કુટ્ટનીમત · શ્લોક 181-200

તિષ્ઠન્તુ સકલશાસ્ત્રવ્યાલોચનવિમલબુદ્ધયો વિપ્રાઃ ।
સદસદ્ગુણનિર્ણીતૌ લલના અપિ નિકષભૂમયો યસ્મિન્

કલિકાલોદિતભીત્યા ક્રતુહુતવહધૂમકમ્બલાવરણઃ ।
તિષ્ઠન્નિભૃતો ઽપિ કૃતશ્ચરિતૈરનુમીયતે યસ્મિન્

અપહરતિ પિધાતુમિવ સ્વકલઙ્કં શશધરઃ પ્રસાર્ય કરાન્ ।
રાત્રૌ યત્ર વધૂનાં લાવણ્યં વદનકોષેભ્યઃ

તિમિરપટલાસિતામ્બરમપહરદભિસારિકાજનૌઘસ્ય ।
નિજતનુકાન્તિવિતાનં વલ્લભસમ્ભોગવિહતયે યસ્મિન્

યત્ર નિતમ્બવતીનાં વિચલન્નયનાન્તશિતશરૈર્વ્રણિતઃ ।
શિથિલયતિ પથિકલોકઃ સ્વકલત્રસમાગમોત્કણ્ઠામ્

યત્ર ચ કુલમહિલાનામલ્પત્વં વચસિ પાણિપાદે ચ ।
સ્વચ્છત્વમાશયેષુ વ્યાલોલવિશાલનેત્રે ચ

પીનપયોધરભારે ઘનતા જીવેશસહજરાગે ચ ।
કુલદેવતાર્ચનવિધૌ વલિશોભા મધ્યભાગે ચ

ગમ્ભીરતા સ્વભાવે ચેતોભવબાણતૂણનાભૌ ચ ।
વિસ્તીર્ણતા નિતમ્બે ગુરુજનપૂજાનુરક્તચિત્તે ચ

હરિણાયતેક્ષણાનાં વિચ્છિત્તિઃ કોષહરણમબ્જેષુ ।
કુટિલત્વમલકપઙ્ક્તૌ બાલાનાં કામચેષ્ટિતં યત્ર

સંયમનમિન્દ્રિયાણામિનોપઘાતગ્રહસ્તમિસ્રસ્ય ।
સ્તબ્ધત્વં સાલતરૌ હારલતા તરલસંગતા યસ્મિન્

ભુજગાઃ પરરન્ધ્રદૃશઃ ખણ્ડ્યન્તે પ્રિયતમાધરા યત્ર ।
સૂચીવ્યથાનુભૂતિર્નૃત્યાભ્યાસપ્રવૃત્તાનામ્

નતવપુરપ્યતિસરલા મન્થરગમનાપિ નર્મદા યસ્મિન્ ।
ગુરુજનશાસ્ત્રરતાપિ સ્વભાવમુગ્ધાઙ્ગનાજનતા

તસ્મિન્મખશતપૂતઃ પુરુહૂત ઇવ દ્વિજન્મનાં પ્રવરઃ ।
ગુરુરિવ વિદ્યાવસતિર્વસતિ સ્મ પુરન્દરો નામ્ના

ધર્માત્મજસ્ય સત્યં ત્રિપુરરિપોર્વિજિતકુસુમચાપત્વમ્ ।
હરિનાભિપઙ્કજભુવો વિજિતેન્દ્રિયતાં જહાસ યઃ સતતમ્

ન્યક્કૃતવૃષ ઇતિ શર્વે યાચક ઇતિ કૌસ્તુભાભરણે ।
પીડિતવસુધાસુત ઇતિ કપિલે ન બભૂવ યસ્ય બહુમાનઃ

માર્ગાનુસૃતૌ લુબ્ધો યઃ પ્રાણિવપુર્વિનાશવિમુખો ઽપિ ।
પરિહૃતપરદારો ઽપિ સ્વાકાઙ્ક્ષિતગુરુજનપ્રમદઃ

યસ્યાન્વયે મહીયસિ સરસીવ સમસ્તસત્ત્વનિજવસતૌ ।
સચ્ચરિતજન્મભૂમૌ વિનિવારિતકલિમલપ્રસરે

પિતૃતર્પણપ્રસઙ્ગે ખડ્ગગ્રહણં ન શૌર્યદર્પેણ ।
ત્રુટનં મેખલિકાનાં વટુકજને નો રતાજિસંમર્દે

શ્રુતિભેદેષુ વિવાદો નો રિક્થવિભાગમન્યુના જનિતઃ ।
તેજસ્વિતા હવિર્ભુજિ ન શમૈકરતેષુ ભૂમિદેવેષુ

જરતામેવ સ્ખલનં જપતામેવાધરસ્ફુરણમ્ ।
યજતામેવ સમિધ્રુચિ રેણાજિન એવ કૃષ્ણસમ્પર્કઃ