કુમારસંભવ · અધ્યાય 8

પાણિપીડનવિધેર્ અનન્તરં શૈલરાજદુહિતુર્ હરં પ્રતિ
ભાવસાધ્વસપરિગ્રહાદ્ અભૂત્ કામદોહદમનોહરં વપુઃ ॥

વ્યાહૃતા પ્રતિવચો ન સન્દધે ગન્તુમ્ ઐચ્છદ્ અવલમ્બિતાંશુકા
સેવતે સ્મ શયનં પરાઙ્મુખી સા તથાપિ રતયે પિનાકિનઃ ॥

કૈતવેન શયિતે કુતૂહલાત્ પાર્વતી પ્રતિમુખં નિપાતિતમ્
ચક્ષુર્ ઉન્મિષતિ સસ્મિતં પ્રિયે વિદ્યુદાહતમ્ ઇવ ન્યમીલયત્ ॥

નાભિદેશનિહિતઃ સકમ્પયા શઙ્કરસ્ય રુરુધે તયા કરઃ
તદ્દુકૂલમ્ અથ ચાભવત્ સ્વયં દૂરમ્ ઉચ્છ્વસિતનીવિબન્ધનમ્ ॥

એવમ્ આલિ નિગૃહીતસાધ્વસં શઙ્કરો રહસિ સેવ્યતામ્ ઇતિ
સા સખીભિર્ ઉપદિષ્ટમ્ આકુલા નાસ્મરત્ પ્રમુખવર્તિનિ પ્રિયે ॥

અપ્ય્ અવસ્તુનિ કથાપ્રવૃત્તયે પ્રશ્નતત્પરમ્ અનઙ્ગશાસનમ્
વીક્ષિતેન પરિગૃહ્ય પાર્વતી મૂર્ધકમ્પમયમ્ ઉત્તરં દદૌ ॥

શૂલિનઃ કરતલદ્વયેન સા સંનિરુધ્ય નયને હૃતાંશુકા
તસ્ય પશ્યતિ લલાટલોચને મોઘયત્નવિધુરા રહસ્ય્ અભૂત્ ॥

ચુમ્બનેષ્વ્ અધરદાનવર્જિતં સન્નહસ્તમ્ અદયોપગૂહને
ક્લિષ્ટમન્મથમ્ અપિ પ્રિયં પ્રભોર્ દુર્લભપ્રતિકૃતં વધૂરતમ્ ॥

યન્ મુખગ્રહણમ્ અક્ષતાધરં દત્તમ્ અવ્રણપદં નખં ચ યત્
યદ્ રતં ચ સદયં પ્રિયસ્ય તત્ પાર્વતી વિષહતે સ્મ નેતરત્ ॥

રાત્રિવૃત્તમ્ અનુયોક્તુમ્ ઉદ્યતં સા વિભાતસમયે સખીજનમ્
નાકરોદ્ અપકુતૂહલં હ્રિયા શંસિતું ચ હૃદયેન તત્વરે ॥

દર્પણે ચ પરિભોગદર્શિની પૃષ્ઠતઃ પ્રણયિનો નિષેદુષઃ
પ્રેક્ષ્ય બિમ્બમ્ અનુ બિમ્બમ્ આત્મનઃ કાનિ કાનિ ન ચકાર લજ્જયા ॥

નીલકણ્ઠપરિભુક્તયૌવનાં તાં વિલોક્ય જનની સમાશ્વસત્
ભર્તૃવલ્લભતયા હિ માનસીં માતુર્ અસ્યતિ શુચં વધૂજનઃ ॥

વાસરાણિ કતિચિત્ કથઞ્ચન સ્થાણુના રતમ્ અકારિ ચાનયા
જ્ઞાતમન્મથરસા શનૈઃ શનૈઃ સા મુમોચ રતિદુઃખશીલતામ્ ॥

સસ્વજે પ્રિયમ્ ઉરોનિપીડિતા પ્રાર્થિતં મુખમ્ અનેન નાહરત્
મેખલાપણયલોલતાં ગતં હસ્તમ્ અસ્ય શિથિલં રુરોધ સા ॥

ભાવસૂચિતમ્ અદૃષ્ટવિપ્રિયં ચાટુમત્ ક્ષણવિયોગકાતરમ્
કૈશ્ચિદ્ એવ દિવસૈસ્ તદા તયોઃ પ્રેમ રૂઢમ્ ઇતરેતરાશ્રયમ્ ॥

તં યથાત્મસદૃશં વરં વધૂર્ અન્વરજ્યત વરસ્ તથૈવ તામ્
સાગરાદ્ અનપગા હિ જાહ્નવી સો ઽપિ તન્મુખરસૈકનિર્વૃતિઃ ॥

શિષ્યતાં નિધુવનોપદેશિનઃ શઙ્કરસ્ય રહસિ પ્રપન્નયા
શિક્ષિતં યુવતિનૈપુણં તયા યત્ તદ્ એવ ગુરુદક્ષિણીકૃતમ્ ॥

દષ્ટમુક્તમ્ અધરોષ્ઠમ્ આમ્બિકા વેદનાવિધુતહસ્તપલ્લવા
શીતલેન નિરવાપયત્ ક્ષણં મૌલિચન્દ્રશકલેન શૂલિનઃ ॥

ચુમ્બનાદલકચૂર્ણદૂષિતં શઙ્કરો ઽપિ નયનં લલાટજમ્
ઉચ્છ્વસત્કમલગન્ધયે દદૌ પાર્વતીવદનગન્ધવાહિને ॥

એવમ્ ઇન્દ્રિયસુખસ્ય વર્ત્મનઃ સેવનાદ્ અનુગૃહીતમન્મથઃ
શૈલરાજભવને સહોમયા માસમાત્રમ્ અવસદ્ વૃષધ્વજઃ ॥

સો ઽનુમાન્ય હિમવન્તમ્ આત્મભૂર્ આત્મજાવિરહદુઃખખેદિતમ્
તત્ર તત્ર વિજહાર સંપતન્ન્ અપ્રમેયગતિના કકુદ્મતા ॥

મેરુમ્ એત્ય મરુદાશુગોક્ષકઃ પાર્વતીસ્તનપુરસ્કૃતાન્ કૃતી
હેમપલ્લવવિભઙ્ગસંસ્તરાન્ અન્વભૂત્ સુરતમર્દનક્ષમાન્ ॥

પદ્મનાભચરણાઙ્કિતાશ્મસુ પ્રાપ્તવત્સ્વ્ અમૃતવિપ્રુષો નવાઃ
મન્દરસ્ય કટકેષુ ચાવસત્ પાર્વતીવદનપદ્મષટ્પદઃ ॥

વારણધ્વનિતભીતયા તયા કણ્ઠસક્તઘનબાહુબન્ધનઃ
એકપિઙ્ગલગિરૌ જગદ્ગુરુર્ નિર્વિવેશ વિશદાઃ શશિપ્રભાઃ ॥

તસ્ય જાતુ મલયસ્થલીરતે ધૂતચન્દનલતઃ પ્રિયાક્લમમ્
આચચામ સલવઙ્ગકેસરશ્ ચાટુકાર ઇવ દક્ષિણાનિલઃ ॥

હેમતામરસતાડિતપ્રિયા તત્કરામ્બુવિનિમીલિતેક્ષણા
ખે વ્યગાહત તરઙ્ગિણીમ્ ઉમા મીનપઙ્ક્તિપુનરુક્તમેખલા ॥

તાં પુલોમતનયાલકોચિતૈઃ પારિજાતકુસુમૈઃ પ્રસાધયન્
નન્દને ચિરમ્ અયુગ્મલોચનઃ સસ્પૃહં સુરવધૂભિર્ ઈક્ષિતઃ ॥

ઇત્ય્ અભૌમમ્ અનુભૂય શઙ્કરઃ પાર્થિવં ચ દયિતાસખઃ સુખમ્
લોહિતાયતિ કદાચિદ્ આતપે ગન્ધમાદનગિરિં વ્યગાહત ॥

તત્ર કાઞ્ચનશિલાતલાશ્રયો નેત્રગમ્યમ્ અવલોક્ય ભાસ્કરમ્
દક્ષિણેતરભુજવ્યપાશ્રયાં વ્યાજહાર સહધર્મચારિણીમ્ ॥

પદ્મકાન્તિમ્ અરુણત્રિભાગયોઃ સંક્રમય્ય તવ નેત્રયોર્ ઇવ
સંક્ષયે જગદ્ ઇવ પ્રજેશ્વરઃ સંહરત્ય્ અહર્ અસાવ્ અહર્પતિઃ ॥

સીકરવ્યતિકરં મરીચિભિર્ દૂરયત્ય્ અવનતે વિવસ્વતિ
ઇન્દ્રચાપપરિવેષશૂન્યતાં નિર્ઝરાસ્ તવ પિતુર્ વ્રજન્ત્ય્ અમી ॥

દષ્ટતામરસકેસરસ્રજોઃ ક્રન્દતોર્ વિપરિવૃત્તકણ્ઠયોઃ
નિઘ્નયોઃ સરસિ ચક્રવાકયોર્ અલ્પમ્ અન્તરમ્ અનલ્પતાં ગતમ્ ॥

સ્થાનમ્ આહ્નિકમ્ અપાસ્ય દન્તિનઃ સલ્લકીવિટપભઙ્ગવાસિતમ્
આવિભાતચરણાય ગૃહ્ણાતે વારિ વારિરુહબદ્ધષટ્પદમ્ ॥

પશ્ય પશ્ચિમદિગન્તલમ્બિના નિર્મિતં મિતકથે વિવસ્વતા
દીર્ઘયા પ્રતિમયા સરો ઽમ્ભસાં તાપનીયમ્ ઇવ સેતુબન્ધનમ્ ॥

ઉત્તરન્તિ વિનિકીર્ય પલ્વલં ગાઢપઙ્ક્તમ્ અતિવાહિતાતપાઃ
દંષ્ટ્રિણો વનવરાહયૂથપા દષ્ટભઙ્ગુરબિસાઙ્કુરા ઇવ ॥

એષ વૃક્ષશિખરે કૃતાસ્પદો જાતરૂપરસગૌરમણ્ડલઃ
હીયમાનમ્ અહર્ અત્યયાતપં પીવરોરુ પિબતીવ બર્હિણઃ ॥

પૂર્વભાગતિમિરપ્રવૃત્તિભિર્ વ્યક્તપઙ્કમ્ ઇવ જાતમ્ એકતઃ
ખં હૃતાતપજલં વિવસ્વતા ભાતિ કિઞ્ચિદ્ ઇવ શેષવત્ સરઃ ॥

આવિશદ્ભિર્ ઉટજાઙ્ગણં મૃગૈર્ મૂલસેકસરસૈશ્ ચ વૃક્ષકૈઃ
આશ્રમાઃ પ્રવિશદગ્નિધેનવો બિભ્રતિ શ્રિયમ્ ઉદીરિતાગ્નયઃ ॥

બદ્ધકોશમ્ અપિ તિષ્ઠતિ ક્ષણં સાવશેષવિવરં કુશેશયમ્
ષટ્પદાય વસતિં ગ્રહીષ્યતે પ્રીતિપૂર્વમ્ ઇવ દાતુમ્ અન્તરમ્ ॥

દૂરમગ્રપરિમેયરશ્મિના વારુણી દિગ્ અરુણેન ભાનુના
ભાતિ કેસરવતેવ મણ્ડિતા બન્ધુજીવતિલકેન કન્યકા ॥

સામભિઃ સહચરાઃ સહસ્રશઃ સ્યન્દનાશ્વહૃદયઙ્ગમસ્વરૈઃ
ભાનુમ્ અગ્નિપરિકીર્ણતેજસં સંસ્તુવન્તિ કિરણોષ્મપાયિનઃ ॥

સો ઽયમ્ આનતશિરોધરૈર્ હયૈઃ કર્ણચામરવિઘટ્ટિતેક્ષણૈઃ
અસ્તમ્ એતિ યુગભુગ્નકેસરૈઃ સંનિધાય દિવસં મહોદધૌ ॥

ખં પ્રસુપ્તમ્ ઇવ સંસ્થિતે રવૌ તેજસો મહત ઈદૃશી ગતિઃ
તત્ પ્રકાશયતિ યાવદ્ ઉદ્ગતં મીલનાય ખલુ તાવતશ્ ચ્યુતમ્ ॥

સંધ્યયાપ્ય્ અનુગતં રવેર્ વપુર્ વન્દ્યમ્ અસ્તશિખરે સમર્પિતમ્
યેન પૂર્વમ્ ઉદયે પુરસ્કૃતા નાનુયાસ્યતિ કથં તમ્ આપદિ ॥

રક્તપીતકપિશાઃ પયોમુચાં કોટયઃ કુટિલકેશિ ભાન્ત્ય્ અમૂઃ
દ્રક્ષ્યસિ ત્વમ્ ઇતિ સંધ્યયાનયા વર્તિકાભિર્ ઇવ સાધુમણ્ડિતાઃ ॥

સિંહકેસરસટાસુ ભૂભૃતાં પલ્લવપ્રસવિષુ દ્રુમેષુ ચ
પશ્ય ધાતુશિખરેષુ ભાનુના સંવિભક્તમ્ ઇવ સાંધ્યમ્ આતપમ્ ॥

અદ્રિરાજતનયે તપસ્વિનઃ પાવનામ્બુવિહિતાઞ્જલિક્રિયાઃ
બ્રહ્મ ગૂઢમ્ અભિસંધ્યમ્ આદૃતાઃ શુદ્ધયે વિધિવિદો ગૃણન્ત્ય્ અમી ॥

તન્ મુહૂર્ત્તમ્ અનુમન્તુમ્ અર્હસિ પ્રસ્તુતાય નિયમાય મામ્ અપિ
ત્વાં વિનોદનિપુણઃ સખીજનો વલ્ગુવાદિનિ વિનોદયિષ્યતિ ॥

નિર્વિભુજ્ય દશનચ્છદં તતો વાચિ ભર્તુર્ અવધીરણાપરા
શૈલરાજતનયા સમીપગામ્ આલલાપ વિજયામ્ અહેતુકમ્ ॥

ઈશ્વરો ઽપિ દિવસાત્યયોચિતં મન્ત્રપૂર્વમ્ અનુતસ્થિવાન્ વિધિમ્
પાર્વતીમ્ અવચનામ્ અસૂયયા પ્રત્યુપેત્ય પુનર્ આહ સસ્મિતમ્ ॥

મુઞ્ચ કોપમ્ અનિમિત્તકોપને સંધ્યયા પ્રણમિતો ઽસ્મિ નાન્યયા
કિં ન વેત્સિ સહધર્મચારિણં ચક્રવાકસમવૃત્તિમ્ આત્મનઃ ॥

નિર્મિતેષુ પિતૃષુ સ્વયંભુવા યા તનુઃ સુતનુ પૂર્વમ્ ઉજ્ઝિતા
સેયમ્ અસ્તમ્ ઉદયં ચ સેવતે તેન માનિનિ મમાત્ર ગૌરવમ્ ॥

તામ્ ઇમાં તિમિરવૃદ્ધિપીડિતાં શૈલરાજતનયે ઽધુના સ્થિતામ્
એકતસ્ તટતમાલમાલિનીં પશ્ય ધાતુરસનિમ્નગામ્ ઇવ ॥

સાન્ધ્યમ્ અસ્તમિતશેષમ્ આતપં રક્તલેખમ્ અપરા બિભર્તિ દિક્
સાંપરાયવસુધા સશોણિતં મણ્ડલાગ્રમ્ ઇવ તિર્યગુજ્ઝિતમ્ ॥

યામિનીદિવસસન્ધિસમ્ભવે તેજસિ વ્યવહિતે સુમેરુણા
એતદ્ અન્ધતમસં નિરઙ્કુશં દિક્ષુ દીર્ઘનયને વિજૃમ્ભતે ॥

નોર્ધ્વમ્ ઈક્ષણગતિર્ ન ચાપ્ય્ અધો નાભિતો ન પુરતો ન પૃષ્ઠતઃ
લોક એષ તિમિરૌઘવેષ્ટિતો ગર્ભવાસ ઇવ વર્તતે નિશિ ॥

શુદ્ધમ્ આવિલમ્ અવસ્થિતં ચલં વક્રમ્ આર્જવગુણાન્વિતં ચ યત્
સર્વમ્ એવ તમસા સમીકૃતં ધિઙ્ મહત્ત્વમ્ અસતાં હૃતાન્તરમ્ ॥

નૂનમ્ ઉન્નમતિ યજ્વનાં પતિઃ શાર્વરસ્ય તમસો નિષિદ્ધયે
પુણ્ડરીકમુખિ પૂર્વદિઙ્મુખં કૈતકૈર્ ઇવ રજોભિર્ આવૃતમ્ ॥

મન્દરાન્તરિતમૂર્તિના નિશા લક્ષ્યતે શશભૃતા સતારકા
ત્વં મયા પ્રિયસખીસમાગતા શ્રોષ્યતેવ વચનાનિ પૃષ્ઠતઃ ॥

રુદ્ધનિર્ગમનમ્ આ દિનક્ષયાત્ પૂર્વદૃષ્ટતનુચન્દ્રિકાસ્મિતમ્
એતદ્ ઉદ્ગિરતિ ચન્દ્રમણ્ડલં દિગ્રહસ્યમ્ ઇવ રાત્રિચોદિતમ્ ॥

પશ્ય પક્વફલિનીફલત્વિષા બિમ્બલાઞ્છિતવિયત્સરો ઽમ્ભસા
વિપ્રકૃષ્ટવિવરં હિમાંશુના ચક્રવાકમિથુનં વિડમ્બ્યતે ॥

શક્યમ્ ઓષધિપતેર્ નવોદયાઃ કર્ણપૂરરચનાકૃતે તવ
અપ્રગલ્ભયવસૂચિકોમલાશ્ છેત્તુમ્ અગ્રનખસંપુટૈઃ કરાઃ ॥

અઙ્ગુલીભિર્ ઇવ કેશસંચયં સન્નિગૃહ્ય તિમિરં મરીચિભિઃ
કુડ્મલીકૃતસરોજલોચનં ચુમ્બતીવ રજનીમુખં શશી ॥

પશ્ય પાર્વતિ નવેન્દુરશ્મિભિઃ સામિભિન્નતિમિરં નભસ્તલમ્
લક્ષ્યતે દ્વિરદભોગદૂષિતં સંપ્રસીદદ્ ઇવ માનસં સરઃ ॥

રક્તભાવમ્ અપહાય ચન્દ્રમા જાત એષ પરિશુદ્ધમણ્ડલઃ
વિક્રિયા ન ખલુ કાલદોષજા નિર્મલપ્રકૃતિષુ સ્થિરોદયા ॥

ઉન્નતેષુ શશિનઃ પ્રભા સ્થિતા નિમ્નસંશ્રયપરં નિશાતમઃ
નૂનમ્ આત્મસદૃશી પ્રકલ્પિતા વેધસેહ ગુણદોષયોર્ ગતિઃ ॥

ચન્દ્રપાદજનિતપ્રવૃત્તિભિશ્ ચન્દ્રકાન્તજલબિન્દુભિર્ ગિરિઃ
મેખલાતરુષુ નિદ્રિતાન્ અમૂન્ બોધયત્ય્ અસમયે શિખણ્ડિનઃ ॥

કલ્પવૃક્ષશિખરેષુ સંપ્રતિ પ્રસ્ફુરદ્ભિર્ ઇવ પશ્ય સુન્દરિ
હારયષ્ટિગણનામ્ ઇવાંશુભિઃ કર્તુમ્ આગતકુતૂહલઃ શશી ॥

ઉન્નતાવનતભાવવત્તયા ચન્દ્રિકા સતિમિરા ગિરેર્ ઇયમ્
ભક્તિભિર્ બહુવિધાભિર્ અર્પિતા ભાતિ ભૂતિર્ ઇવ મત્તદન્તિનઃ ॥

એતદ્ ઉચ્છ્વસિતપીતમ્ ઐન્દવં વોઢુમ્ અક્ષમમ્ ઇવ પ્રભારસમ્
મુક્તષટ્પદવિરાવમ્ અઞ્જસા ભિદ્યતે કુમુદમ્ આ નિબન્ધનાત્ ॥

પશ્ય કલ્પતરુલમ્બિ શુદ્ધયા જ્યોત્સ્નયા જનિતરૂપસંશયમ્
મારુતે ચલતિ ચણ્ડિ કેવલં વ્યજ્યતે વિપરિવૃત્તમ્ અંશુકમ્ ॥

શક્યમ્ અઙ્ગુલિભિર્ ઉદ્ધૃતૈર્ અધઃ શાખિનાં પતિતપુષ્પપેશલૈઃ
પત્રજર્જરશશિપ્રભાલવૈર્ એભિર્ ઉત્કચયિતું તવાલકાન્ ॥

એષ ચારુમુખિ યોગતારયા યુજ્યતે તરલબિમ્બયા શશી
સાધ્વસાદ્ ઉપગતપ્રકમ્પયા કન્યયેવ નવદીક્ષયા વરઃ ॥

પાકભિન્નશરકાણ્ડગૌરયોર્ ઉલ્લસત્પ્રતિકૃતિપ્રસન્નયોઃ
રોહતીવ તવ ગણ્ડલેખયોશ્ ચન્દ્રબિમ્બનિહિતાક્ષ્ણિ ચન્દ્રિકા ॥

લોહિતાર્કમણિભાજનાર્પિતં કલ્પવૃક્ષમધુ બિભ્રતી સ્વયમ્
ત્વામ્ ઇયં સ્થિતિમતીમ્ ઉપસ્થિતા ગન્ધમાદનવનાધિદેવતા ॥

આર્દ્રકેસરસુગન્ધિ તે મુખં મત્તરક્તનયનં સ્વભાવતઃ
અત્ર લબ્ધવસતિર્ ગુણાન્તરં કિં વિલાસિનિ મદઃ કરિષ્યતિ ॥

માન્યભક્તિર્ અથવા સખીજનઃ સેવ્યતામ્ ઇદમ્ અનઙ્ગદીપનમ્
ઇત્ય્ ઉદારમ્ અભિધાય શઙ્કરસ્ તામ્ અપાયયત પાનમ્ અમ્બિકામ્ ॥

પાર્વતી તદુપયોગસમ્ભવાં વિક્રિયામ્ અપિ સતાં મનોહરામ્
અપ્રતર્ક્યવિધિયોગનિર્મિતામ્ આમ્રતેવ સહકારતાં યયૌ ॥

તત્ક્ષણં વિપરિવર્તિતહ્રિયોર્ નેષ્યતોઃ શયનમ્ ઇદ્ધરાગયોઃ
સા બભૂવ વશવર્તિની દ્વયોઃ શૂલિનઃ સુવદના મદસ્ય ચ ॥

ઘૂર્ણમાનનયનં સ્ખલત્કથં સ્વેદિબિન્દુમદ્ અકારણસ્મિતમ્
આનનેન ન તુ તાવદ્ ઈશ્વરશ્ ચક્ષુષા ચિરમ્ ઉમામુખં પપૌ ॥

તાં વિલમ્બિતપનીયમેખલામ્ ઉદ્વહઞ્ જઘનભારદુર્વહામ્
ધ્યાનસંભૃતવિભૂતિર્ ઈશ્વરઃ પ્રાવિશન્ મણિશિલાગૃહં રહઃ ॥

તત્ર હંસધવલોત્તરચ્છદં જાહ્નવીપુલિનચારુદર્શનમ્
અધ્યશેત શયનં પ્રિયાસખઃ શારદાભ્રમ્ ઇવ રોહિણીપતિઃ ॥

ક્લિષ્ટકેશમ્ અવલુપ્તચન્દનં વ્યત્યયાર્પિતનખં સમત્સરમ્
તસ્ય તચ્ છિદુરમેખલાગુણં પાર્વતીરતમ્ અભૂન્ ન તૃપ્તયે ॥

કેવલં પ્રિયતમાદયાલુના જ્યોતિષામ્ અવનતાસુ પઙ્ક્તિષુ
તેન તત્પરિગૃહીતવક્ષસા નેત્રમીલનકુતૂહલં કૃતમ્ ॥

સ વ્યબુધ્યત બુધસ્તવોચિતઃ શતકુમ્ભકમલાકરૈઃ સમમ્
મૂર્ચ્છનાપરિગૃહીતકૈશિકૈઃ કિન્નરૈર્ ઉષસિ ગીતમઙ્ગલઃ ॥

તૌ ક્ષણં શિથિલિતોપગૂહનૌ દમ્પતી ચલિતમાનસોર્ મયઃ
પદ્મભેદપિશુનાઃ સિષેવિરે ગન્ધમાદનવનાન્તમારુતાઃ ॥

ઊરુમૂલનખમાર્ગરાજિભિસ્ તત્ક્ષણં હૃતવિલોચનો હરઃ
વાસસઃ પ્રશિથિલસ્ય સંયમં કુર્વતીં પ્રિયતમામ્ અવારયત્ ॥

સ પ્રજાગરકષાયલોચનં ગાઢદન્તપદતાડિતાધરમ્
આકુલાલકમ્ અરંસ્ત રાગવાન્ પ્રેક્ષ્ય ભિન્નતિલકં પ્રિયામુખમ્ ॥

તેન ભઙ્ગિવિષમોત્તરચ્છદં મધ્યપિણ્ડિતવિસૂત્રમેખલમ્
નિર્મલે ઽપિ શયનં નિશાત્યયે નોજ્ઝિતં ચરણરાગલાઞ્છિતમ્ ॥

સ પ્રિયામુખરસં દિવાનિશં હર્ષવૃદ્ધિજનનં સિષેવિષુઃ
દર્શનપ્રણયિનામ્ અદૃશ્યતામ્ આજગામ વિજયાનિવેદનાત્ ॥

સમદિવસનિશીથં સઙ્ગિનસ્ તત્ર શમ્ભોઃ શતમ્ અગમદ્ ઋતૂનાં સાગ્રમ્ એકા નિશેવ
ન તુ સુરતસુખેષુ છિન્નતૃષ્ણો બભૂવ જ્વલન ઇવ સમુદ્રાન્તર્ગતસ્ તજ્જલેષુ ॥