કુટ્ટનીમત · શ્લોક 121-140

સહજવિલાસનિવાસં તસ્યા વપુરનભિવીક્ષમાણસ્ય ।
મન્યે નાકાધિપતેઃ સહસ્રમપિ ચક્ષુષાં વિફલમ્

શિથિલયતુ કુસુમચાપં ક્ષિપતુ શરાન્ બાણધૌ મનોજન્મા ।
સંસારસારભૂતા વિચરતિ ભુવિ માલતી યાવત્

વાત્સ્યાયનમદનોદયદત્તકવિટવૃત્તરાજપુત્રાદ્યૈઃ ।
ઉચ્છ્વસિતં યત્કિં ચિત્તત્તસ્યા હૃદયદેશમધ્યાસ્તે

ભરતવિશાખિલદત્તિલવૃક્ષાયુર્વેદચિત્રસૂત્રેષુ ।
પત્રચ્છેદવિધાને ભ્રમકર્મણિ પુસ્તસૂદશાસ્ત્રેષુ

આતોદ્યવાદનવિધૌ નૃત્તે ગીતે ચ કૌશલં તસ્યાઃ ।
અભિધાતું યદિ શક્તો વદનસહસ્રેણ ભોગિનામીશઃ

પરિગલદાલોલાંશુકમપયન્ત્રણમુપરિ માલતી રભસાત્ ।
નિપતતિ નાપુણ્યવતાં રતિલાલસમાનસા રહસિ

રતિરસરભસાસ્ફાલનચલવલયનિનાદમિશ્રિતં તસ્યાઃ ।
તત્કાલોચિતમણિતં શ્રુતિપથમુપયાતિ નાલ્પપુણ્યસ્ય

ઇત્થમભિધીયમાનઃ શુભમધ્યે યદિ ભવેદુદાસીનઃ ।
એવં તતો ઽભિધેયઃ સંદર્શિતકોપયા દૂત્યા

કિં સૌભાગ્યમદો ઽયં યૌવનલીલાભિરૂપતાદર્પઃ ।
સહજપ્રેમોપનતાં માલતિકાં ન બહુ મન્યસે યેન

ન ગણયતિ યા કુલીનાન્ દ્રવિણવતઃ શાસ્ત્રવેદિનઃ પ્રણતાન્ ।
સા ભવદર્થે શુષ્યતિ કુસ્થાનનિવેશિતં ધિગનુરાગમ્

કમલવતી તીવ્રરુચૌ બહુભસ્મનિ શમ્ભુશિરસિ શશિલેખા ।
સા ચ ત્વયિ પશુકલ્પે યદભિરતા તેન મે કૃશતા

અસરલમરસં કઠિનં દુર્ગ્રહમસ્નિગ્ધમાશ્રિતા ખદિરમ્ ।
યદુપૈતિ વાચ્યપદવીં માલતિકા તત્કિમાશ્ચર્યમ્?

અથવા કઃ ખલુ દોષો યદતુલ્યતયોપજનિતવૈલક્ષ્યઃ ।
સ્વાધીનામપિ સરસાં પરિહરતિ મૃણાલિકાં ધ્વાઙ્ક્ષઃ

માત્ર કરિષ્યસિ ખેદં નિષ્ઠુરમુક્તો ઽસિ યન્મયા સુભગ ।
યૂનાં હિ રક્તતરુણીસુહૃદભિહિતપરુષમાભરણમ્

ચન્દ્રમસેવ જ્યોત્સ્ના કંસાસુરવૈરિણેવ વનમાલા ।
કુસુમશરાસનલતિકા કુસુમાકરવલ્લભેનેવ

મદલીલા હલિનેવ સ્તનયુગલેનેવ હારલતા ।
રમ્યાપિ સા સુગાત્રી રમ્યતરા ભવતુ સંગતા ભવતા

કિં બહુના યદિ યૂનામુપરિ વિધાતું સમીહસે ચરણમ્ ।
તત્કુરુ રમણીરત્નં પ્રેમોજ્જ્વલમઙ્કતસ્તૂર્ણમ્

અથ તદ્વચનશ્રવણપ્રવિજૃમ્ભિતમદનભટ્ટદાયાદઃ ।
ઉપચરણીયઃ સુન્દરિ નિજવસતિમુપાગતસ્ત્વયાપ્યેવમ્

દૂરાદભ્યુત્થાનં પ્રણમનમાત્માસનપ્રદાનં ચ ।
પ્રવિધેયમઞ્ચલેન પ્રસ્ફોટનમઙ્ઘ્રિયુગલસ્ય

ઈષદયત્નપ્રકટં કક્ષોદરબાહુમૂલકુચભાગમ્ ।
સંદર્શ્ય ઝટિતિ યાસ્યસિ નાયકદૃગ્ગોચરાત્તૂર્ણમ્