કુટ્ટનીમત · શ્લોક 241-260

શિશિરકરકાન્તમૌલિઃ કટકસ્થિતપવનભોજનઃ સગુહઃ ।
વિદ્યાધરોપસેવ્યો બિભર્તિ લક્ષ્મીમયં શમ્ભોઃ

અત્ર તરુશિખરસંગતસુમનસ ઇતિ જાતનિશ્ચયો મન્યે ।
અભિલષતિ સમુચ્ચેતું તારા નિશિ મુગ્ધકામિનીસાર્થઃ

આશ્ચર્યં યદુપાન્તે તિષ્ઠન્ત્યેતસ્ય સપ્ત મુનયો ઽપિ ।
અથવા કસ્યાકર્ષં ન કરોતિ સમુન્નતિર્મહતામ્

અવગત્ય નિરવલમ્બનમમ્બરમાર્ગં પતઙ્ગતુરગાણામ્ ।
અયમવનિધરો મન્યે વિશ્રાન્ત્યૈ વેધસા વિહિતઃ

ઇમમાશ્રિત્ય હિમાંશોરોષધયઃ સંનિકર્ષમુપયાતાઃ ।
પ્રત્યાસત્તિઃ પ્રભુણા પ્રાયો ઽનુગ્રાહકવશેન

સેક્તુમિવાશાકરિણો વિસૃજત્યયમવનિધરણપરિખિન્નાન્ ।
નિર્ઝરસલિલકણૌઘાન્ ભવતિ હિ સૌહાર્દમેકકાર્યાણામ્

હારીતાહૃતશોભો મુદિતશુકો વ્યાસયોગરમણીયઃ ।
વિશ્રાન્તભરદ્વાજઃ સમતામયમેતિ મુનિનિવાસસ્ય

અસ્મિન્નિઃસઙ્ગા અપિ પરલોકપ્રાપ્ત્યુપાયકૃતયત્નાઃ ।
ગન્ધવહભોજના અપિ ન હિંસકાઃ ફલભુજો ઽપિ ન પ્લવગાઃ

શુભકર્મૈકરતા અપિ ષટ્કર્માણો યતા અપિ સ્વવશાઃ ।
અનભિમતરૌદ્રચરિતાઃ શિવપ્રિયા અપિ વસન્તિ શમનિરતાઃ

મૂર્તિરિવ શિશિરરશ્મેર્હરિણવતી સપ્તપત્રકૃતશોભા ।
સરણિરિવ ચણ્ડભાસઃ પલાશિની યાતુધાનજાયેવ

સોત્કણ્ઠેવ સમદના વાસકસજ્જેવ તિલકપરિભૂષા ।
ધવહરિપીલુસનાથા નરનાથદ્વારભૂમિરિવ

અર્જુનબાણવ્રાતૈઃ કુરુનાથવરૂથિનીવ સંછન્ના ।
ઋક્ષસહસ્રોપચિતા લક્ષ્મીરિવ ગગનદેશસ્ય

ધ્વજિનીવ દાનવાનાં રિષ્ટકસમધિષ્ઠિતા ત્રિયામેવ ।
ઉદ્દ્યોતરોહિણીકા રમ્યેયમુત્પત્યકા ભાતિ

ઇતિ દર્શયતિ વયસ્યે સુન્દરસેને ચ પશ્યતિ પ્રીત્યા ।
સ્વપ્રસ્તાવોપગતા ગીતિરિયં કેન ચિદ્ગીતા

અતિશયિતનાકપૃષ્ઠં પૃષ્ઠં યે નાર્બુદસ્ય પશ્યન્તિ ।
બહુવિષયપરિભ્રમણં મન્યે ક્લેશાય કેવલં તેષામ્

આકર્ણ્ય ચ સ બભાષે મહાત્મનાનેન યુક્તમુપગીતમ્ ।
શિખરિશિરઃ પશ્યામો વયસ્ય રમ્યં સમારુહ્ય

અથ ગિરિવરમારૂઢો વિલોકયન્વિવિધવિબુધભવનાનિ ।
વાપીરુદ્યાનભુવઃ સરાંસિ સરિતશ્ચચાર વિસ્મેરઃ

અચિરાભામિવ વિઘનાં જ્યોત્સ્નામિવ કુમુદબન્ધુના વિકલામ્ ।
રતિમિવ મન્મથરહિતાં શ્રિયમિવ હરિવક્ષસઃ પતિતામ્

હસ્તોચ્ચયં વિધાતુઃ સારં સકલસ્ય જન્તુજાતસ્ય ।
દૃષ્ટાન્તં રમ્યાણામસ્ત્રં સંકલ્પજન્મનો જૈત્રમ્

વિકસિતકુસુમસમૃદ્ધિં શૃઙ્ગારરસાપગૈકકલહંસીમ્ ।
લીલાપલ્લવવલ્લીં વ્રતિનામવધાનવર્મણાં ભલ્લીમ્