા યેષામ્