કુટ્ટનીમત · શ્લોક 161-180

અવિવેચિતનખરક્ષતિરામીલિતલોચના નિરુત્સાહા ।
નાયકકાર્યસમાપ્તૌ સ્થાસ્યસિ શિથિલીકૃતાવયવા

ઝગિતિ નિતમ્બાવરણં નિઃસહતનુતાં સ્મિતં સવૈલક્ષ્યમ્ ।
ખેદાલસાં ચ દૃષ્ટિં જનયિષ્યસિ મોહનચ્છેદે

વૃત્તે રતાભિયોગે સ્પૃષ્ટ્વા સલિલં વિકૃષ્ટભૂભાગે ।
પ્રક્ષાલ્ય પાણિપાદં સ્થિત્વા ક્ષણમાસને સમૂહ્ય કચાન્

ઉપયુક્તવદનવાસા શય્યામારુહ્ય દર્શિતપ્રણયા ।
ઇતિ વક્ષ્યસિ તં રમણં દૃઢતરમાલિઙ્ગ્ય રભસતઃ કણ્ઠે

ભટ્ટસુત નૂનમિષ્ટા તવ જાયા યદનુરક્તહૃદયસ્ય ।
જનયતિ પરિતુષ્ટિમલં નાપરરામાપરિષ્વઙ્ગઃ

સફલં તસ્યા જન્મ સ્પૃહણીયા સૈવ સકલલલનાનામ્ ।
ગૌરી તયૈવ મહિતા સુભગઙ્કરણં તપસ્તયાચરિતમ્

સૈવૈકા ગુણવસતિસ્તસ્યા એવાન્વયઃ સદા શ્લાઘ્યઃ ।
યસ્યાઃ શુભશતભાજઃ પાણિગ્રહણં ત્વયા વિહિતમ્

તિષ્ઠતુ સા પુણ્યવતી વંશદ્વયભૂષણં વરારોહા ।
યા નાપયાતિ ભવતો લક્ષ્મીરિવ નરકવૈરિણો હૃદયાત્

પાતયસિ કુવલયનિભે કૌતુકમાત્રેણ લોચને યાસુ ।
તા અપિ સત્યં સુન્દર હર્ષોલ્લસિતા ન માન્તિ ગાત્રેષુ

તનુરપિ નાથપ્રણયઃ પ્રાયો મુખરીકરોતિ લઘુમનસઃ ।
સ્વાર્થનિવેશિતચિત્તા કરોમિ તે ઽભ્યર્થનાં તેન

તીવ્રસ્મરતારુણ્યાચ્ચાપલતઃ કૌતુકેન ઘૃણયા વા ।
મદ્ભાગ્યસમ્પદા વા દૂત્યા વા કૌશલાત્સ્વભાવાદ્વા

યો ઽયં પ્રેમલવાંશઃ પ્રદર્શિતો ઽસ્માસુ જીવનોપાયઃ ।
બાધા નાત્ર વિધેયા ગણિકાજનવૃત્તમન્યથા બુદ્ધ્વા

યેન સ્નેહઃ ક્રોધઃ શાઠ્યં દાક્ષિણ્યમાર્જવં વ્રીડા ।
એતાનિ સન્તિ તાસ્વપિ જીવદ્ધર્મોપનીતાનિ

નિર્વ્યાજસમુત્પન્નપ્રબલપ્રેમાભિભૂતહૃદયાનામ્ ।
દયિતવિરહાક્ષમાણાં ગણિકાનાં તૃણસમાઃ પ્રાણાઃ

અત્રાકર્ણય સાદ્ભુતમાખ્યાનં વર્ણયામિ યદ્વૃત્તમ્ ।
અદ્યાપિ બિભર્તિ વટો વિશેષણં યદભિસમ્બન્ધાત્

અસ્તિ મહીતલતિલકં સરસ્વતીકુલગૃહં મહાનગરમ્ ।
નામ્ના પાટલિપુત્રં પરિભૂતપુરન્દરસ્થાનમ્

ત્રિભુવનપુરનિષ્પાદનકૌશલમિવ પૃચ્છતો વિરિઞ્ચસ્ય ।
દર્શયિતું નિજશિલ્પં વર્ણકમિવ વિશ્વકર્મણા વિહિતમ્

અશ્રેયોભિરનાશ્રિતમભિભૂતં નાભિભૂતિદોષેણ ।
ન સ્વીકૃતમુપસર્ગૈઃ કલિકાલમલૈરનાલીઢમ્

પાતાલતલં ભોગિભિરમ્ભોધિર્વારિરત્નનિચયૈશ્ચ ।
સુરસદનં વિબુધગણૈર્દ્રવિણોપચયૈઃ પુરં કુવેરસ્ય

રમણીભિરસુરવિવરં કટકં હેમાચલસ્ય ગાન્ધર્વૈઃ ।
હરિનગરં ક્રતુયૂપૈઃ શમવિભવૈર્મુનિજનસ્થાનમ્