કુટ્ટનીમત · શ્લોક 1-20

સ જયતિ સંકલ્પભવો રતિમુખશતપત્રચુમ્બનભ્રમરઃ ।
યસ્યાનુરક્તલલનાનયનાન્તવિલોકિતં વસતિઃ

અવધીર્ય દોષનિચયં ગુણલેશે સંનિવેશ્ય મતિમાર્યાઃ ।
કુટ્ટન્યા મતમેતદ્દામોદરગુપ્તવિરચિતં શૃણુત

અસ્તિ ખલુ નિખિલભૂતલભૂષણભૂતા વિભૂતિગુણયુક્તા ।
યુક્તાભિયુક્તજનતા નગરી વારાણસી નામ

અનુભવતામપિ યસ્યામુપભોગાન્ કામતઃ શરીરવતામ્ ।
શશધરખણ્ડવિભૂષિતદેહલયઃ કિલ ન દુષ્પ્રાપઃ

ચન્દ્રવિભૂષિતદેહા ભૂતિરતાઃ સદ્ભુજઙ્ગપરિવારાઃ ।
વારસ્ત્રિયો ઽપિ યસ્યાં પશુપતિતનુતુલ્યતાં યાતાઃ

અતિતુઙ્ગસુરનિકેતનશિખરસમુત્ક્ષિપ્તપવનચલિતાભિઃ ।
મઞ્જરિતમિવ વિરાજતિ યત્ર નભો વૈજયન્તીભિઃ

અવિરતસંચરદબલાચરણતલાલક્તકદ્રવારુણિતમ્ ।
સ્થલકમલવતીં લક્ષ્મીં બિભર્તિ વસુધાતલં યત્ર

યત્ર ચ રમણીભૂષણરવબધિરિતસકલદિઙ્નભોભાગે ।
શિષ્યાણાં નાચાર્યૈરવદ્યમવધાર્યતે પઠતામ્

વિન્ધ્યધરાધરભૂરિવ યા રાજતિ મત્તવારણોપેતા ।
બહુલનિશીથવતીવ પ્રોજ્જ્વલધિષ્ણ્યોપશોભિતા યા ચ

યતિગણગુણસમુપેતા યા નિત્યં છન્દસામિવ પ્રચિતિઃ ।
વનપઙ્ક્તિરિવ સસાલા તુરુષ્કસેનેવ બહલગન્ધર્વા

તારાગણો ઽકુલીનઃ પ્રિયદોષા યત્ર કૌશિકાઃ સતતમ્ ।
ગદ્યે વૃત્તચ્યવનં પરગૃહરોધસ્તથાક્ષેષુ

શૂલભૃતો વ્યાલાસ્થા પદવેદિષુ યત્ર ધાતુવાદિત્વમ્ ।
સુરતેષ્વબલાક્રમણં દાનચ્છેદો મદચ્યુતૌ કરિણામ્

તીવ્રકરત્વં ભાનોરવિવેકો યત્ર મિત્રહૃદયાનામ્ ।
યોગિષુ દણ્ડગ્રહણં સંધિચ્છેદઃ પ્રગૃહ્યેષુ

છન્દઃપ્રસ્તારવિધૌ ગુરવો યસ્યામનાર્જવસ્થિતયઃ ।
વીણાયાં પરિવાદો દ્વિજનિલયેષ્વપ્રસન્નત્વમ્

અનુરૂપવૃત્તઘટના સત્કવિકૃતરૂપકેષુ લોકે ચ ।
રમણીવચને યસ્યાં માધુર્યં કાવ્યબન્ધે ચ

યસ્યામુપવનવીથ્યાં તમાલપત્ત્રાણિ યુવતિવદને ચ ।
નખરપ્રહારકણિતં તન્ત્રીવાદ્યે ચ સુરતકલહે ચ

નન્દનવનાભિરામા વિબુધવતી નાકવાહિનીજુષ્ટા ।
અમરાવતીવ યાન્યા વિશ્વસૃજા નિર્મિતા જગતિ

તસ્યાં ખગપતિતનુરિવ વિલાસિનાં હૃદયશોકસંજનની ।
આકૃષ્ટેશ્વરહૃદયા પ્રાલેયનગાધિરાજતનયેવ

સંસક્તભોગિનેત્રા મન્દરધરણીભૃતો યથા મૂર્તિઃ ।
ઉપરિગતા શૂલાનામન્ધાસુરગાત્રલેખેવ

સમુવાસ વારરામા માનસવસતેઃ શરીરિણી શક્તિઃ ।
નિઃશેષવેશયોષિદ્વિભૂષણં માલતી નામ