કૂર્મ પુરાણ · અધ્યાય 2.35

ઇતિ શ્રીકૂર્મપુરાણે ષટ્સાહસ્ત્ર્યાં સંહિતાયામુપરિવિભાગે ચતુસ્ત્રિંશો ઽધ્યાયઃ
સૂત ઉવાચ
અન્યત્ પવિત્રં વિપુલં તીર્થં ત્રૈલોક્યવિશ્રુતમ્ ।
રુદ્રકોટિરિતિ ખ્યાતં રુદ્રસ્ય પરમેષ્ઠિનઃ

પુરા પુણ્યતમે કાલે દેવદર્શનતત્પરાઃ ।
કોટિબ્રહ્મર્ષયો દાન્તાસ્તં દેશમગમન્ પરમ્

અહં દ્રક્ષ્યામિ ગિરિશં પૂર્વમેવ પિનાકિનમ્ ।
અન્યો ઽન્યં ભક્તિયુક્તાનાં વ્યાઘાતો જાયતે કિલ

તેષાં ભક્તિં તદા દૃષ્ટ્વા ગિરિશો યોગિનાં ગુરુઃ ।
કોટિરૂપો ઽભવદ્ રુદ્રો રુદ્રકોટિસ્તતઃ સ્મૃતઃ

તે સ્મ સર્વે મહાદેવં હરં ગિરિગુહાશયમ્ ।
પશ્યન્તઃ પાર્વતીનાથં હૃષ્ટપુષ્ટધિયો ઽભવન્

અનાદ્યન્તં મહાદેવં પૂર્વમેવાહમીશ્વરમ્ ।
દૃષ્ટવાનિતિ ભક્ત્યા તે રુદ્રન્યસ્તધિયો ઽભવન્

અથાન્તરિક્ષે વિમલં પશ્યન્તિ સ્મ મહત્તરમ્ ।
જ્યોતિસ્તત્રૈવ તે સર્વે ઽભિલષન્તઃ પરં પદમ્

એતત્ સદેશાધ્યુષિતં તીર્થં પુણ્યતમં શુભમ્ ।
દૃષ્ટ્વા રુદ્રં સમભ્યર્ચ્ય રુદ્રસામીપ્યમાપ્નુયાત્

અન્યચ્ચ તીર્થપ્રવરં નામ્ના મધુવનં સ્મૃતમ્ ।
તત્ર ગત્વા નિયમવાનિન્દ્રસ્યાર્ધાસનં લભેત્

અથાન્યત્પુષ્પનગરી દેશઃ પુણ્યતમઃ શુભઃ ।
તત્ર ગત્વા પિતૄન્ પૂજ્ય કુલાનાં તારયેચ્છતમ્

કાલઞ્જરં મહાતીર્થં લોકે રુદ્રો મહેશ્વરઃ ।
કાલં જરિતવાન્ દેવો યત્ર ભક્તિપ્રિયો હરઃ

શ્વેતો નામ શિવે ભક્તો રાજર્ષિપ્રવરઃ પુરા ।
તદાશીસ્તન્નમસ્કારઃ પૂજયામાસ શૂલિનમ્

સંસ્થાપ્ય વિધિના લિઙ્ગં ભક્તિયોગપુરઃ સરઃ ।
જજાપ રુદ્રમનિશં તત્ર સંન્યસ્તમાનસઃ

સ તં કાલો ઽથ દીપ્તાત્મા શૂલમાદાય ભીષણમ્ ।
નેતુમભ્યાગતો દેશં સ રાજા યત્ર તિષ્ઠતિ

વીક્ષ્ય રાજા ભયાવિષ્ટઃ શૂલહસ્તં સમાગતમ્ ।
કાલં કાલકરં ઘોરં ભીષણં ચણ્ડદીધિતિમ્

ઉબાભ્યામથ હસ્તાભ્યાં સ્પૃટ્વાસૌ લિઙ્ગમૈશ્વરમ્ ।
નનામ શિરસા રુદ્રં જજાપ શતરુદ્રિયમ્

જપન્તમાહ રાજાનં નમન્તમસકૃદ્ ભવમ્ ।
એહ્યેહીતિ પુરઃ સ્થિત્વા કૃતાન્તઃ પ્રહસન્નિવ

તમુવાચ ભયાવિષ્ટો રાજા રુદ્રપરાયણઃ ।
એકમીશાર્ચનરતં વિહાયાન્યં નિષૂદય

ઇત્યુક્તવન્તં ભગવાનબ્રવીદ્ ભીતમાનસમ્ ।
રુદ્રાર્ચનરતો વાન્યો મદ્વશે કો ન તિષ્ઠતિ

એવમુક્ત્વા સ રાજાનં કાલો લોકપ્રકાલનઃ ।
બબન્ધ પાશૈ રાજાપિ જજાપ શતરુદ્રિયમ્

અથાન્તરિક્ષે વિમલં દીપ્યમાનં
તેજોરાશિં ભૂતભર્તુઃ પુરાણમ્ ।
જ્વાલામાલાસંવૃતં વ્યાપ્ય વિશ્વં
પ્રાદુર્ભૂતં સંસ્થિતં સંદદર્શ

તન્મધ્યે ઽસૌ પુરુષં રુક્મવર્ણં
દેવ્યા દેવં ચન્દ્રલેખોજ્જ્વલાઙ્ગમ્ ।
તેજોરૂપં પશ્યતિ સ્માતિહૃષ્ટો
મેને ચાસ્મન્નાથ આગચ્છતીતિ

આગચ્છન્તં નાતિદૂરે ઽથ દૃષ્ટ્વા
કાલો રુદ્રં દેવદેવ્યા મહેશમ્ ।
વ્યપેતભીરખિલેશૈકનાથં
રાજર્ષિસ્તં નેતુમભ્યાજગામ

આલોક્યાસૌ ભગવાનુગ્રકર્મા
દેવો રુદ્રો ભૂતભર્તા પુરાણઃ ।
એકં ભક્તં મત્પરં માં સ્મરન્તં
દેહીતીમં કાલમૂચે મમેતિ

શ્રુત્વા વાખ્યં ગોપતેરુગ્રભાવઃ
કાલાત્માસૌ મન્યમાનઃ સ્વભાવમ્ ।
બદ્ધ્વા ભક્તં પુનરેવાથ પાશૈઃ
ક્રુદ્ધો રુદ્રમભિદુદ્રાવ વેગાત્

પ્રેક્ષ્યાયાન્તં શૈલપુત્રીમથેશઃ
સો ઽન્વીક્ષ્યાન્તે વિશ્વમાયાવિધિજ્ઞઃ ।
સાવજ્ઞં વૈ વામપાદેન મૃત્યું
શ્વેતસ્યૈનં પશ્યતો વ્યાજઘાન

મમાર સો ઽતિભીષણો મહેશપાદઘાતિતઃ ।
રરાજ દેવતાપતિઃ સહોમયા પિનાકધૃક્

નિરીક્ષ્ય દેવમીશ્વરં પ્રહૃષ્ટમાનસો હરમ્ ।
નનામ સામ્બમવ્યયં સ રાજપુઙ્ગવસ્તદા

નમો ભવાય હેતવે હરાય વિશ્વસંભવે ।
નમઃ શિવાય ધીમતે નમો ઽપવર્ગદાયિને

નમો નમો નમો ઽસ્તુ તે મહાવિભૂતયે નમઃ ।
વિભાગહીનરૂપિણે નમો નરાધિપાય તે

નમો ઽસ્તુ તે ગણેશ્વર પ્રપન્નદુઃ ખનાશન ।
અનાદિનિત્યભૂતયે વરાહશૃઙ્ગધારિણે

નમો વૃષધ્વજાય તે કપાલમાલિને નમઃ ।
નમો મહાનટાય તે નમો વૃષધ્વજાય તે

અથાનુગૃહ્ય શઙ્કરઃ પ્રણામતત્પરં નૃપમ્ ।
સ્વગાણપત્યમવ્યયં સરૂપતામથો દદૌ

સહોમયા સપાર્ષદઃ સરાજપુઙ્ગવો હરઃ ।
મુનીશસિદ્ધવન્દિતઃ ક્ષણાદદૃશ્યતામગાત્

કાલે મહેશાભિહતે લોકનાથઃ પિતામહઃ ।
અયાચત વરં રુદ્રં સજીવો ઽયં ભવત્વિતિ

નાસ્તિ કશ્ચિદપીશાન દોષલેશો વૃષધ્વજ ।
કૃતાન્તસ્યૈવ ભવતા તત્કાર્યે વિનિયોજિતઃ

સ દેવદેવવચનાદ્ દેવદેવેશ્વરો હરઃ ।
તથાસ્ત્વિત્યાહ વિશ્વાત્મા સો ઽપિ તાદૃગ્વિધો ઽભવત્

ઇત્યેતત્ પરમં તીર્થં કાલઞ્જરમિતિ શ્રુતમ્ ।
ગત્વાભ્યર્ચ્ય મહાદેવં ગાણપત્યં સ વિન્દતિ