કુટ્ટનીમત · શ્લોક 141-160

અથ પર્યઙ્કસનાથં દીપોજ્જ્વલકુસુમધૂપગન્ધાઢ્યમ્ ।
વિતતવિતાનકરમ્યં પ્રવેશિતો વાસકાવાસમ્

માત્રા તે ગુરુજઘને સાદરમવતારણાદિકં કૃત્વા ।
અભિનન્દનીય એભિર્વચનવિશેષૈઃ પ્રયત્નેન

અદ્યાશિષઃ સમૃદ્ધાઃ પરિતુષ્ટા ઇષ્ટદેવતા અદ્ય ।
કલ્યાણાલઙ્કારો યદલઙ્કૃતવાનિદં વેશ્મ

અનુરૂપપાત્રઘટનં કુર્વાણસ્યાદ્ય કુસુમબાણસ્ય ।
સુચિરાદ્બત સંજાતઃ શરાસનાકર્ષણશ્રમઃ સફલઃ

વિન્યસ્ય શિરસિ ચરણં સુભગા ગણિકાજનસ્ય સકલસ્ય ।
સૌભાગ્યવૈજયન્તીં સમ્પ્રતિ વત્સા સમુત્ક્ષિપતુ

દુહિતર એવ શ્લાઘ્યા ધિગ્લોકં પુત્રજન્મસંતુષ્ટમ્ ।
જામાતર આપ્યન્તે ભવાદૃશા યદભિસમ્બન્ધાત્

દૃઢપરિચયા ગુણજ્ઞા ભવદ્વિધા નાર્થનાર્હકા યદપિ ।
તદપિ હૃદયાભિનન્દન દુહિતૃસ્નેહાદહં વચ્મિ

સહજપ્રેમોપહૃતા ન્યસ્તા ત્વયિ માલતી તથા કાર્યમ્ ।
ન યથા ભવતિ વરાકી ત્વદ્વિપ્રિયજન્મનાં શુચાં વસતિઃ

મૃદુધૌતધૂપિતામ્બરમગ્રામ્યં મણ્ડનં ચ બિભ્રાણા ।
પરિપીતધૂપવર્તિઃ સ્થાસ્યસિ રમણાન્તિકે સુતનુ

સસ્નેહં સવ્રીડં સસાધ્વસં સસ્પૃહં ચ પશ્યન્તી ।
કિં ચિદ્દૃશ્યશરીરા પ્રવિરલપરિહાસપેશલાલાપા

માતરિ નિર્યાતાયાં પરિજનમુક્તે ચ વાસકસ્થાને ।
અભિયુઞ્જાને રમણે વામાચરણં ક્ષણં કાર્યમ્

રતિસંગરનિહિતમતાવાકર્ષતિ રભસતઃ પુરસ્તસ્મિન્ ।
કુટ્ટમિતમાચરન્તી જનયિષ્યસિ કિં ચિદઙ્ગસંકોચમ્

પ્રારબ્ધે સુરતવિધૌ ક્રમદર્શિતચિત્તયોનિસંવેગા ।
અપશઙ્કમર્પયિષ્યસિ નિર્વ્યાજં પુત્રિ ગાત્રાણિ

યદ્યદ્વાઞ્છતિ હન્તું યદ્દંષ્ટું યચ્ચ વિલિખિતું ગાત્રમ્ ।
તત્તદપસારણીયં સાવેગં ઢૌકનીયં ચ

દંશે સવ્યથહુઙ્કૃતિમામર્દે વિવિધકણ્ઠરસિતાનિ ।
નખવિલિખને ચ સીત્કૃતમાઘાતેષૂલ્બણં ક્વણિતમ્

હ્રસ્વાયાસશ્વાસાન્ મુઞ્ચન્તી પુલકદન્તુરશરીરા ।
સ્વિદ્યત્સર્વાવયવા પ્રકરિષ્યસિ રાગવૃદ્ધયે પુંસામ્

પરભૃતલાવકહંસકપારાવતતુરગહૃદયનિઃસ્વનિતમ્ ।
અનુકાર્યમુચિતકાલે કલકણ્ઠરુતૈસ્ત્વયા રસતઃ

મા મા મામતિપીડય મુઞ્ચ ક્ષણમદય નો સમર્થાસ્મિ ।
ઇતિ ગદ્ગદાસ્ફુટાક્ષરમભિધાતવ્યસ્ત્વયા કામી

અનુબન્ધમાનુકૂલ્યં વામત્વં પ્રૌઢતામસામર્થ્યમ્ ।
સુરતેષુ દર્શયિષ્યસિ કામુકભાવં સ્ફુટં બુદ્ધ્વા

અસમઞ્જસમશ્લીલં દૂરોજ્ઝિતધૈર્યમવિનયપ્રસરમ્ ।
વ્યવહારમાચરિષ્યસિ વૃદ્ધિમુપેતે રતાવેગે