Kubjikamatatantra · અધ્યાય 5

ઉમામાહેશ્વરં ચક્રં કથયામિ સુનિશ્ચિતમ્
પદં ચ પદભેદં ચ યો જાનાતિ સ સિધ્યતિ ॥

ઐં નમો ભગવતે રુદ્રાય પદં ચૈવ દશાક્ષરમ્
નમશ્ ચામુણ્ડે દ્વિતીયં સ્યાત્ પઞ્ચાક્ષરમ્ ઉદાહૃતમ્ ॥

નમશ્ ચાકાશમાતૄણાં પદમ્ અન્યત્ તૃતીયકમ્
અષ્ટાક્ષરં સમાખ્યાતં લક્ષણેન વિલક્ષિતમ્ ॥

સર્વકામાર્થસાધકીનાં પદં ચૈવ ચતુર્થકમ્
નવાક્ષરમ્ ઇદં દેવિ પદં યત્ સમુદાહૃતમ્ ॥

અજરામરીણાં પદં ચાત્ર કથિતં પઞ્ચગુણાવહમ્ ।
અક્ષરાણાં સમાસેન રસસઙ્ખ્યા ઉદાહૃતા ॥

સર્વત્રાપ્રતિહતગતીનાં પદં ષષ્ઠં વરાનને ।
દશાક્ષરં સમાખ્યાતં કથિતં વીરનાયિકે ॥

સ્વરૂપપરરૂપપરિવર્તનીનાં પદં સપ્તમકં ભવેત્ ।
અક્ષરાણાં સમાસેન દશત્રિતયમ્ ઉત્તમમ્ ॥

અક્ષરાણાં સમાસેન વિંશચ્ચત્વારિસઙ્ખ્યયા ॥

સર્વમાતૃગુહ્યહૃદયપરમસિદ્ધં પદં તુ નવમં ભવેત્ ।
અક્ષરાણાં સમાસેન શક્રસઙ્ખ્યા વરાનને ॥

પરકર્મ તથા દેવિ છેદનકરં પ્રકીર્તિતમ્
સિદ્ધિકરં ચ એવાત્ર પદં ચૈવ દ્વિપઞ્ચકમ્ ॥

અક્ષરાણાં તથા સઙ્ખ્યા એકત્ર સમુદાહૃતા
દ્વિસપ્તપરિમાણેન સ્ફુટમ્ એતત્ કુલેશ્વરિ ॥

શૃણુ ચાન્યં વરારોહે માતૄણાં વચનં શુભમ્
અક્ષરાણાં પ્રમાણેન દ્વિચતુષ્કં વરાનને ॥

એકાદશમમ્ એતદ્ ધિ પદં સર્વગુણાવહમ્
તદ્ યથેતિ સમારભ્ય દ્વિતીયં શોભનં પ્રિયે ॥

બ્રહ્માણીતિ પદં પૂર્વં માહેશ્વરી દ્વિતીયકમ્
કૌમારીતિ તૃતીયં સ્યાદ્ વૈષ્ણવ્યા તુ ચતુર્થકમ્ ॥

વારાહ્યા પઞ્ચમં જ્ઞેયમ્ ઐન્દ્રી ષષ્ઠમકં ભવેત્
ઐશાની સપ્તમં પ્રોક્તમ્ આગ્નેયી ચાષ્ટમં પ્રિયે ॥

એવમાદ્યાઃ સ્થિતા દેવ્યઃ કથિતાસ્ તવ શોભને
અઘોરે અમોઘે વરદે વિચ્ચે વૈ વચનં શુભમ્ ॥

સર્વાસાં ચૈવ માતૄણાં સ્વાહાપ્રણવસંયુતમ્
ઐં ચામુણ્ડે પદં પૂર્વમ્ ઊર્ધ્વકેશિ દ્વિતીયકમ્ ॥

જ્વલિતશિખે તૃતીયં તુ વિદ્યુજ્જિહ્વે ચતુર્થકમ્
તારકાક્ષિ તથા દેવિ પઞ્ચમં પરિકીર્તિતમ્ ॥

પિઙ્ગલભ્રુવે નામેન ષષ્ઠમં તુ સુલોચને
વિકૃતદંષ્ટ્રે પદં હ્ય્ એતત્ સપ્તમં પરિકીર્તિતમ્ ॥

ક્રુદ્ધે તિ ચ તથા ચાન્યમ્ અષ્ટમં શુભલક્ષણમ્ ।
માંસશોણિતસુરાસવપ્રિયે નવમં દશમં તુ હસદ્વયમ્ ॥

નૃત્યદ્વયં તથા ચોક્તં દશ-મ્-એકં તુ સુવ્રતે
વિજૃમ્ભ ચ તથા યુગ્મં દશદ્વે ચ પ્રકાશિતમ્ ॥

માયાત્રૈલોક્યરૂપેતિ દશત્રિતયમ્ ઉત્તમમ્
સહસ્રપરિવર્તનીનાં દ્વિસપ્તમં પરમેશ્વરિ ॥

નુદયુગ્મં ત્રિપઞ્ચૈવ કૂટયુગ્મં દ્વિરષ્ટકમ્
ચિરિયુગ્મં તથા ભદ્રે દશસપ્ત ચ એકતઃ ॥

હિરિદ્વિતયમ્ એકત્ર દશ-અષ્ટ શુભેક્ષણે
ભિરિ ચૈવ દ્વિરભ્યાસાદ્ વિંશ-મ્-એકોનસઙ્ખ્યયા ॥

ત્રાસનિદ્વિતયં ચૈવ પદં વિંશમકં ભવેત્
ભ્રામણિયુગ્મમ્ એતદ્ ધિ વિંશ-મ્-એકં તુ ઉત્તમમ્ ॥

વિદ્રાવણિ દ્વિરભ્યાસાદ્ વિંશદ્વયં તથાનઘે
ક્ષોભણીતિ દ્વિરભ્યાસાદ્ વિંશત્રિકમ્ ઉદાહૃતમ્ ॥

મારણિદ્વિતયં ચૈવ વિંશચત્વારિસઙ્ખ્યયા
સઞ્જીવનિપદે દ્વે તુ પઞ્ચવિંશપદં પ્રિયે ॥

હેરિયુગ્મં સ્મૃતં ભદ્રે ષડ્વિંશકમ્ અનુત્તમમ્
ગેરિયુગ્મં તથા પ્રોક્તં સપ્તવિંશતિમં પદમ્ ॥

ઘુરિ ચૈવ દ્વિરભ્યાસાદ્ અષ્ટાવિંશ વરાનને
ઘુરિલેતિ તથાપ્ય્ એવમ્ ઊનત્રિંશમ્ ઉદાહૃતમ્ ॥

નમો માતૃગણાયેતિ ત્રિંશકં કથિતં સ્ફુટમ્
નમો નમઃ ઐં વિચ્ચે સ્વાહા ત્રિંશમ્ એકોત્તરં પદમ્ ॥

સમસ્તપદસંયોગાત્ પરિમાણં શતાર્ધકમ્
વર્ણાનાં ચ શતે દ્વે તુ દ્વાનવત્યા વરાનને ॥

અધિકં કથિતં ભદ્રે માતૄણાં નામવર્જિતમ્
પદભેદસ્ તુ વિદ્યાયા જ્ઞાતવ્યઃ સાધકેન તુ ॥

પ્રયત્નેન વરારોહે તન્ત્રામ્નાયપ્રપાલકઃ
સકૃદ્ ઉચ્ચારિતા વિદ્યા સમયજ્ઞો ભવત્ય્ અસૌ ॥

પઞ્ચપ્રણવ-મ્-ઉદ્ધારં યથા ત્વં ગહ્વરે શૃણુ
એ-ઓ-મધ્યે સમુદ્ધૃત્ય બિન્દુનાદ-મ્-અલઙ્કૃતમ્ ॥

ભગાખ્યં પ્રથમં બીજમ્ ઉદ્ધૃતં પરમાક્ષરમ્
વ-ષ-મધ્યગતં ગૃહ્ય ણ-ટ-મધ્યાસને સ્થિતમ્ ॥

ઇ-ઉ-મધ્યેન સમ્ભિન્નમ્ અઃ-ઔ-મધ્ય-મ્-અલઙ્કૃતમ્
દ્વિતીયં કથિતં દેવિ તૃતીયં વ-મ-મધ્યગમ્ ॥

ઠ-લ-મધ્યાસનાસીનં ચતુર્થસ્વરભેદિતમ્
બિન્દુના મસ્તકાક્રાન્તં ન-ચ-મધ્યે ચતુર્થકમ્ ॥

ઈ-ત-મધ્યે સમારુદ્ધમ્ ઐ-પૂર્વેણ વિભેદિતમ્
બિન્દુનાદસમાક્રાન્તં ચતુર્થં પ્રણવં ભવેત્ ॥

પઞ્ચમં ય-સ-મધ્યસ્થં બ-હ-મધ્યાસને સ્થિતમ્
અં-પૂર્વેણ સમાયુક્તમ્ ઔ-પશ્ચિમવિભૂટિતમ્ ॥

અર્ધચન્દ્રાન્વિતં કૃત્વા બિન્દુનાદયુતં કુરુ
પઞ્ચપ્રણવ-મ્-ઉદ્ધારં રહસ્યં કથિતં તવ ॥

મન્ત્રાણાં દીપકં દેવિ યથાકર્મણિ યોજયેત્
વિદ્યાયાસ્ તુ પ્રસઙ્ગેન પઞ્ચપ્રણવમ્ ઉદ્ધૃતમ્ ॥

સામ્પ્રતં શૃણુ કલ્યાણિ વિદ્યામાહાત્મ્યમ્ ઉત્તમમ્
સેવનાજ્ જપહોમાદ્ વા ધ્યાનાચ્ ચ ક્રમશો ભવેત્ ॥

ષણ્માસાચ્ ચોત્પતેદ્ દેવિ સત્ યમ્ એતદ્ ઉદાહૃતમ્
કૃત્વા સામ્રાટજાન્ દોષાન્ ઉચ્ચારાત્ કલ્મષાપહમ્ ॥

દેવદ્રોહે ગુરુદ્રોહે કોટિત્રિંશૈઃ સ શુધ્યતિ
છેદને પુષ્પપત્ત્રાણામ્ આવર્તાચ્ છુધ્યતે તુ સઃ ॥

સન્ધ્યાલોપે કૃતે દેવિ ત્રિરાવર્તેણ શુધ્યતિ
આહ્નિકચ્છેદસઞ્જાતે શતમ્ એકમ્ ઉદીરયેત્ ॥

લઙ્ઘને સમયાનાં ચ અભક્ષ્યસ્ય તુ ભક્ષણે
અવાચ્યવાચિતે દેવિ સહસ્રાચ્ છુદ્ધિર્ ઇષ્યતે ॥

કાકોલૂકકપોતાનાં પક્ષિણાં ઘાતને કૃતે
સહસ્રૈર્ દ્વિભિઃ શુધ્યેત સત્યં સત્યં ન સંશયઃ ॥

છાગમેષ તથાન્યાનિ મૃગજમ્બૂક ઋક્ષયોઃ
શુદ્ધિસ્ ત્રિસહસ્રાદ્ દેવિ યથા ભૈરવ-મ્-અબ્રવીત્ ॥

સર્પમાર્જારહન્તારો દુન્દુભોમત્સ્યઘાતકઃ
ચતુર્ભિશ્ ચ સહસ્રૈર્ હિ શીઘ્રં શુદ્ધિમ્ અવાપ્નુયાત્ ॥

શ્વસૂકરનકુલાદિ મૂષકશ્ ચાથ વાપિ વા
પઞ્ચભિઃ શુદ્ધિર્ ઇષ્યેત સહસ્રૈસ્ તુ કુલાન્વયે ॥

ગવાં હત્વા પ્રશુધ્યેત દશલક્ષૈસ્ તુ સઙ્ખ્યયા
બ્રાહ્મણસ્ તુ યદા દેવિ પ્રમાદાદ્ ઘાતિતો બુધૈઃ ॥

લક્ષૈર્ વિંશતિ શુધ્યેત નક્તાશી તુ જિતેન્દ્રિયઃ
બૌદ્ધારહન્તહન્તા ચ દ્વિજાદ્ દ્વિગુણ શુધ્યતિ ॥

લાકુલા મૌષલાશ્ ચૈવ યે ચાન્યે લાતપાણયઃ
હત્વા શુદ્ધિમ્ અવાપ્નોતિ કોટિત્રયજપેન તુ ॥

ગુરું હત્વા પઞ્ચ કોટ્યઃ શુધ્યતે તુ પ્રમાદતઃ
સ્ત્રિયો ઘાતી દુરાચારો દશ કોટ્યો જપેત્ પ્રિયે ॥

નક્તાશી શુદ્ધિમ્ આપ્નોતિ ક્ષેત્રપીઠાન્ ભ્રમેદ્ યદિ
અન્યેષાં વર્ણજાતીનામ્ અધમોત્તમમધ્યમાઃ ॥

લક્ષૈસ્ તુ ભવતે શુદ્ધિર્ દ્વિત્રિચત્વારિસઙ્ખ્યયા
એકાદ્ એકોન કર્તવ્યં વર્ણાણાં ચ ક્રમેણ તુ ॥

નિન્દતે યોગિનીં યસ્ તુ શિવભક્તાંશ્ ચ નિન્દતિ
શાસ્ત્રાણિ દૂષયેદ્ યસ્ તુ સ્ત્રિયમ્ આકોટયેતિ ચ ॥

ક્રોષન્તિ કન્યકા દેવિ સહસ્રાચ્ છુદ્ધિર્ ઇષ્યતે
વામદક્ષિણસિદ્ધાન્તે શિવવ્રતધરો હતઃ ॥

કોટિચતુર્ભિર્ દેવેશિ શુધ્યતે જપતત્પરઃ
યઃ પુનસ્ તત્ત્વવેત્તા ચ ષોઢાન્યાસવિશારદઃ ॥

સ્મરણાચ્ છુદ્ધિર્ ઇષ્યેત તથ્યં ભૈરવ-મ્-અબ્રવીત્
ક્રોધેન તુ યદા દેવિ ઉચ્ચૈઃશબ્દપ્રલાપિતમ્ ॥

ત્રિવારાવર્તયેદ્ વિદ્યાં શાન્તિમ્ આશુ પ્રયચ્છતિ
કૃતે કર્મણિ બાલાનાં લૂતાચિપિટગણ્ડયોઃ ॥

જ્વરગ્રહવિષાદિભ્યઃ ઓષધાખ્યાપનાય ચ
પઞ્ચાવર્તાદ્ વિશુધ્યેત અન્વયી યસ્ તુ શાસને ॥

યઃ પુનઃ ક્રમવેત્તા ચ શુદ્ધાશુદ્ધૈર્ ન બાધ્યતે
દેશિકં પુત્રકં વાપિ સાધકં સમયજ્ઞકમ્ ॥

પ્રમાદાન્ નિન્દતે યસ્ તુ દશાવર્તાદ્ વિશુધ્યતિ
અલિં જુગુપ્સયેદ્ યસ્ તુ ફલ્ગુષં વા યદિ પ્રિયે ॥

એકોચ્ચારેણ શુધ્યેત અન્નં વા યજ્ જુગુપ્સતે
કન્દુકં મલ્લકોષાઢ્યા છિપ્પકં ચર્મકારકમ્ ॥

ધ્વજં સૂનાકરં વાપિ મત્સ્યઘાતં તુ લુબ્ધકમ્
કોઙ્કણં ચીનબાહ્લીકં વઙ્ગાલં કામરૂપકમ્ ॥

માગધં સૈન્ધવં વાપિ ગુજ્જરં લાટસંજ્ઞકમ્
અન્યે ઽપિ દેશમધ્યસ્થા વનવાસાન્ત્યજાતયઃ ॥

વેશ્યાદિક્રમશઃ સર્વે નિન્દનાચ્ છુદ્ધિર્ ઇષ્યતે
ત્રિરાવર્તેણ દેવેશિ અકામાત્ કામતો ઽપિ વા ॥

કામતો દ્વિગુણં દેવિ કર્તવ્યં સિદ્ધિમ્ ઇચ્છતા
ત્રિખણ્ડા યાદૃશં પ્રોક્તં પ્રાયશ્ચિત્તં કુલાન્વયે ॥

દ્વાત્રિંશાક્ષરયા તદ્વત્ કર્તવ્યં તત્ત્વવેદિભિઃ
એતે નિરોધરૂપાસ્ તુ સાધકાનાં પ્રકાશિતાઃ ॥

તદર્થે કથિતા વિદ્યા યેન સિધ્યન્તિ સાધકાઃ
શ્રેયાર્થિનાં મયાખ્યાતા મદ્ભક્તાઃ કૃતનિશ્ચયાઃ ॥

અન્યેષાં ન કદાચિત્ સ્યાલ્ લૌલ્યાર્થે યે સ્થિતાનઘે
ઇયં વિદ્યા સમાખ્યાતા ઉપયોગાદ્ વરાનને ॥

સામ્પ્રતં પદભેદસ્ તુ યથા યોજ્યસ્ તુ ભૈરવિ
તથા તે કથયિષ્યામિ તચ્ છૃણુષ્વ સમાસતઃ ॥

યા વિદ્યા કથિતા પૂર્વં નાદિફાન્તક્રમેણ તુ
તચ્છરીરગતા વર્ણાઃ પઞ્ચપ્રણવભેદિતાહ્ ॥

પઞ્ચયોન્યાઃ સ્વરૂપેણ વર્ણમ્ એકૈકસઙ્ખ્યયા
ભૈરવઃ શબ્દરાશિસ્ તુ આદિક્ષાન્તક્રમેણ તુ ॥

તે વર્ણાઃ પઞ્ચપ્રણવૈઃ સમ્પુટે[ચ્] ચ પૃથક્ પૃથક્
આદિક્ષાન્તક્રમેણૈવ નિયોજનમ્ ઉદાહૃતમ્ ॥

દ્વાભ્યાં તુ ગ્રથનં કાર્યં સમસ્તસ્યાપિ શોભને
સપ્ત વર્ણાન્ દદેચ્ ચાદૌ મધ્યે વિદ્યાપદં દદેત્ ॥

પુનઃ સપ્ત પદસ્યાન્તે તસ્યાન્તે તુ પદં પુનઃ
પુનઃ સપ્તકમ્ ઉચ્ચાર્ય પદં ચ તદનન્તરમ્ ॥

અનેન ક્રમયોગેન નિર્વાહેન તુ યોજયેત્
ક્ષાન્તં વૈ યાવ દેવેશિ તાવદ્ એવ નિયોજયેત્ ॥

પદસઙ્ખ્યા સમસ્તસ્ય નિર્વાહોભયદીપિતે
માલિની દ્વાદશૈર્ ભેદૈઃ શબ્દરાશિસ્ તુ ષોડશૈઃ ॥

અનેન ક્રમશઃ સર્વે વર્ણાશ્ ચૈવ પૃથક્ પૃથક્
ચલચક્રવિભાગેન પદવિદ્યાં યદા યજેત્ ॥

તદા ક્ષોભં કરોત્ય્ આશુ દિવ્યાદિવ્યેતરં પ્રિયે
યોનયઃ પઞ્ચધા યાસ્ તુ સર્વાઃ ક્લિદ્યન્તિ નાન્યથા ॥

દ્રાવણં ક્ષોભણં મોહં જૃમ્ભણં શોષણં તથા
સર્વાન્ તાન્ કુરુતે દેવિ યદા શક્તિસમો ભવેત્ ॥

પ્રસુપ્તભુજગાકારા દ્વાદશાન્તે વરાનને
નાભિષ્ઠા તુ તથાપ્ય્ એવં દ્રષ્ટવ્યા પરમેશ્વરિ ॥

દૃશ્યતે દેહમધ્યે તુ વ્યોમાન્તે ચ પરાપરા
તસ્યાગ્રે તુ તતો મન્ત્રં હુતાશકણિકાકૃતિમ્ ॥

ઉચ્ચારેત તતો મન્ત્રં શબ્દરૂપં હૃદિ પ્રિયે
શબ્દાન્તે શક્તિર્ ઉચ્ચાર્યા ઈષન્મન્દગમારુતા ॥

પદ્મસૂત્રનિભાકારા ઉચ્ચાર્યા સાનુનાસિકા
ઉચ્ચારાન્તાવસાને તુ જ્ઞાતવ્યાલાતચક્રવત્ ॥

તત્ર મધ્યગતં દેવિ ચૈતન્યં મન્ત્રસંયુતમ્
પ્રસ્ફુરત્કિરણાનેકૈઃ કોટિશો દિક્ષ્વ્ અવસ્થિતૈઃ ॥

તસ્યાપ્ય્ અન્તે તતો દેવિ શક્તિર્ આદ્યા મનોન્મની
અતીતા તુ યદા સા વૈ તદા બિન્દ્વી ઉદાહૃતા ॥

બિન્દ્વન્તે વ્યાપકો દેવો માયાતીતો નિરામયઃ
સ શિવો ભાવનાતીતો નિર્ગુણો ગુણસમ્ભવઃ ॥

અધિકારી સર્વકારી ચ શક્ત્યાતીતો મહાપ્રભુઃ
અનેન ક્રમયોગેન ક્રમઃ કાર્યઃ સુનિશ્ચિતૈઃ ॥

આત્મા મનશ્ ચ મન્ત્રશ્ ચ શિવઃ શક્તિસ્ તથૈવ ચ
એકીભાવગતો દેવિ જ્ઞાતવ્યઃ સિદ્ધિમ્ ઈહકૈઃ ॥

તસ્માત્ પ્રાણસમં જાપ્યં મન્ત્રાન્તે નાદગોચરે
નાદસ્યાન્તે તતો જ્ઞાત્વા એતત્ સ્મરણમ્ ઉચ્યતે ॥

સ્મરણં શક્તિર્ ઉદ્દિષ્ટા યા કરોતિ ગમાગમમ્
તસ્યાન્તે તુ પરા સૂક્ષ્મા સા કલા અમૃતાત્મિકા ॥

લયાતીતા અરૂપા તુ સ્વયંવેદ્યાવિચારતઃ
ન તસ્ય લક્ષણં દેવિ ન લક્ષો નૈવ યોજના ॥

ન ક્ષયો નૈવ વૃદ્ધિશ્ ચ શુક્લકૃષ્ણૌ ન ચૈવ હિ
ન રાત્રિર્ ન દિનં ચૈવ ન સન્ધ્યા અયનં તથા ॥

વિષુવં નૈવ દેવેશિ સઙ્ક્રાન્તિર્ નૈવ વિદ્યતે
સર્વાવસ્થગતિં જ્ઞાત્વા વિજ્ઞાનમ્ ઉપજાયતે ॥

એતત્ કૌલિકમ્ આખ્યાતમ્ ઉમામાહેશ્વરં પ્રિયે
ઉત્પતેત ન સન્દેહો લક્ષજાપાચ્ ચલસ્ય તુ ॥

ચલા શક્તિઃ સમાખ્યાતા લક્ષણેન ઉદાહૃતા
અવર્ણા વર્ણસંયોગા માલિની સા ઉદાહૃતા ॥

પદભેદગતા હ્ય્ એકા અસઙ્ખ્યાતા વરાનને
એવં તદ્ગ્રહ-મ્-આખ્યાતઃ સદ્યઃપ્રત્યયકારકઃ ॥

ન કસ્યચિન્ મયાખ્યાતમ્ ઉમામાહેશ્વરં પ્રિયે
સતતં જપતે યસ્ તુ યોગિનીવલ્લભો ભવેત્ ॥

ષણ્માસાચ્ છુધ્યતે દેવિ બ્રહ્મઘ્નો ઽપિ ન સંશયઃ
પશ્યતે વિરજાં શાન્તાં જ્યોતિરૂપાં મહાદ્યુતિમ્ ॥

જપસ્ય લક્ષણં દેવિ ઇદાનીં શૃણુ સામ્પ્રતમ્
એકોચ્ચારશતાન્તે તુ પરાવસ્થા તુ ગીયતે ॥

શતભેદઃ સમાખ્યાતસ્ તદ્ગુણો દશ એવ તુ
સહસ્રભેદમ્ ઇત્ય્ ઉક્તં લક્ષઃ શતગુણઃ સ્મૃતઃ ॥

કોટિભેદઃ શતાનાં તુ લક્ષાણાં વરવર્ણિનિ
એતજ્ જપવિધાનં તુ કથિતં તવ શોભને ॥

મુક્તકઃ શતભેદેન યુક્તં શતગુણં શતમ્
ચલચક્રવિભાગેન લક્ષભેદમ્ ઉદાહૃતમ્ ॥

ચલચક્રં યદા દેવિ કોટિભેદો વરાનને
બાહ્યતઃ કથિતો ભદ્રે અધ્યાત્મિકમ્ અતઃ શૃણુ ॥

ઉદ્ભવે શતભેદસ્ તુ સહસ્રો વિશ્લેષકે વિદુઃ
લયે તુ લક્ષભેદો વૈ લયાતીતે તુ કોટયઃ ॥

વામા જ્યેષ્ઠા તથા રૌદ્રી બિન્દ્વી ચ સમુદાહૃતા
ઇચ્છા જ્ઞાની ક્રિયા શાન્તા ક્રમેણૈવ સુરાર્ચિતે ॥

આત્મચારગતિં જ્ઞાત્વા જપઃ કાર્યઃ સદા બુધૈઃ
અનેનૈવાક્ષસૂત્રેણ લક્ષલક્ષણલક્ષિતે ॥

કર્તવ્યો હિ જપો નિત્યં સર્વશાસ્ત્રવિશારદૈઃ
ભુવનાખ્યે વરારોહે શક્ત્યાખ્યે તુ તથૈવ હિ ॥

ચારોચ્ચારવિભાગેન જપઃ શ્રેષ્ઠ ઉદાહૃતઃ
માલા પઞ્ચાશિકા પ્રોક્તા સૂત્રં શક્તિઃ શિવાત્મિકા ॥

ગ્રથનં કુણ્ડલી શક્તિર્ લયાન્તે મેરુસંસ્થિતમ્
એતદ્ ગુપ્તતરં કાર્યમ્ અક્ષસૂત્રં શિવાત્મકમ્ ॥

પ્રકટં નૈવ કર્તવ્યં ન મેરું લઙ્ઘયેત્ ક્વચિત્ ।
શઙ્ખસ્ફટિકરુદ્રાક્ષપુત્રઞ્ જીવકરિષ્ટકાઃ ॥

એવમાદ્યાઃ સ્મૃતા યે તુ મણિમાલા વરાનને
ન તત્ર વિદ્યતે દેવો ન મન્ત્રો નૈવ ચેતના ॥

યત્ર યત્ર સ્થિતા માલા ન દોષો વિદ્યતે પ્રિયે
મન્ત્રન્યાસે કૃતે દેવિ કિલ ગોપ્યં તુ કારયેત્ ॥

શરીરં કુત્ર ગોપ્યં તુ કારયીત વરાનને
મન્ત્રન્યાસે કૃતે હ્ય્ આત્મા સકલીકૃતવિગ્રહઃ ॥

યથા ગોપ્યં ન યુઞ્જેત તદ્વચ્ ચૈવાક્ષમાલિકા
અક્ષં ચેન્દ્રિયમ્ ઇત્ય્ ઉક્તં સૂત્રં કુણ્ડલિની સ્મૃતા ॥

લક્ષં તુ સા પરા સૂક્ષ્મા કલા હ્ય્ અમૃતવાહિની
સંયોગકારિણી વ્યોમ્નિ તેન સૂત્રેતિ કીર્તિતા ॥

સઙ્ખ્યાગ્રહણકાર્યેષુ સા ચોક્તા અક્ષમાલિકા
શઙ્ખાદ્યાસ્ તુ વરારોહે જપકર્મણિ શસ્યતે ॥

શઙ્ખજં તુ શ્રિયાકામઃ સ્ફાટિકં મુક્તિહેતવે
પદ્માક્ષા પદ્મજા પ્રોક્તા શ્રિયાપુષ્ટિકરા પ્રિયે ॥

રુદ્રાક્ષૈઃ સિદ્ધિમ્ આપ્નોતિ યચ્ ચાન્યં ખેચરીપદમ્
જીવકા સર્વદા જ્ઞેયા ગોપુચ્છાગ્રથિતાનઘે ॥

વિદ્રુમા વશ્યકાર્યેષુ મૌક્તિકા સર્વકામદા
અન્યાનિ તુ સ્મૃતા યે વૈ રત્નજા પરમેશ્વરિ ॥

સર્વદા તે સમુદ્દિષ્ટા નાત્ર કાર્યવિચારણાત્
રિષ્ટકાક્ષાસ્થિજા માલા અભિચારે પ્રશસ્યતે ॥

નાગવઙ્ગસ્ તથા લોહા મિશ્રાશ્ ચાન્યે ઽપિ યે સ્મૃતાઃ
મારણે તાં પ્રશસ્યેત સ્તમ્ભને મોહને તથા ॥

કમ્પને ધ્વંસને દેવિ કર્તવ્યા ચાભિચારકે
એવમ્ અન્યે ઽપિ યે પ્રોક્તાસ્ તેષાં શ્રેષ્ઠા તુ શઙ્ખજા ॥

પ્રશસ્તા સર્વકાર્યેષુ જપકર્મણિ શસ્યતે
શઙ્ખાવર્તા તુ યા નાડી શિખાન્તે તુ વ્યવસ્થિતા ॥

તેન શઙ્ખમયં પ્રોક્તમ્ અક્ષસૂત્રં સુરાધિપે
સ્ફુટતે મસ્તકે યા સા દ્વિધા ચૈવ વિસર્પિણી ॥

સ્ફાટિકં તેન ચોદ્દિષ્ટં ગુરુવક્ત્રે પ્રતિષ્ઠિતમ્
રૌદ્રીભાવ[ઃ] સ્મૃતો રુદ્રસ્ તાલ્વગ્રે ચ વ્યવસ્થિતઃ ॥

શબ્દસ્પર્શરસો રૂપં ગન્ધતન્માત્રસંયુતમ્
વિકારિત્વે પ્રવર્તેત નિરોધાલ્ લક્ષમ્ એવ ચ ॥

તેન રુદ્રાક્ષમાલાયા જપઃ શ્રેષ્ઠ ઉદાહૃતઃ
પુત્રવદ્ ઉદરે કૃત્વા પ્રસુપ્તામૃતકુણ્ડલી ॥

તયા નીયત્ય્ અસૌ જીવ અધશ્ ચોર્ધ્વેન ભાવિનિ
પુત્રઞ્જીવકસંજ્ઞા તુ તેનૈષા સમુદાહૃતા ॥

અરિષ્ટાનિ અનેકાનિ સુખદુઃખાત્મિકાનિ તુ
ભુઞ્જતે સતતં દેવિ અર્જિતં યત્ પુરા ધનમ્ ॥

અરિષ્ટાખ્યા સ્મૃતા માલા અપ્રમેયા ભવાન્તરે
હૃત્પદ્મે સંસ્થિતા નિત્યમ્ અક્ષરાણાં પ્રબોધિકા ॥

પદ્માક્ષમાલા સા પ્રોક્તા શાસ્ત્રે શાસ્ત્રે વરાનને
એવમાદ્યાઃ સ્મૃતા યે તુ પર્યાયા અક્ષમાલયા ॥

તે સર્વે આત્મનશ્ ચૈવ કથિતાશ્ ચ કુલેશ્વરિ
અક્ષસૂત્રવિધિઃ ખ્યાતઃ સમ્યક્ કૌલિકવેદિનામ્ ॥

સામ્પ્રતં ન્યાસમ્ આખ્યામિ શૃણુ તત્ત્વેન શોભને
સ્વાભાવિકં ચલં દીપ્તં સ્થિરં દ્રવનભોયુતમ્ ॥

ન્યાસમાત્રં સમાખ્યાતં ષોઢાદ્વાદશભેદતઃ
ષોઢા શક્તિઃ સમાખ્યાતા પરા ચૈવાક્ષરા શુભા ॥

કુણ્ડલી નાભિદેશસ્થા પરા સા વ્યોમરૂપિણી
એકા એવ પરા સૂક્ષ્મા અક્ષયા તેજરૂપિણી ॥

જ્ઞાતવ્યા સા પરા દેવી ષડ્વર્ણરહિતા કલા
બ્રહ્મસ્થાનગતા સૂક્ષ્મા સ્વાભાવિકમ્ ઉદાહૃતા ॥

વિષ્ણુસ્થાને ચલા પ્રોક્તા દીપ્તા રુદ્રપદે સ્મૃતા
ઈશ્વરે સ્થિરસંજ્ઞા તુ સદાખ્યે દ્રવસમ્ભવા ॥

શક્તિસ્થા વ્યોમરૂપા તુ જ્ઞાતવ્યા તત્ત્વવેદિભિઃ
અણિમાદિગુણાધારા ષડ્ગુણા ગુણબોધની ॥

વ્યાપિની વ્યોમરૂપા ચ અનન્તાનાથનાશ્રિતા
સંયોક્ત્રી ચ વિયોક્ત્રી ચ સદ્ભાવગુણસંસ્થિતા ॥

એકા એવ પરા શક્તિઃ સંસ્થિતા કૃત્યભેદતઃ
કૃત્યભેદેન ભેદો ઽસ્યા ન ભેદઃ પરમાર્થતઃ ॥

એવં ન્યાસે કૃતે દેવિ અન્તરઙ્ગે પ્રવર્તતે
બહિરઙ્ગે વર્ણરૂપા ચ એકા ચૈવ અનેકધા ॥

ષોઢાદ્વાદશભેદેન ન્યાસઃ પ્રોક્તો ગમાગમે ॥