કુટ્ટનીમત · શ્લોક 1021-1040

દૂરે કદલીદણ્ડા ઊર્વોરપિ ન સહતે સમાશ્લેષમ્ ।
કરસમ્પર્કાદ્વિમુખી વિશ્રામ્યતિ પલ્લવેષ્વિતિ વિરુદ્ધમ્

અયિ મઞ્જરિ સૈવ ત્વં વિદગ્ધજનમણ્ડિતા પુરી સૈવ ।
કુસુમાયુધઃ સ એવ વ્યસનં કુત એતદાયાતમ્

યસ્યાઃ કામઃ કૃપણો રાગાકૃષ્ટિસ્તૃણોલપપ્રખ્યા ।
સાપિ ગતા ભૂમિમિમાં જીવન્ત્યા નેક્ષ્યતે કિમિહ

અભિયોગશિક્ષિતાનામશિક્ષિતાનાં ચ મદનચેષ્ટાનામ્ ।
સુતનુ વિશેષગ્રહણે સામર્થ્યં તદ્વિદામેવ

વ્યથયન્નપિ સચ્છાયઃ પરિજનચિન્તાકરો ઽપિ રમણીયઃ ।
આધત્તે ત્વયિ લક્ષ્મીમભિનવરાગાશ્રયો રાગઃ

એકઃ સ એવ જાતો ભુવને ઽસ્મિન્નસમસાયકસ્પર્ધી ।
તેન શશિબિમ્બફલકે સુજન્મના લેખિતં નિજં નામ

પાદસ્તેન સલીલં વિન્યસ્તઃ સુભગમાનિનાં મૂર્ધ્નિ ।
સૌભાગ્યયશઃકુસુમં ધનપતિસૂનોઃ કદર્થિતં તેન

નરવઞ્ચનપટુબુદ્ધિઃ સંપાદિતકપટચાટુસંઘટના ।
ત્વમપિ વિલાસિનિ નીતા ગતિમિયતીં યેન સુભગેન

તદ્વદ તસ્ય સ્થાનં યતામહે કાર્યસાધનાયાલમ્ ।
કુર્વત એવ હિ યત્નં ભિષગ્જનાઃ કૃચ્છ્રસાધ્યરોગે ઽપિ

ઇતિ ગદિતે સખ્યા સા તદભિમુખં ચક્ષુષી સમુન્મીલ્ય ।
વિતરતિ કૃચ્છ્રેણ ચિરાદ્વિભાવિતં ક્લિષ્ટહુઙ્કારમ્

કા પુરુષાર્થસમીહા દ્યોતયતઃ શર્વરીં શશાઙ્કસ્ય ।
તર્પયતાં ભુવમખિલાં સલિલમુચાં કો ઽભિકાઙ્ક્ષિતો લાભઃ

મણ્ડયિતું વિયદુદયતિ પુરુહૂતધનુર્વિનૈવ ફલવાઞ્છામ્ ।
અનપેક્ષિતાત્મકાર્યઃ પરહિતકરણગ્રહઃ સતાં સહજઃ

પ્રાયેણ યન્નિદાનં તદસેવનમુપશમાય રોગાણામ્ ।
સ્મરમાન્દ્યં તુ યદુત્થં તદેવ ખલુ ભેષજં યતસ્તસ્ય

તેન સ્પૃહયતિ સુતનુસ્ત્વત્પાદયુગાબ્જરેણુસંગતયે ।
આશીર્વિષયોપેતે સમ્ભોગસુખોદયે તુ નાકાઙ્ક્ષા

પ્રમદમુપૈતિ મયૂરી પરમં શબ્દેન વારિવાહસ્ય ।
અનિમિષવિલોકિતેન પ્રાપ્નોતિ ઝષી કૃતાર્થતામેવ

ન વૃથાસ્તુતિમુખરતયા ન ચ યુષ્મલ્લોભનાભિયોગેન ।
વિદધામિ તદ્ગુણાખ્યાં સ્વરૂપમાત્રપ્રસઙ્ગેન

સદ્ભાવબદ્ધમૂલે સ્મિતદૃષ્ટિભ્રૂવિકારપલ્લવિતે ।
સેવન્તે હૃદ્યરસાં રાગતરૌ મઞ્જરીં ધન્યાઃ

તિષ્ઠતુ તદઙ્ગસઙ્ગો વિલોકિતા યેન ઝગિતિ વરગાત્રી ।
તસ્યાન્યો યુવતિજનઃ પ્રતિભાતિ મનુષ્યરૂપેણ

સકૃદપિ યૈરનુભૂતસ્તત્તનુપરિરમ્ભસુખરસાસ્વાદઃ ।
વિદ્ધિ નરાધિપ તેષાં દૂરીભૂતં પ્રજાકાર્યમ્

આસ્થા કા ખલુ તસ્યા વિષયગ્રહદુર્બલેષુ પુરુષેષુ ।
યસ્યા વિલાસજાલકપતિતઃ શકુનાયતે કપિલઃ