Kubjikamatatantra · અધ્યાય 4

તૃપ્તાહં દેવદેવેશ બીજમન્ત્રૈર્ અનેકધા
ચક્રૈશ્ ચ વિવિધાકારૈઃ સદ્યઃપ્રત્યયકારકૈઃ ॥

અદ્યાપિ સંશયો નાથ મન્ત્રાણાં નિર્ણયં પ્રતિ
પૂર્વં ચ કથિતા મન્ત્રાઃ સપ્તકોટિર્ અસઙ્ખ્યયા ॥

સાધનાનિ પુનસ્ તેષાં સદ્યઃપ્રત્યયકારકાઃ
ક્લિષ્યન્તિ મનુજાત્યન્તં જપહોમપરાયણાઃ ॥

વ્રતૈશ્ ચ વિવિધાકારૈઃ કષ્ટૈશ્ ચાન્દ્રાયણાદિભિઃ
કિમર્થં તે ન સિધ્યન્તિ જપ્ત્વા કોટિશતૈર્ અપિ ॥

ત્વં ચ દેવો વિભુઃ કર્તા ત્વયોક્તં સત્ યમ્ ઉચ્યતે
અવિચારેણ તદ્ ગ્રાહ્યં મિથ્યા કિં દેવ ભાષિતમ્ ॥

ધ્વંસિતાશ્ ચ ત્વયા લોકા માયારૂપેણ ભૈરવ ॥

સાધુ સાધુ મહાપ્રાજ્ઞે વસ્તુચોદ્યવિકલ્પિનિ
યે મયા કથિતા મન્ત્રાઃ પૂર્વં યે કામસિદ્ધિદાઃ ॥

તે ગોપિતા મયા દેવિ વર્ણરૂપાઃ પ્રકાશિતાઃ
તેન તે ન પ્રસિધ્યન્તિ જપ્ત્વા કોટિશતૈર્ અપિ ॥

ઓંકારેણ તુ તે ગુપ્તા નમસ્કારેણ ભામિનિ
તેન ગુપ્તેન ગુપ્તાસ્ તે શેષા વર્ણાસ્ તુ કેવલાઃ ॥

એકાક્ષરા દ્વ્યક્ષરાશ્ ચ ચતુઃપઞ્ચનવાક્ષરાઃ
કૂટમન્ત્રાશ્ ચ યે કેચિત્ પિણ્ડમન્ત્રાસ્ તથૈવ ચ ॥

એકાશીતિપદાશ્ ચાન્યે સહસ્રાન્તાઃ શતાર્ધિકાઃ
સર્વે તે નિષ્ફલાઃ પ્રોક્તાઃ કિં તુ જીવવિવર્જિતાઃ ॥

લોકે પ્રસિદ્ધમ્ એવં હિ જીવહીના મૃતાઃ કિલ
મૃતસ્ય ચોપચારેણ કિં તેષાં જીવિતં ભવેત્ ॥

એવં મન્ત્રા વરારોહે અક્ષરાર્થે વ્યવસ્થિતાઃ
વ્રતચર્યૈર્ ન સિધ્યન્તિ સત્ યમ્ એતદ્ ઉદાહૃતમ્ ॥

સિધ્યન્તે જીવયુક્તાસ્ તુ કિમ્ અત્ર પ્રવિચાર્યતે
અન્યોન્યવલિતાશ્ ચૈવ ભેદિતા દ્વાદશસ્વરૈઃ ॥

રઞ્જિતાઃ શક્તિબીજેન સિધ્યન્તે વરવર્ણિનિ
ઉક્તાઃ કામપ્રદાઃ સર્વે સર્વે ચામોઘશક્તયઃ ॥

શિવવક્ત્રોદ્ભવાઃ સર્વે મનનત્રાણધર્મિણઃ
ત્રાણં તુ રક્ષણં પ્રોક્તં તચ્ ચ વર્ણવિવર્જિતમ્ ॥

શુદ્ધસ્ફટિકસêકાશં ચારોચ્ચારવિવર્જિતમ્
જ્વલન્તં સ્વેન તેજેન હૃત્પદ્મે સંવ્યવસ્થિતમ્ ॥

ભાવયેચ્ છૂન્યમ્ આત્માનમ્ એકીભૂતં તયા સહ
સુષુમ્ણાચારયોગેન ઉદ્યન્તં રવિબિમ્બવત્ ॥

ઓ-જા-પૂ-કા-ક્રમાન્ ભિત્ત્વા વિદ્યાકુબ્જપદે સ્થિતમ્
તાવત્ કમ્પત્ય્ અસૌ યોગી સ્તોભમ્ આયાતિ તત્ક્ષણાત્ ॥

મુદ્રા મન્ત્રં તથા ભાષા સર્વં જાનાતિ તત્ત્વતઃ
કુબ્જીશાનપદં પ્રાપ્તં સુપ્તાવસ્થા પ્રજાયતે ॥

ઈષન્માત્રં વિજાનાતિ સુપ્તાવસ્થાવ્યવસ્થિતઃ
બ્રહ્મરન્ધ્રગતા ચાજ્ઞા કાષ્ઠવત્ તિષ્ઠતે તદા ॥

યવમાત્રપ્રમાણં તુ ત્રિકોણાકૃતિમ્ ઉત્તમમ્
વડવામણીન્દ્રિયં યદ્વન્ મીલનોન્મીલનાનિ ચ ॥

તત્ર મધ્યે ગતં ચેતઃ કાષ્ઠાવસ્થા તુ જાયતે
ભેરીમૃદઙ્ગશબ્દાદ્યૈર્ ગીતવાદ્યૈર્ અનેકધા ॥

ન શૃણોતિ ન પશ્યેત ન ચાન્યં મન્યતે પ્રભુમ્
ખડ્ગચક્રાદિભિઃ શસ્ત્રૈશ્ છિદ્યમાનો ન વિન્દતિ ॥

ઈષન્માત્રં વિજાનાતિ શક્ત્યાવસ્થા વરાનને
શક્ત્યન્તં તુ યદા પ્રાપ્તસ્ તદા ચોત્પતતે ક્ષણાત્ ॥

એવં ક્રમેણ દેવેશિ શક્ત્યુચ્ચારં સમભ્યસેત્
સતતાભ્યાસયોગેન વાગીશત્વં પ્રજાયતે ॥

માસમ્ એકં યદાભ્યસ્તં કાવ્યકર્તા ન સંશયઃ
દ્વિભિર્ માસૈર્ વપુષ્મન્તઃ ક્ષુત્તૃષ્ણાદ્યૈર્ ન બાધ્યતે ॥

વિચરેદ્ અખિલાન્ લોકાન્ યાવદાભૂતસમ્પ્લવમ્
અક્ષરાર્થેન યે મન્ત્રાસ્ તેષામ્ એવ વિધિઃ સ્ફુટમ્ ॥

અક્ષરાર્થોપદેશશ્ ચ સમ્પ્રદાયશ્ ચ કૌલિકઃ
યથા વિજ્ઞાયતે દેવ પ્રસાદં કુરુ ભૈરવ ॥

શૃણુ દેવિ પ્રવક્ષ્યામિ મન્ત્રાણાં નિર્ણયં સ્ફુટમ્
પ્રસ્તારાદિ-ર્-અનેકૈશ્ ચ યે મન્ત્રાશ્ ચોદિતાઃ પ્રિયે ॥

અક્ષરાર્થેન તે જ્ઞેયાઃ ખણ્ડમન્ત્રાઃ શિવોદિતાઃ
રઞ્જકેન સમાયુક્તા ઉપદેશઃ સુરાર્ચિતે ॥

સમ્પ્રદાયો ભવેદ્ દેવિ સો ઽપિ ષટ્સુ પ્રભેદતઃ
પલ્લવો યોગરોધશ્ ચ સમ્પુટો ગ્રથનસ્ તથા ॥

વિદર્ભશ્ ચ ષડ્ એતે હિ સમ્પ્રદાયાઃ પ્રકીર્તિતાઃ
માલિની શબ્દરાશિશ્ ચ કૌલિકો વિધિર્ ઉત્તમઃ ॥

સા તુ જ્ઞેયા વરારોહે ભેદાઃ પઞ્ચાશ સુવ્રતે
કુલં તુ ષડ્વિધં જ્ઞેયં તસ્ય વક્ષ્યામિ લક્ષણમ્ ॥

પરં બીજં તથા મૂલમ્ આગમો વિધિર્ એવ ચ
વર્ણરાશિસમાયુક્તઃ ષડ્વિધસ્ તુ કુલક્રમઃ ॥

સકલો નિષ્કલશ્ ચૈવ તથા સકલનિષ્કલઃ
સૂક્ષ્મો ભિન્નકલશ્ ચૈવ કલાતીતો વરાનને ॥

ષટ્પ્રકારો ભવેન્ મન્ત્રો જ્ઞાતવ્યઃ સિદ્ધિમ્ ઇચ્છતા
શુદ્ધદ્વન્દ્વજસટ્કીર્ણ ઉપદેશસ્ ત્રિભેદતઃ ॥

સૂચિતા મન્ત્રમાર્ગે તુ યે મન્ત્રા લક્ષણાન્વિતાઃ
તે જ્ઞેયાસ્ ત્વત્પ્રસાદેન ધ્યાનધારણયોગતઃ ॥

કુલમાર્ગગતા દેવ યથા ભવતિ તત્ કથમ્
કથં તુ પલ્લવો યોગ આદિ ષટ્સુ પ્રકારતઃ ॥

કૌલિકં ષડ્વિધં કિં તુ મન્ત્રાણાં ષડ્વિધા ગતિઃ
ત્રિવિધશ્ ચોપદેશશ્ ચ એતદ્ ઇચ્છામિ વેદિતુમ્ ॥

પલ્લવો આદિદેશે તુ યોગો મધ્યે વિજાનતઃ
રોધસ્ તુ આદિમધ્યાન્તે સમ્પુટશ્ ચાદિ-ર્-અન્તગઃ ॥

ગ્રથનં ચાન્તરે જ્ઞેયમ્ અક્ષરાક્ષરયોગતઃ
વિદર્ભો મન્ત્ર-મ્-આદૌ તુ મન્ત્રાન્તે વીરનાયિકે ॥

માલાગ્રથનમ્ એતદ્ ધિ જ્ઞાતવ્યં મન્ત્રવાદિના
પલ્લવો મન્ત્રબોધે તુ યોગો જ્ઞેયસ્ તુ સર્વદા ॥

અમલીકરણે ચૈવ સન્ધાનસ્ય વિધૌ પ્રિયે
યોગસ્ તુ કથિતો હ્ય્ એવં રોધશ્ ચૈવાનુકથ્યતે ॥

તીવ્રમન્ત્રપદસ્તમ્ભે વાક્સ્તમ્ભે સૈન્યસ્તમ્ભને
હસ્ત્યાદિશકટયન્ત્રે નાવાન્તે ચ પ્રકીર્તિતઃ ॥

તેષુ રોધઃ પ્રશસ્યેત પશૂનામ્ ઉત્ક્રમેષુ ચ
સમ્પુટો મન્ત્રરક્ષાસુ વશ્યાર્થે ચૈવ યોજયેત્ ॥

અમૃતીકરણે ચૈવ વિષે સ્થાવરજઙ્ગમે
શાન્તિકાદિષુ કાર્યેષુ સમ્પુટસ્ તુ પ્રશયતે ॥

ગ્રથનં રૂપકાર્યેષુ આકૃષ્ટ્યાદિષુ કર્મસુ
સન્ધાને તુ વરારોહે ગ્રથનં સમુદાહૃતમ્ ॥

વિદર્ભઃ સર્વકાર્યેષુ ઉક્તાનુક્તેષુ વસ્તુષુ
કર્તવ્યં સતતં દેવિ યદિ સિદ્ધિં સમીહતે ॥

એતદ્ દેવિ સમાખ્યાતં સમ્પ્રદાયવિધિઃ શુભઃ
ન મયા કસ્યચિત્ ખ્યાતં સત્યં સત્યં ગણામ્બિકે ॥

સામ્પ્રતં કુલમાર્ગસ્ તુ યથા ભવતિ તચ્ છૃણુ
પરં બિન્દુઃ સમાખ્યાતો હૃત્પદ્મે સુરનાયિકે ॥

ગ્રહણં તસ્ય ચોપાયસ્ તં જ્ઞેયં કૌલિકં પરમ્
બીજં કુણ્ડલિની શક્તિર્ યા કરોતિ ગમાગમમ્ ॥

તસ્યાન્તં તુ તતો જ્ઞાત્વા બીજં કૌલિકમ્ ઉત્તમમ્
મૂલં શક્તિઃ સ્મૃતા કુબ્જી જગતઃ કારણાત્મિકા ॥

તસ્યા જાતમ્ અશેષં તુ આબ્રહ્મભુવનાન્તિકમ્
સૃજતે યેન સુશ્રોણિ કાર્યકારણયોગતઃ ॥

જ્ઞેયા ધર્મિણિ ધર્મિત્વં યથોષ્મા કૃષ્ણવર્ત્મનઃ
એતત્ કૌલિકમ્ આખ્યાતં મૂલસંજ્ઞા વરાનને ॥

આગમસ્ તત્ર સૂત્રાર્થો વિધિસ્ તત્રૈવ ચોદિતા
વર્ણરાશિક્રમો જ્ઞેયો નાદિફાન્તસ્વરૂપતઃ ॥

આદિક્ષાન્તશ્ ચ દેવેશિ શબ્દરાશિક્રમો વિદુઃ
એતત્ કૌલિકમ્ આખ્યતં ષટ્પ્રકારં વરાનને ॥

સકલાદિક્રમેણૈવ વક્ષ્યમાનં નિબોધત
બ્રહ્મસ્થઃ સકલો મન્ત્ર અષ્ટત્રિંશત્કલૈર્ યુતઃ ॥

પૂર્યષ્ટકસમોપેત ઉદ્ભવસ્થો વિજાનતઃ
કણ્ઠસ્થો નિષ્કલો દેવિ કલાકાલવિવર્જિતઃ ॥

રુદ્રસ્થાનગતો ભદ્રે મન્ત્રો ભાવૈર્ દ્વિભિર્ યુતઃ
સ્થૂલજાલકલૈર્ યુક્તો બિન્દ્વાદીનાં ચ સમ્ભવૈઃ ॥

સૂક્ષ્માધારસ્થિતો હ્ય્ એકઃ સ્પર્શાખ્યો મન્ત્રવેદકઃ
સકલો નિષ્કલશ્ ચાસૌ મન્ત્રો જ્ઞેયસ્ તુ સુવ્રતે ॥

વિલીનો બિન્દુદેવે તુ યોન્યાકારસ્વરૂપતઃ
શબ્દસ્પર્શવિનિર્મુક્તો મન્ત્રો જ્ઞેયસ્ તુ નિષ્કલઃ ॥

સૂક્ષ્માત્ સૂક્ષ્મતરો દેવિ સ ચ સૂક્ષ્મો નિગદ્યતે
કાલરૂપઃ સ્મૃતો બિન્દુસ્ તં ભિત્ત્વા વ્રજતે યદિ ॥

ઊર્ધ્વપદે પ્રવૃત્તસ્ય સુષુમ્ણાધારગોચરઃ
પ્રલીનઃ શબ્દદેવે તુ ચિચ્છક્તિપ્રતિબોધિતઃ ॥

ભિન્નકલઃ સ્મૃતો હ્ય્ એવં લયાતીતસ્ તુ મોક્ષદઃ
પઞ્ચાવસ્થા સમાખ્યાતા મન્ત્રાણામ્ અમિતૌજસામ્ ॥

યાવદ્ એવં ન વિન્દેત તાવત્ સિદ્ધિઃ કુતો ભવેત્
હૃત્કણ્ઠતાલુજિહ્વૌષ્ઠૌ દન્તનાસોદ્ભવાક્ષરાઃ ॥

ક્ષણપ્રધ્વંસિનો દેવિ યથોત્પત્તિસ્ તથા ક્ષયઃ
કૃતકા હ્ય્ અચેતના શૂન્યા અનિત્યા જલ્પકારકાઃ ॥

પઞ્ચાવસ્થાપ્રભિન્નસ્ તુ તદા મન્ત્ર-મ્ ઇહોચ્યતે
એવં મન્ત્રગતિં જ્ઞાત્વા સિધ્યન્તે લીલયા નરાઃ ॥

ઉદ્ભવે શુદ્ધમ્ ઇત્ય્ ઉક્તો વિશ્લેષે દ્વન્દ્વજઃ સ્મૃતઃ
સઙ્કીર્ણે લયસંસ્થા હિ ઉપદેશસ્ ત્રિધા સ્મૃતઃ ॥

સ્પર્શનં ચાવલોકં ચ સમ્ભાષં ચાત્મદર્શનમ્
સ્વયમાવેશનં ચૈવ સઙ્ક્રાન્તિઃ પઞ્ચલક્ષણા ॥

સ્પર્શનં હૃદિસંસ્થં તુ આલોકં કણ્ઠદેશતઃ
તાલુસ્થાને તુ સમ્ભાષં દર્શનં બિન્દુમધ્યતઃ ॥

સ્વયમાવેશનં દેવિ કુબ્જિરન્ધ્રે ન સંશયઃ
સ્પર્શને કમ્પનં જ્ઞેયમ્ આલોકે ધુનનં ભવેત્ ॥

સમ્ભાષે તુ ભવેત્ સ્તોભઃ શાસ્ત્રાર્થં ચૈવ મન્યતે
દર્શનેન ગુણાવાપ્તિર્ અણિમાદિગુણાષ્ટકમ્ ॥

સ્વયમાવિશને દેવિ ઉત્પતેન્ નાત્ર સંશયઃ
એવં મન્ત્રગતિં જ્ઞાત્વા સિધ્યતે નાત્ર સંશયઃ ॥

અતઃ પરં પ્રવક્ષ્યામિ મન્ત્રોદ્ધારં વરાનને
સુગુપ્તે ભૂસમે શુદ્ધે ગોમયેનોપલેપિતે ॥

પુષ્પપ્રકરગન્ધાઢ્યે ગહ્વરં તુ સમાલિખેત્
સપ્તત્રયોદશૈર્ ભાગૈઃ ષડ્ લોપ્યાઃ ષટ્ક્રમેણ તુ ॥

યથા ચૈવૈકપાર્શ્વે તુ દ્વિતીયમ્ એવમ્ એવ હિ
એકં ત્રીણિ તથા પઞ્ચ સપ્ત નવ તથૈવ ચ ॥

એકાદશ તથાપ્ય્ એવં ત્રયોદશાવસાનતઃ
પઞ્ચાશદ્ ઊનમ્ એકેન કર્તવ્યં હિ યથાવિધિ ॥

કામરૂપાદ્ અકારાદૌ લિખેદ્ એવં ક્રમેણ તુ
સ્વરાઃ સ્પર્શા યથાવૃત્ત્યા યાવન્ મધ્યમ્ ઉપાગતાઃ ॥

ઓડ્ડિયાનગતં દેવિ હંસાખ્યં તુ મહાત્મનમ્
ક-ષાખ્યં મન્ત્રરાજાનં સંયોગેન તુ જાયતે ॥

એવં ન્યાસે કૃતે દેવિ ઉદ્ધરેન્ માલિનીં શુભામ્
નાદિફાન્તક્રમેણૈવ યથા ભવતિ તચ્ છૃણુ ॥

પ-ધ-મધ્યે શિખા જ્ઞેયા અધઃશિરવ્યવસ્થિતા
એ-પૂર્વાક્ષરચતુષ્કં શિરોમાલા નિગદ્યતે ॥

ઐ-શ-મધ્યે શિરો દેવ્યાઃ કારયેચ્ છુભલક્ષણમ્
તૃતીયં નયનં દેવ્યા ઙ-છ-મધ્યગતં પુનઃ ॥

ન-દ-મધ્યગતં જ્ઞેયં દ્વિધાભૂતં વરાનને
નયનૌ ચ સ્મૃતૌ દેવ્યાઃ ક્રમાદ્ દક્ષિણવામગૌ ॥

ટ-પૂર્વે નાસિકા જ્ઞેયા સંસૃષ્ટા ચૈવ મધ્યગા
ઢ-ત-મધ્યગતં ગૃહ્ય દ્વિરભ્યાસપદેરિતમ્ ॥

ઠ-ડ-પૂર્વૌ યુતૌ ઽધસ્તાદ્ ભૂષણૌ કર્ણયોઃ સ્મૃતૌ
વામદક્ષિણમાર્ગેણ કર્ણભૂષસ્થિતાવ્ ઇહ ॥

સ-ચ-મધ્યગતં વક્ત્રં દેવ્યાયા વીરનાયિકે
વિસર્ગાન્ત-ખ-મધ્યસ્થં ક-ગ-મધ્યગતં પુનઃ ॥

ખ-પશ્ચિમં સમુદ્દિષ્ટં પશ્ચિમોત્તરમ્ એવ ચ
ઘ-ચ-મધ્યગતં ચૈવ ઉદ્ધરેદ્ અક્ષરં શુભમ્ ॥

એતે પઞ્ચ સ્મૃતા વર્ણા દેવ્યા દશનકલ્પના
ઞ-પૂર્વે રસના દેવ્યા ઝ-ઊર્ધ્વેન સરસ્વતી ॥

સ-ત-મધ્યસ્થિતઃ કણ્ઠઃ મ-છ-મધ્યગતોદ્ધરેત્
ર-મ-મધ્યગતં તદ્વદ્ અક્ષરૌ તુ શુભાત્મકૌ ॥

શિખરૌ તૌ સ્મૃતૌ ભદ્રે વામદક્ષિણગૌ શુભૌ
ઊ-ઢ-મધ્યગતં ગૃહ્ય ડ-ણ-મધ્યે દ્વિતીયકમ્ ॥

વામદક્ષિણગૌ દ્વૌ તુ બાહૂ દેવ્યાઃ સુરાર્ચિતે
ટ-ડ-મધ્યગતં ચૈવ દ્વિધાભૂતં તુ કારયેત્ ॥

કરતલૌ સ્મૃતૌ દેવ્યાઃ સવ્યાસવ્યૌ વિજાનતઃ
જ-મ-પૂર્વૌ તુ અઙ્ગુલ્યૌ વામદક્ષિણગૌ શુભૌ ॥

અં-ક-મધ્યે કરપૃષ્ઠે દ્વિધાભૂતં પ્રકલ્પયેત્
ઞ-ઠ-મધ્યગતં ગૃહ્ય વામહસ્તે પ્રદાપયેત્ ॥

ઊર્ધ્વવક્ત્રકપાલં તુ અમૃતાખ્યેન પૂરિતમ્
દક્ષિણે તુ કરે જ્ઞેયં ય-ઢ-મધ્યે તુ દણ્ડકમ્ ॥

શૂલસ્ય કથિતં ભદ્રે ઉદ્ધારેણ સમુદ્ધૃતમ્
અ-છ-મધ્યગતં શૂલમ્ ઉત્તાનમ્ ઊર્ધ્વવક્ત્રગમ્ ॥

જ્ઞાતવ્યં તુ વિપશ્ચિદ્ભિર્ યથાલક્ષણલક્ષિતમ્
ઘ-ન-મધ્યે તુ હૃદયં દેવ્યાયાઃ સર્વકામદમ્ ॥

મ-ષ-મધ્યગતં ગૃહ્ય આત્મબીજં શિવાત્મકમ્
વિસર્ગસહિતં ભદ્રે ઉદ્ધૃતં મન્ત્રમ્ ઉત્તમમ્ ॥

ય-સ-મધ્યગતં પ્રાણં દેવ્યાયા વીરનાયિકે
જ-ચ-મધ્યગતં ગૃહ્ય ર-વ-સન્ધિગતં તથા ॥

વામદક્ષિણગૌ દ્વૌ તુ અક્ષરૌ તૌ સ્તનાત્મકૌ
ઝ-પૂર્વે તુ પયો જ્ઞેયમ્ અમૃતં ચ ઉદાહૃતમ્ ॥

ન-સ-મધ્યગતં ગૃહ્ય ઉદરમ્ ઉદ્ધૃતં ઽનઘે
ક-ષાખ્યં તત્ત્વરાજાનં નાભિં દેવ્યાઃ પ્રકલ્પયેત્ ॥

ભ-ઞ-મધ્યગતં દેવિ નિતમ્બં સકલાત્મકમ્
વ-ષ-મધ્યગતં ગુહ્યમ્ ઔ-પશ્ચિમસમન્વિતમ્ ॥

ઊર્વાકારં ભવેદ્ બીજં ણ-થ-મધ્યગતં ઽનઘે
ણ-ત-દક્ષિણગૌ બીજૌ જાનુની દ્વે પ્રકલ્પયેત્ ॥

સવ્યાસવ્યગતૌ જ્ઞેયૌ ક્રમેણૈવ શુભેક્ષણે
થ-દ-દક્ષિણગૌ દ્વૌ તુ જઙ્ઘૌ દ્વે વામદક્ષિણૌ ॥

થ-દ-મધ્યગતં દેવિ પ-બ-મધ્યં તથૈવ ચ
દ્વૌ બીજૌ ચોદ્ધૃતૌ ભદ્રે પાદૌ જ્ઞેયૌ વિપશ્ચિતા ॥

વામદક્ષિણગૌ પ્રોક્તૌ લક્ષણેન સમન્વિતૌ
એવં સમ્યગ્વિધાનેન ઉદ્ધૃતા માલિની પ્રિયે ॥

સપ્ત કોટ્યસ્ તુ વિદ્યાનાં મન્ત્રાણામ્ અમિતૌજસામ્
એષા હ્ય્ એકા પરા યોનિર્ માલિની સર્વકામદા ॥

માલયિત્વા સ્થિતા યેન તેનૈષા માલિની સ્મૃતા
યે ભૂતા યે ભવિષ્યન્તિ અપ્રમેયા વરાનને ॥

રુદ્રાણાં યોગિનીનાં ચ સા માતૈવ નિગદ્યતે
અવર્ણા વર્ણસંયોગા જ્ઞાતવ્યા તુ શુભેક્ષણે ॥

સર્વરુદ્રાત્મકા મન્ત્રા રુદ્રાઃ શક્ત્યાત્મકાઃ પ્રિયે
શક્તિસ્ તુ માતૃકા જ્ઞેયા સા જ્ઞેયા તુ શિવાત્મિકા ॥

એવં મન્ત્રપ્રમાણં તુ કથિતં તવ શોભને
એતદ્ આદ્યં સમાખ્યાતં ગોપનીયં પ્રયત્નતઃ ॥

એકવીરવિધાનં તુ પ્રાગ્ ઉક્તમ્ અન્ય આગમે ॥