Kubjikamatatantra · અધ્યાય 6

જપસ્ય લક્ષણં દેવ પૂર્વં હિ કથિતં ત્વયા
એકોચ્ચારશતં જ્ઞેયં સહસ્રં લક્ષમ્ એવ ચ ॥

કોટયસ્ તુ તથા શમ્ભો પૃથગ્લક્ષણલક્ષિતાઃ
ન મે જ્ઞાતં પ્રમાણં તુ જપસ્ય સુરનાયક ॥

તદ્ અહં શ્રોતુમ્ ઇચ્છામિ મન્દબુદ્ધ્યાલ્પચેતસા ॥

યા સા કુણ્ડલિની શક્તિસ્ ચિદ્રૂપા ચ પરા કલા
આદ્યા શક્તિર્ મહેશસ્ય અણુમાત્રા હૃદિ સ્થિતા ॥

સા અણુ[ઃ ] કથિતા તન્ત્રે દ્વે અણૂ ત્રુટિમ્ આશ્રિતા
ત્રુટિભૂતા તુ સા દેવી જપ્તવ્યા તુ પરાપરા ॥

વર્ણહીના પરા પ્રોક્તા અપરા વર્ણરૂપિણી
એવં જ્ઞાત્વા વરારોહે જપઃ કાર્યઃ સદા બુધૈઃ ॥

ત્રુટિરૂપા તુ સા દેવી તદાધારે વ્યવસ્થિતા
કલતે પ્રાણગા નિત્યં દશસ્થાને હ્ય્ અનુક્રમાત્ ॥

બ્રહ્મા વિષ્ણુસ્ તથા રુદ્ર ઈશ્વરો ઽથ સદાશિવઃ
કુણ્ડલી વ્યાપિની ચૈવ પ્રશાન્તા વિષુવત્ તથા ॥

શક્તિસ્થાનં તુ દેવેશિ એતે સ્થાના દશ સ્મૃતાઃ
યેષાં સઞ્ચરતે દેવઃ શિવઃ પરમકારણઃ ॥

ઊર્ધ્વે વા યદિ વા તિર્યક્ સ્વસ્થાને વા સુરેશ્વરિ
પ્રસ્ફુરેત કલૈર્ યુક્તા દશભિસ્ તુ મહાબલૈઃ ॥

દશધા કલનં તેન કથિતં તવ શોભને
પ્રયત્નેન કૃતોચ્ચારં યાવચ્ છક્તિર્ લયં ગતા ॥

તાવદ્ દેવિ શતં પ્રોક્તં વર્ણોચ્ચારે ન સંશયઃ
સ્વાભાવિકમ્ અનુચ્ચાર્ય સૂક્ષ્માધારો જગત્પતિઃ ॥

શતધા કલનં તસ્ય ત્રુટિરૂપસ્ય યોગિનઃ
સહસ્રં તુ સમુદ્દિષ્ટં દશધા પરમેશ્વરિ ॥

ઉભયસ્ય પરિત્યાગાદ્ કલાધારઃ સદાશિવઃ1
દૃક્ક્રિયાજ્ઞાનનિર્મુક્તઃ કલતે ચ સહસ્રધા ॥

લક્ષભેદઃ સમુદ્દિષ્ટ ઇતિ શાસ્ત્રે ન સંશયઃ
જપો હ્ય્ એવં સમુદ્દિષ્ટો યોગિનાં તત્ત્વવેદિનામ્ ॥

લક્ષાતીતો મનાતીતો નિર્મુક્તસ્ તત્ત્વબન્ધનૈઃ
ઉન્મનત્વે સદા લીનો અણુરૂપો નકિઞ્ચનઃ ॥

સત્તામાત્રસ્થિતો દેહી ગુણાનાં પ્રતિબોધકઃ
વિષયભાવનિર્મુક્તઃ કલતે લક્ષધા પ્રિયે ॥

કોટિસ્ તુ ભવતે હ્ય્ એવં જ્ઞાતવ્યં મન્ત્રવાદિભિઃ
સોચ્ચારોપાંશુભૂતસ્ તુ માનસો મનવર્જિતઃ ॥

જપઃ પૂર્વં સમાખ્યાતઃ શાસ્ત્રે શાસ્ત્રે સુરાર્ચિતે
સશબ્દોચ્ચારયોગેન શુદ્ધ્યર્થે કથિતં સ્ફુટમ્ ॥

સિદ્ધ્યર્થે ઽપાંશુર્ ઉદ્દિષ્ટઃ સ્વપ્રવૃત્તો હૃદિ સ્થિતઃ
માનસો યોગહેત્વર્થે ઉભયત્ર વિવર્જિતઃ ॥

મનાતીતો ભવેદ્ દેવિ મોક્ષદસ્ તુ ન સંશયઃ
એવં દેવિ સમાખ્યાતો જપઃ પ્રાણસમસ્ તવ ॥

જપઃ પ્રાણસમઃ કાર્યો દૃષ્ટાદૃષ્ટફલાર્થિનામ્
અવર્ણા વર્ણસંયોગા મયા તે સમુદાહૃતા ॥

નિરાલમ્બે મહાશૂન્યે યત્ તેજમ્ ઉપજાયતે
તદ્ગર્ભે અભ્યસેન્ નિત્યં ભાગ્યહીનો ઽપિ સિધ્યતિ ॥

યોગમૂલી વિશુદ્ધી ચ સાર્ણવે સા ચ એકતા
એકત્ર સંસ્થિતાનન્દં કુલરત્નં ત્રિધા પ્રિયે ॥

મુદ્રા તુ સૂચિતા નાથ ન મે જ્ઞાતા મહાપ્રભો
તન્ મમાચક્ષ્વ દેવેશિ યેન ભ્રાન્તિર્ વિનશ્યતિ ॥

પાતાલોર્ધ્વગતં યચ્ ચ શૃઙ્ગાટપુરમધ્યગમ્
ગોલાકારં તતો દેવિ રન્ધ્રસ્યોર્ધ્વગતં પ્રિયે ॥

ચક્રદ્વયમ્ ઇદં પ્રોક્તં પ્રાધાન્યેન વ્યવસ્થિતમ્
વેધઘટ્ટનિરોધં ચ ઉચ્ચારાકૃષ્ટિકારકમ્ ॥

સ્તોભસ્તમ્ભનમ્ આવેશો ગમં ચૈવાત્ર સુવ્રતે
એતદ્વિરહિતો મન્ત્રી હાસ્યતાં યાતિ નિશ્ચિતમ્ ॥

અનેન જ્ઞાતમાત્રેણ પ્રત્યયાન્ કુરુતે બહૂન્
વૃત્તિરાજા વરારોહે નિવેશ્ય ચક્રમધ્યતઃ ॥

વૃત્તિહીનસ્ તતસ્ તત્ર કાવ્યકર્તા ન સંશયઃ
ચક્રમધ્યે ચ સઞ્ચિન્ત્ય સુશુક્લાં ચ પરાપરામ્ ॥

પુસ્તકવ્યગ્રહસ્તાં ચ જ્ઞાનમુદ્રાધરાં તથા
સ્ફાટિકેનાક્ષસૂત્રેણ સર્વાભરણભૂષિતામ્ ॥

સ્રગ્દામલમ્બિતગલાં પ્રભામણ્ડલમણ્ડિતામ્
દ્વિબાહુ-ર્-એકવદનાં ચન્દ્રકોટિસમપ્રભામ્ ॥

ઉદ્ગિરન્તી[ ં ] મહૌઘેન શાસ્ત્રકોટીર્ અનેકશઃ
એવં ધ્યાનસમાવિષ્ટઃ સાક્ષાદ્ વાગીશ્વરો ભવેત્ ॥

સંસ્કૃતં પ્રાકૃતં ચૈવ વેદસિદ્ધાન્તગહ્વરમ્
ગ્રન્થતશ્ ચાર્થતશ્ ચૈવ ઉદ્ગિરેન્ નાત્ર સંશયઃ ॥

પીઠમધ્યગતાભ્યાસાત્ પીઠદ્વારે ઽથવા પ્રિયે
સમ્પ્રદાયમ્ ઇદં કૌલં શાક્તં શક્તિપદાનુગમ્ ॥

માત્રાયોગેન દેવેશિ મુદ્રાબન્ધં તુ કારયેત્
સા માત્રા ગીયતે ચાત્ર ઉચ્ચારવશવર્તિની ॥

ઉચ્ચરં સહજં દેવિ દેહમધ્યે વ્યવસ્થિતમ્
શતસઙ્ખ્યાપ્રમાણેન યાવદ્ ઉચ્ચરતે પરામ્ ॥

તાવદ્ આવિષ્ટદેહસ્ તુ શાસ્ત્રાર્થં વદતે સુધીઃ
નિત્યારૂપેણ સૈવાત્ર ધ્યાયેદ્ રક્તસમપ્રભામ્ ॥

લાક્ષાલક્તકસઙ્કાશાં ચતુર્વક્ત્રાં ચતુર્ભુજામ્
મૂર્તિત્રયસમોપેતાં ત્રિભિર્ ભેદૈર્ વ્યવસ્થિતામ્ ॥

ત્રિસ્થાં ત્રિમાર્ગગાં દેવીં ત્રિનાડીસમતાં ગતામ્
નિત્યક્લિન્નાં ચ દેવેશિ તથા ચૈવ મદદ્રવામ્ ॥

દેવ્યારૂપધરાં સર્વામ્ એકવક્ત્રાં દ્વિબાહુકામ્
પાશાઙ્કુશધરાં સર્વાં મદવિભ્રાન્તલોચનામ્ ॥

યૌવનસ્થાં મદોન્મત્તાં મદિરાનન્દનન્દિતામ્
સ્મરેદ્ દેવ્યાઃ સ્વરૂપં તુ તત્પ્રયોગવ્યવસ્થયા ॥

તડિત્સહસ્રબન્ધૂક દાડિમીકુસુમદ્યુતિમ્
પઞ્ચશૃઙ્ગાટકાધારાં સા પરા પરરૂપિણી ॥

મહાયોગવિલાસા તુ શિવાદ્યવનિગોચરમ્
વ્યાપયિત્વા સ્થિતા દેવી રવિનક્ષત્રમણ્ડલમ્ ॥

શૃઙ્ગાટકં ચોર્ધ્વમુખં તિર્યગ્રેખાગ્રમૂલગમ્
શિખોર્ધ્વકુણ્ડલાકારં કામશક્તિ-ર્-અધિસ્થિતમ્ ॥

પઞ્ચશૃઙ્ગાટકાસીનં સ્થિતં તત્ર વરાનને
દેવ્યારૂપધરં ચક્રં ધ્યાયેદ્ એવં ન સંશયઃ ॥

એષ બન્ધસ્ તુ મુદ્રાયાઃ કથિતસ્ તે કુલેશ્વરિ
ત્રિતત્ત્વેન તુ મન્ત્રેણ વક્ષ્યમાનેન કારયેત્ ॥

દ્રાવણં ક્ષોભણં ચૈવ આકર્ષવશમ્ એવ ચ
પૂજાવિધાનં દેવેશિ દેવ્યાયા વીરવન્દિતે ॥

ત્રિશિખા પદ્મમુદ્રા ચ યોનિમુદ્રા વિશેષતઃ
તાસાં લક્ષણમ્ આખ્યાહિ યથાવત્ સ્ફુટતો વદ ॥

મુદ્રાણાં લક્ષણં દેવિ કથયામિ સમાસતઃ
હસ્તાભ્યાં કારયેદ્ આદૌ સમ્પુટં ચોર્ધ્વદિઙ્મુખમ્ ॥

અઙ્ગુલ્યા ગ્રથયેત્ સર્વાઃ સંશ્લિષ્ટમ્ ઉભયેષ્વ્ અપિ
તર્જન્યાનામિકૌ કુઞ્ચ્ય સંશ્લિષ્ટૌ મધ્યસંસ્થિતૌ ॥

તાભ્યાં મૂલે મુખં કાર્યં તર્જન્યાયા વરાનને
સંશ્લિષ્ટૌ સમ્મુખૌ દ્વૌ તુ મધ્યમૌ ઊર્ધ્વદિઙ્મુખૌ ॥

સંયોગેન વરારોહે અઙ્ગુષ્ઠૌ ચ કનિષ્ઠકૌ
તાદૃશીવ હિ કર્તવ્યા ત્રિશિખા તુ વિધીયતે ॥

કરાભ્યાં સમ્પુટં કાર્યં મણિબન્ધૌ તુ સંહતૌ
અગ્રાઙ્ગુલ્યા પ્રસાર્યેત અઙ્ગુષ્ઠૌ મધ્યસંસ્થિતૌ ॥

પદ્મમુદ્રા સમાખ્યાતા યોનિમુદ્રામ્ અતઃ શૃણુ
હસ્તાભ્યાં સમ્પુટં કાર્યં કનિષ્ઠા મધ્ય યોજયેત્ ॥

પુટાકારૌ કરૌ કૃત્વા અઙ્ગુષ્ઠૌ મધ્યસંસ્થિતૌ
નિઃસૃતા વામહસ્તસ્ય અઙ્ગુલ્યા તુ કનીયસી ॥

યોનિમુદ્રા સ્મૃતા ભદ્રે સર્વેષાં ક્ષોભકારિકા
એતા મુદ્રાઃ સમાખ્યાતા ધ્યાનપૂજાવિસર્જને ॥

સામ્પ્રતં ખેચરીણાં તુ યથા મુદ્રા ખગાધિપે
કથયામિ સમાસેન ત્વત્પ્રીત્યા ખગગામિની ॥

અનામા કર્ણિકે યોજ્યા ષોડશારં તુ પીડયેત્
પીડનાદ્ ઋજુતાં યાતિ ખગમાર્ગે તુ ભાવિનિ ॥

ફાદિનાન્તગતે લક્ષે ખગતિશ્ ચ ન સંશયઃ
ષટ્પત્ત્રં મૂર્ધ્નિતઃ કૃત્વા તર્જન્યાગ્રે તુ યોજયેત્ ॥

શૂન્યે શૂન્યમનો ભૂત્વા સમ્પીડ્યેત પરસ્પરમ્
ષટ્પત્ત્રં તુ વિકાશ્યેત ઉદાનપ્રેરિતેન તુ ॥

ભાવયેન્ નાદિફાન્તં તુ ખગતીતિ ન સંશયઃ
દ્વાદશારોર્ધ્વનાલેન લમ્બિકાન્તે નિવેશયેત્ ॥

ભેદનં કુઞ્ચિતેનૈવ ચાર્ગલં કૂર્મસંયુતમ્
ભાવયેન્ નાદિફાન્તં તુ ખગતિં વીરવન્દિતે ॥

પદ્મમુદ્રા ત્રિધા પ્રોક્તા યોનિમુદ્રામ્ અતઃ શૃણુ
યોનિં યોનૌ સમાક્રમ્ય મુદ્ગરેણ તુ ભેદનમ્ ॥

વિસર્ગદ્વયસંયોગાત્ ખગગામી ભવેદ્ ધ્રુવમ્
અમૃતાખ્યા પરા યોનિર્ ભાવયેન્ મસ્તકોપરિ ॥

આક્રમ્ય ગન્ધમાર્ગં તુ યોજના નાદિફાન્તગા
ખગતિર્ ભવતે-દ્-એવં યોનિમાર્ગે વિચક્ષણઃ ॥

ઉચ્ચાર્ય વામશક્તિં તુ સન્ધયેદ્ ગ્રન્થિમધ્યતઃ
વિક્ષેપમ્ ઊર્ધ્વતઃ કૃત્વા પરે યોનૌ તુ ભાવના ॥

અનેન ખગગામિત્વં ભવતે તુ ન સંશયઃ
યોનિમુદ્રા સમાખ્યાતા ત્રિભેદા પરિકીર્તિતા ॥

ત્રિશિખાલક્ષણં દેવિ કથ્યમાનં નિબોધત
કરાભ્યાં ચૈવ તર્જન્યાં પીડયેત્ તત્ પ્રયત્નતઃ ॥

બ્રહ્મનાડ્યા દ્વિરભ્યાસાદ્ આસનં મન્દરસ્ય તુ
ત્રિશિખા નામ મુદ્રેયમ્ અર્પણં ખગમાર્ગયોઃ ॥

ગોલકં શૂન્યમાર્ગસ્થં પથત્રયગતં પ્રિયે
ક્ષેપણં બિન્દુકોટ્યૂર્ધ્વમ્ અવનીં ક્રમ્ય પાદયોઃ ॥

ગુહ્યે નિવેશ્ય મન્ત્રજ્ઞસ્ ત્રિશિખં ખેચરં પ્રિયે
અનેન ખગગામી ઽસૌ ભવતે સાધકોત્તમઃ ॥

કરણં ચોર્ધ્વમૂલં સ્યાદ્ બન્ધયેત્ ખગમણ્ડલમ્
આક્રમ્ય પઞ્ચમં તત્ર કરાભ્યાં ચૈવ શૂલિનિ ॥

જાનુકૌ કુર્પરે યોજ્ય વિક્ષેપો ગુહ્યમધ્યતઃ
વેધનં બ્રહ્મરન્ધ્રસ્ય કથિતં તુ તપોધને ॥

ખગમાર્ગગતિસ્ ત્વ્ એવં ભવતે તુ સુલોચને
એષા મુદ્રા સમાખ્યાતા નવભેદૈર્ વ્યવસ્થિતા ॥

મુદ્રા શક્તિર્ ઇતિ ખ્યાતા મુદ્રિતં દ્રાવયિષ્યતિ
તેન મુદ્રા સમાખ્યાતા કથિતા પરમેશ્વરિ ॥

મુદ્રિતં ગોપિતં પ્રોક્તં ચિચ્છક્ત્યા યા પરાપરા
ન જ્ઞાયતે વરારોહે સા તુ મુદ્રા ઉદાહૃતા ॥

અજ્ઞાનમલરૂપેણ યાવદ્ બદ્ધઃ સ પુદ્ગલઃ
ન જાનાતિ પરાત્માનં તાવન્ માયા પ્રવર્તતે ॥

ભિન્ને તમસિ ચૈકત્વં યદા પશ્યતિ માનવઃ
તદા સા તુ પરા પ્રોક્તા બન્ધમોક્ષકરી પ્રિયે ॥

એકા સા પરમા શક્તિઃ સંસ્થિતા તુ શિવેચ્છયા
મોચયન્તિ ગ્રહાદિભ્યઃ પાશૌઘાન્ દ્રાવયન્તિ ચ ॥

મોચનાદ્ દ્રાવણાદ્ યસ્માન્ મુદ્રાખ્યાઃ શક્તયઃ સ્મૃતાઃ
ખગતિર્ હ્ય્ ઊર્ધ્વભાવેન ખગમાર્ગેણ નિત્યશઃ ॥

ચરતે સર્વજન્તૂનાં ખેચરી તેન સા સ્મૃતા
પરત્વ્ઽ એકા તુ સા જ્ઞેયા પુનશ્ ચૈવ ત્રિધા સ્મૃતા ॥

ઇચ્છા જ્ઞાની ક્રિયા સા તુ વર્ણરૂપમ્ ઉપાગતા
પઞ્ચાશભેદભિન્ના સા એકા એવ-મ્-ઉદાહૃતા ॥

અઙ્ગાવયવસમ્પૂર્ણા માલયિત્વા જગત્ સ્થિતા
નાદિફાન્તસ્વરૂપેણ તેન સા માલિની સ્મૃતા ॥

સપ્ત કોટ્યસ્ તુ મન્ત્રાણામ્ અપ્રમેયાસ્ તુ યાઃ સ્મૃતાઃ
સ્વતન્ત્રસ્થાસ્ તુ તાઃ સર્વા મુદ્રિતાઃ પરમેશ્વરિ ॥

તેન મુદ્રા સમાખ્યાતા સદ્યઃપ્રત્યયકારિકા
અવયવે માતૃરૂપા તુ સ્વૈઃ સ્વૈર્ અંશૈર્ વ્યવસ્થિતા ॥

બ્રહ્માંશા ચૈવ રુદ્રાંશા કૌમાર્યાંશા વરાનને
વૈષ્ણવ્યા ચૈવ યામ્યાંશા ઐન્દ્ર્યાંશા ચ તથાનઘે ॥

યોગેશ્વર્યા ચ યોગાંશા યોગયોગીશનાયિકા
એતે હ્ય્ અંશાઃ સ્મૃતાઃ સપ્ત પુનઃ સપ્તસુ સપ્તસુ ॥

બ્રહ્માણ્યાઃ સપ્ત-મ્-ઉદ્દિષ્ટાઃ સપ્ત માહેશ્વરી પુનઃ
કૌમાર્યાઃ સપ્ત-મ્-ઉદ્દિષ્ટા વૈષ્ણવ્યાઃ સપ્ત એવ ચ ॥

વારાહી સપ્ત-મ્-ઉદ્દિષ્ટા ઐન્દ્રાણ્યાઃ સપ્ત એવ તુ
ચામુણ્ડા સપ્ત-મ્-ઉદ્દિષ્ટા એવં વૈ સપ્ત સપ્તસુ ॥

પઞ્ચાશૈકોન વૈ દેવ્યા ભુવનાવલિસંસ્થિતા[ઃ]
અત્ર ભેદૈર્ અનેકૈશ્ ચ સંસ્થિતા ભુવનાવલિઃ ॥

તસ્ય દેહગતા રોમા[ઃ] કોટ્યસ્ ત્રીણિ પ્રકીર્તિતાઃ
લક્ષાણિ ચૈવ પઞ્ચાશદ્ રોમાણાં તુ તદુદ્ભવા ॥

એકૈકરોમકૂપેષુ યોગિન્યઃ કોટિસંસ્થિતાઃ
ત્રિકોટિકોટિકોટીનાં કોટયસ્ તુ અનેકધા ॥

યથા ચામ્બરપર્યન્તા પૃથિવ્યાદિષુ સમ્ભવાઃ
અણવસ્ ત્વ્ અપ્રમાણાસ્ તુ તત્ત્વે તત્ત્વે ત્વ્ અનેકધા ॥

સૂક્ષ્મરૂપાસ્ તથા રુદ્રા એષાં સઙ્ખ્યા ન વિદ્યતે
વ્યાપિતં તુ સમસ્તં હિ રુદ્રૈઃ સૂક્ષ્મતરૈઃ પ્રિયે ॥

એવં મુદ્રા સમાખ્યાતા વ્યાપયિત્વાપ્રમેયતઃ
એકા એવ પરા મુદ્રા યસ્યેદં તિષ્ઠતે જગત્ ॥

યં યં સ્પૃશતિ સા હ્ય્ અઙ્ગં સા સા મુદ્રા વિધીયતે
નૃત્યં વલ્ગં તથા હાસ્યં રોદનં સ્ફોટમ્ એવ ચ ॥

યદ્ વિકારં પ્રકુર્વન્તિ તત્ સર્વં મુદ્રસંજ્ઞકમ્
અઙ્ગુલ્યા અઙ્ગના પ્રોક્તા અઙ્ગે ચરતિ નિત્યશઃ ॥

અઙ્ગુલ્યા તેન ચોદ્દિષ્ટા મુદ્રાબન્ધે વરાનને
કં શરીરમ્ ઇતિ ખ્યાતં ન્યસ્તા તસ્મિન્ પ્રવર્તતે ॥

હેલાગમનમાર્ગેણ તેન નામા કનીયસી
અનામા નામરહિતા કોટિભેદૈર્ વ્યવસ્થિતા ॥

નામં ન શક્યતે વક્તુમ્ અનામા તેન ગીયતે
મધ્યે પ્રવર્તતે નિત્ યમ્ આશ્રયા પુદ્ગલસ્ય તુ ॥

તત્રાધારાદ્ વ્રજેદ્ ઊર્ધ્વં પુનરાગમનં પ્રિયે
મધ્યમા નામ તેનાત્ર કથિતા મન્ત્રવાદિનામ્ ॥

તર્જનં કુરુતે નિત્યં સંયોજનવિયોજનમ્
તર્જયન્તી મહામોહં પાશજાલમ્ અનન્તકમ્ ॥

તર્જની તેન સા પ્રોક્તા મુદ્રા સર્વેષુ ચોત્તમા
અઙ્ગુષ્ઠશ્ ચૌઘભૂતા તુ પ્રવાહે સતતં પ્રિયે ॥

ઉચ્ચારેણ પ્રવર્તેત અઙ્ગુષ્ઠસ્ તેન સ સ્મૃતઃ
અહ-મ્-ઊર્ધ્વગતિઃ પ્રોક્તઃ સ્તૌ તિ રાત્રી નિગદ્યતે ॥

હસ્તૌ તેન સમાખ્યાતૌ વામદક્ષિણ ઉચ્યતે
વામે સૃષ્ટિર્ ઇતિ પ્રોક્તા સંહારં દક્ષિણે વિદુઃ ॥

સવ્યાસવ્યગતૌ તેન કથિતૌ વીરનાયિકે
વામાવ્યાપ્તં જગત્ કૃત્સ્નં સંહારાન્તં તદા પ્રિયે ॥

સંયોગેન વરારોહે આત્મા કુણ્ડલિની સ્મૃતા
ઇયં સા પરમા યોનિર્ યોનીનામ્ ઉત્તમા પ્રિયે ॥

યો જાનાતિ વરારોહે શક્તિર્ આદ્યા મનોન્મની
તેન જ્ઞાતં જગત્ સર્વં વર્ણાવર્ણવિવર્જિતમ્ ॥

સા મુદ્રા તુ સમાખ્યાતા વિશ્વવ્યાપ્તિકરી પરા
દ્વૌ બિન્દૂ ચૂલિકે દ્વે તુ વિસર્ગશક્તિસમ્પુટમ્ ॥

તદૂર્ધ્વમ્ ઇહ નાદાન્તં વિભ્વી શૂન્યમ્ ઉદાહૃતમ્
જન્મસ્થાનાત્ સમુદ્યન્તી યાવત્ તદ્ભવમણ્ડલમ્ ॥

સૃષ્ટિસંહારયોગેન મેઢ્રમ્-આધારમધ્યગમ્
એવં મુદ્રા સમાખ્યાતા વાઙ્મનઃકાયકર્મભિઃ ॥

કિમ્ અન્યત્ પૃચ્છસે દેવિ તત્ સર્વં કથયામ્ય્ અહમ્ ॥