કુટ્ટનીમત · શ્લોક 221-240

કિં વયમુત્પાટ્ય ગૃહં પ્રાતર્ગન્તાર ઈદૃગેવ સતામ્ ।
ભવતિ નિવાસો યસ્મિન્નિજ ઇવ પથિકાઃ પ્રયાન્તિ વિશ્રામમ્

અદ્ય રજનીં નયામો યથા કથં ચિત્ત્વદાશ્રયે માતઃ ।
અસ્તઙ્ગતો વિવસ્વાન્વદ સમ્પ્રતિ કુત્ર ગચ્છામઃ

ઇતિ બહુવિધદીનવચાઃ પ્રતિગેહં દ્વારદેશમધિતિષ્ઠન્ ।
નિર્ભર્ત્સ્યતે વરાકો ગૃહિણીભિરિદં વદન્તીભિઃ

ન સ્થિત ઇહ ગેહપતિઃ કિં રટસિ વૃથા પ્રયાહિ દેવકુલમ્ ।
કથિતે ઽપિ નાપગચ્છતિ પશ્ય મનુષ્યસ્ય નિર્બન્ધમ્

અથ યદિ કથં ચિદપરઃ પુનઃ પુનર્યાચિતો ગૃહસ્વામી ।
નિર્દિશતિ સાવધીરણમત્ર સ્વપિહીતિ શીર્ણગૃહકોણે

તત્ર કલહાયમાના તિષ્ઠતિ ગૃહિણી વિભાવરીપ્રહરમ્ ।
અજ્ઞાતાય કિમર્થં વાસો દત્તસ્ત્વયેતિ સહ ભર્ત્રા

ઈદૃગયં સરલાત્મા કિં કુરુષે ભગિનિ તાવકો ભર્તા ।
સ્થાસ્યસિ ગેહે ઽવહિતા ભ્રમન્તિ ખલુ વઞ્ચકા એવમ્

ઇતિ ભાજનાદિયાચ્ઞાં બુદ્ધૌ વિનિધાય નિકટવર્તિગૃહાત્ ।
નારી સમભ્યુપેતા બ્રૂતે તામાપ્તભાવેન

ગૃહશતમધિકમટિત્વા કલમકુલત્થાણુચણમસૂરાદિ ।
એકીભૂતં ભુઙ્ક્તે ક્ષુધોપતપ્તો ઽધ્વગો ભૈક્ષમ્

પરવશમશનં વસુધાં શયનીયં સુરનિકેતનં સદ્મ ।
પથિકસ્ય વિધિઃ કૃતવાનુપધાનકમિષ્ટકાખણ્ડમ્

ઇતિ નિગદિતવતિ તસ્મિન્ સુન્દરસેનસ્ય ચોત્તરાવસરે ।
ઇયમુપગીતા ગીતિઃ કેનાપિ કથાપ્રસઙ્ગેન

નિજવરભવનં સુરગૃહમુર્વીતલમતિમનોહરં શયનમ્ ।
કદશનમમૃતમભીપ્સિતકાર્યૈકનિવિષ્ટચેતસાં પુંસામ્

સમુપશ્રુત્ય ચ સુહૃદં પૌરન્દરિરિદમુવાચ પરિતુષ્ટઃ ।
મમ હૃદયગતં પ્રકટિતમેતેન સતૈવ ભવતુ ગચ્છાવઃ

અથ સહચરદ્વિતીયઃ ક્લેશસમુદ્રાવતરણકૃતચિત્તઃ ।
નિરગાત્સુન્દરસેનઃ કુસુમપુરાદવિદિતઃ પિત્રા

પશ્યન્ વિદગ્ધગોષ્ઠીરભ્યસ્યન્નાયુધાનિ સકલાનિ ।
શાસ્ત્રાર્થાનવગચ્છન્વિલોકયન્કૌતુકાનિ વિવિધાનિ

જાનન્ પત્રછેદનમાલેખ્યં સિક્થપુસ્તકર્માણિ ।
નૃત્યં ગીતોપચિતં તન્ત્રીમુરજાદિવાદ્યભેદાંશ્ચ

બુધ્યન્વઞ્ચકભઙ્ગીર્વિટકુલટાનર્મવક્રકથિતાનિ ।
બભ્રામ સુહૃત્સહિતઃ સુન્દરસેનો મહીમખિલામ્

અથ વિદિતસકલશાસ્ત્રો વિજ્ઞાતાશેષજનસમાચરણઃ ।
નિજગૃહગમનાકાઙ્ક્ષી સ શિલોચ્ચયમર્બુદં પ્રાપ

તત્પૃષ્ઠદેશદર્શનલોલમલં સુન્દરં પરિજ્ઞાય ।
ગુણપાલિતો બભાષે વિલોક્યતામદ્રિરાજ ઇતિ

એષ સુતઃ સાનુતટસ્યન્દચ્છીતાચ્છસલિલસમ્પન્નઃ ।
લોકાનુકમ્પયેવ પ્રાલેયમહીભૃતા મરૌ ન્યસ્તઃ