કુટ્ટનીમત · શ્લોક 201-220

તસ્યાભૂત્સકલકલોદ્ભાસિતપક્ષદ્વયસ્ય સુત એકઃ ।
નામ્ના સુન્દરસેનઃ કચ ઇવ વચસામધીશસ્ય

પશુપતિનયનહુતાશનભસ્મિતમવધાર્ય યં વપુષ્મન્તમ્ ।
અપરમિવ કુસુમચાપં રતિરતયે નિર્મમે ધાતા

તિષ્ઠન્તુ તાવદન્યાઃ કુલલલના યસ્ય રૂપમવલોક્ય ।
સાપિ મહામુનિદયિતા કૃચ્છ્રેણ રરક્ષ ચારિત્રમ્

કલધૌતફલકશોભાં બિભ્રાણં યસ્ય પૃથુતરં વક્ષઃ ।
દૃષ્ટ્વા ચિરાય લક્ષ્મીર્હરિહૃદયે દુઃસ્થિતં મેને

કથમીદૃગ્યદિ ન કૃતઃ શશિશકલૈરથ કૃતઃ કથં વ્યથકઃ ।
ઇત્થં યમીક્ષમાણો નિર્ણયમગમન્ન કામિનીસાર્થઃ

યો જગ્રાહ હિમાંશોઃ પ્રસન્નમૂર્તિત્વમચલતઃ સ્થૈર્યમ્ ।
જલધરત ઉન્નતત્વં ગામ્ભીર્યં યાદસાં પત્યુઃ

યો વિનયસ્ય નિવાસો વૈદગ્ધ્યસ્યાશ્રયઃ સ્થિતેઃ સ્થાનમ્ ।
પ્રિયવાચામાયતનં નિકેતનં સાધુચરિતસ્ય

યો મદનઃ પ્રમદાનાં તુહિનકરઃ સાધુકુમુદષણ્ડસ્ય ।
નિકષોપલો ગુણાનાં માર્ગતરુઃ પથિકલોકસ્ય

સજ્જનગોષ્ઠીનિરતઃ કાવ્યકથાસારનિકષપાષાણઃ ।
પ્રણયિજનકલ્પવૃક્ષો લક્ષ્મીલીલાવિહારભૂમિશ્ચ

જલધિરિવ તુહિનભાસઃ સહવૃદ્ધિપરિક્ષયઃ સુહૃત્તસ્ય ।
સકલોપધાવિશુદ્ધો બભૂવ ગુણપાલિતો નામ્ના

તેન સમં સ કદા ચિત્તિષ્ઠન્રહસિ પ્રસઙ્ગતઃ પતિતામ્ ।
કેનાપિ ગીયમાનામશૃણોદાર્યામિમાં સહસા

દેશાન્તરેષુ વેષસ્વભાવભણિતાનિ યે ન બુધ્યન્તે ।
સમુપાસતે ન ચ ગુરૂન્વિષાણવિકલાસ્ત ઉક્ષાણઃ

આકર્ણ્યાથ તમૂચે વચનમિદં સુન્દરઃ સુહૃન્મુખ્યમ્ ।
શોભનમેતદ્ગીતં ગુણપાલિત સાધુનાનેન

સાધૂનામાચરિતં ખલચેષ્ટાં વિવિધલોકહેવાકાન્ ।
નર્મ વિદગ્ધૈર્વિહિતં કુલટાજનવક્રકથિતાનિ

ગુરુગૂઢશાસ્ત્રચર્ચાં વિટવૃત્તં ધૂર્તવઞ્ચનોપાયાન્ ।
વારિધિપરિખાં પૃથ્વીં જાનાતિ પરિભ્રમન્પુરુષઃ

અત ઉત્સૃજ્ય ગૃહસ્થિતિસુખલેશં વિવિધલાભપરિણામે ।
સ્થાપય ગમનારમ્ભે વયસ્ય હૃદયં મયા સહિતઃ

ઇત્થં નિગદિતવન્તં સુહૃદુત્તરલાભલાલસાત્માનમ્ ।
ઊચે સુન્દરસેનં લજ્જિત ઇવ સહચરો વચનમ્

અભ્યર્થનાનુબન્ધો લજ્જાકર એવ માદૃશાં કિં તુ ।
આકર્ણય કથયામઃ પથિકાનાં યાનિ દુઃખાનિ

કર્પટકાવૃતમૂર્તિર્દૂરાધ્વપરિશ્રમાવસિતશક્તિઃ ।
પાંસૂત્કરધૂસરિતો દિનાવસાને પ્રતિશ્રયાકાઙ્ક્ષી

માતર્ભગિનિ દયાં કુરુ મા મૈવં નિષ્ઠુરા ભવ તવાપિ ।
કાર્યવશેન ગૃહેભ્યો નિર્યાન્તિ ભ્રાતરશ્ચ પુત્રાશ્ચ