Kubjikamatatantra · અધ્યાય 24

દેવદેવ મહાદેવ શશાઙ્કકૃતશેખર
તદ્ગ્રહાખ્યે તુ યે રુદ્રાઃ સૃષ્ટિન્યાસેન મે શ્રુતાઃ ॥

સંહારેણ સુરેશાન કથયસ્વ પ્રસાદતઃ
નિશ્ચયાર્થં મહાદેવ ક્ષકારાદ્યા યથાસ્ફુટમ્ ॥

કથયામિ ન સન્દેહઃ સ્ફુટાર્થં તદ્ગ્રહાત્મકમ્
પઞ્ચાશદ્વ્યુત્ક્રમેણૈવ શૃણુષ્વ ગદતો મમ ॥

ક્ષ સંવર્તઃ સ્થિતઃ ક્રોધે હ પ્રાણે લાકુલી સ્થિતઃ
સ ભૃગુઃ શુક્રતો નિત્યં ષ શ્વેતો મજ્જમ્ આસ્થિતઃ ॥

શ બકીશો ઽસ્થિમધ્યે તુ વ ખડ્ગીશઃ સિરાન્વિતઃ
લ પિનાકી સ્થિતો માંસે ર ભુજઙ્ગો ઽસૃગાસ્થિતઃ ॥

ય વાલીશસ્ ત્વચામધ્યે કથિતં તવ સુવ્રતે
મહાકાલો મકારસ્ તુ હૃદયે સર્વજન્તુષુ ॥

દ્વિરણ્ડસ્ તુ ભ નાભ્યાં તુ બ વંશે છગલણ્ડિનઃ
ફ શિખી વામપાર્શ્વે તુ કથિતં તુ વરાનને ॥

પકારો લોહિતો રુદ્રો દક્ષિણે કુક્ષિમ્ આશ્રિતઃ
ન મેષો વામપાદે તુ ધ મીનો જઙ્ઘમ્ આશ્રિતઃ ॥

દ ધાતૃ જાનુમધ્યે તુ સંસ્થિતો વરવર્ણિનિ
થ દિણ્ડી ઊરુદેશે તુ ત આષાઢી તતોર્ધ્વતઃ ॥

ડકારે દારુકો રુદ્રો જાનુમધ્યે પ્રકીર્તિતઃ
ઠ લાઙ્ગલ્ય્ ઊરુદેશે તુ નાત્ર કાર્યવિચારણાત્ ॥

સોમેશ્વરસ્ ટકારે તુ જઙ્ઘામૂલે સ્થિતસ્ તુ સઃ
ઞ હસ્તે સંસ્થિતઃ શર્મા ઝાજેશો વામબાહુગઃ ॥

જ ચતુર્મુખ મધ્યે તુ છ એકાક્ષસ્ તુ કક્ષગઃ
ચકારઃ કૂર્મ એવાત્ર શિખરે વામકે સ્થિતઃ ॥

અતોર્ધ્વે દક્ષિણે હસ્તે ઙાદિકાન્તમ્ અતઃ શૃણુ
ઙકાર[ઃ] કર-અગ્રે તુ એકરુદ્રો વ્યવસ્થિતઃ ॥

ઘ શિવેશઃ કરસ્યોર્ધ્વે ગ પ્રચણ્ડશ્ ચ કુર્પરે
ખ ચણ્ડો બાહુમધ્યે તુ ક ક્રોધઃ શિખરે સ્થિતઃ ॥

અઃ મહાસેનરુદ્રસ્ તુ વિસર્ગબ્રહ્મરન્ધ્રગઃ
અં ક્રૂરો મધ્યઘણ્ટાન્તે ઔ ઽનુગ્રહીશોર્ધ્વ-ઓષ્ઠકે ॥

ઓ ઓષ્ઠે સદ્યદેવસ્ તુ ઐ ભૌક્તી દ્વિજ-મ્-ઊર્ધ્વગઃ
એ ઝણ્ટીશો ઽ ધપઙ્ક્તિસ્ તુ દ્વિજભૂતો વ્યવસ્થિતઃ ॥

ૡ હરો વામગણ્ડે તુ ઌ સ્થાણુર્ દક્ષગણ્ડગઃ
ૠ તિથીશ ઇડાયાં તુ ઋ ભારભૂતિ પિઙ્ગલા ॥

ઊ અર્ઘીશો વામકર્ણે ઉ અમરીશસ્ તુ દક્ષિણે
ઈ ત્રિમૂર્તિર્ વામચક્ષુષિ ઇ સૂક્ષ્મ દક્ષચક્ષુગઃ ॥

આ અનન્તો મણ્ડલે વક્ત્રે અ શ્રીકણ્ઠો લલાટગઃ
તદ્ગ્રહે રુદ્ર-મ્-આખ્યાતા માલિન્યાં શૃણુ સામ્પ્રતમ્ ॥

વામે ફેત્કારિકા ચૈવ દહની દક્ષપાદગા
સાવિત્રી ચૈવ ગાયત્રી ઔ ઓ જઙ્ઘૌ પ્રકીર્તિતૌ ॥

એ ઐ જાનૂ ક્રિયા જ્ઞાની તારા તકારમ્ ઊરુગા
શુક્રદેવીત્ય્ અનુસ્વારં શુક્રં દેવ્યાસ્ તુ ભૈરવિ ॥

શ ગુહ્યં કુસુમાખ્યા ચ મહાકાલી નિતમ્બગા
ક્ષ સંહારી સ્થિતા નાભૌ ષોદરં લમ્બનોદરા ॥

હ પ્રાણે અમ્બિકા દેવી સકારે ચ પરાપરા
આમોટી તદ્ગતં ક્ષીરમ્ આ વર્ણં પરિકીર્તિતમ્ ॥

પૂતના છગલણ્ડા ચ લ-છૌ સ્તનૌ પ્રકીર્તિતૌ
પાવની તુ પ હૃલ્લગ્ના જયન્ત્યા શૂલજા સ્મૃતા ॥

દીપની શૂલદણ્ડા તુ રેફં દક્ષકરે સ્થિતમ્
કપાલિની વામકરે ટ વર્ણઃ પરિકીર્તિતઃ ॥

ઇચ્છાશક્તિર્ વિસર્ગાખ્યા કરપૃષ્ઠાવ્ ઉભાવ્ અપિ
કુર્દની ઝઙ્કરી ચૈવ ઞ-ઝાવ્ અઙ્ગુલયઃ ક્રમાત્ ॥

સમ્પૂર્ણપૂર્ણિમા ચૈવ ઠવર્ણસ્ તલહસ્તયોઃ
વિનાયકી ચ લામા ચ ડ-ઢૌ બાહુદ્વયં પ્રિયે ॥

વાયુવેગા ચ ભીષણ્યા સ્કન્ધયોર્ ઉભયોર્ અપિ
વ કણ્ઠે શિખિવાહિન્યા અ વાગ્ વાગેશ્વરી મતા ॥

માયા દેવી ઇ જિહ્વા તુ જિહ્વા દેવ્યા વિરાજતે
ખિર્વિરા ઘોરઘોષા ચ શિવા કાલી ચ કઙ્કટા ॥

કવર્ગે દશનાસ્ તીક્ષ્ણા એવં દેવ્યા વિરાજતે
બકારં વદનં તસ્યા વજ્રિણી શક્તિર્ અવ્યયા ॥

ઈ ગુહ્યશક્તિ નાદસ્થા નાસાયાં નેત્રમધ્યતઃ
પ્રજ્ઞા ચ મોહની ચૈવ ઊ ઉ ભૂષણ-મ્-ઈક્ષગૌ ॥

નારાયણી ણ કર્ણૌ તુ વામદક્ષિણયોર્ ઉભૌ
પ્રિયદર્શના ધ નેત્રસ્થા ઉભૌ નેત્રૌ વિરાજતે ॥

ચામુણ્ડા ચ લલાટસ્થા થ વક્ત્રં ગ્રસની સ્મૃતા
ૡ ઌ ઋ ૠ તુ શાન્ત્યાદ્યાઃ શિરોમાલા તુ માલિની ॥

નાદિની તુ શિખાન્તસ્થા નકારાક્ષરસમ્ભવા
માલિન્યાસ્ તદ્ગ્રહો હ્ય્ એષ શક્તિત્રયમ્ અતઃ શૃણુ ॥

ક્રિયા ચ શુક્રસહિતા બિન્દુ-અર્ધેન્દુસંયુતા
નાદશક્તિશિખાક્રાન્તા પ્રથમં બીજમ્ ઉત્તમમ્ ॥

અમ્બિકા શૂલદણ્ડસ્થા ગુહ્યશક્ત્યા ત્વ્ અલઙ્કૃતા
બિન્દુયુક્તં દ્વિતીયં તુ તૃતીયં શૃણુ સામ્પ્રતમ્ ॥

વાક્તત્ત્વં કેવલં શુદ્ધં ઘોરઘોષા તથાપરા
દક્ષજઙ્ઘાસમાયુક્તા દીપની દક્ષજાનુગા ॥

અમ્બિકા દીપનીસંસ્થા ગુહ્યશક્તીચ્છયાન્વિતા
અમ્બિકા ચ પરારૂઢા ઇચ્છાયુક્તં પદં ભવેત્ ॥

અભિન્ના પાવની તદ્વચ્ છૂલદણ્ડં તથૈવ ચ
મહાકાલીસ્વરૂપેણ દશનં તુ ચતુર્થકમ્ 1 ॥

ગાયત્ર્યા ભેદિતં કાર્યં જ્ઞાનભિન્ના ચ દીપની
મોહન્યા ભેદિતં પ્રાણં મહાકાલ્યા સમાહિતમ્ ॥

ષડક્ષરં દ્વિતીયં તુ પદં દેવ્યાઃ સમુદ્ધૃતમ્
ગાયત્ર્યા ભેદિતં કૃત્વા ઘોરઘોષા મહાબલા ॥

દીપનીં કેવલાં દદ્યાત્ પ્રજ્ઞયા શૂલદણ્ડકમ્
જ્ઞાનભિન્નં તુ હૃદયં પ્રાણં જીવસમન્વિતમ્ ॥

સાવિત્રીસહિતં કાર્યં પદં વિદ્યાત્ તૃતીયકમ્
દક્ષજઙ્ઘાસમાયુક્તા ઘોરઘોષા કુલેશ્વરી ॥

દીપની કેવલા ચાત્ર નિતમ્બં મોહનાન્વિતમ્
કાલિકા જિહ્વયા યુક્તા ચતુર્થં ચતુરક્ષરમ્ ॥

ભીષણાનાસમાયુક્તા મહાકાલી તુ કેવલા
ભીષણા ગુહ્યશક્તિસ્થા લમ્બિકા કેવલાપ્ય્ અતઃ ॥

નારાયણી જ્ઞાનશક્ત્યા યુક્તા સ્યાત્ પઞ્ચમં પદમ્
વજ્રિણી તુ મહાકાલી દ્વિર્ અભ્યાસં તુ કારયેત્ ॥

પાવની માયયા ભિન્ના અભિન્ના શિખિવાહિની
દ્વિર્ અભ્યાસમ્ ઇદં કાર્યં પ્રાણમ્ ઇચ્છાસમન્વિતં ॥

ષષ્ઠમં તુ પદં દેવ્યા ઉદ્ધૃતં તુ નવાક્ષરમ્
અમ્બિકા જ્ઞાનભિન્ના વૈ દીપન્યા ચ ચતુષ્ટયમ્ ॥

ભૂષિતં ભૂષણેનૈવ વામકર્ણસ્ય સુવ્રતે
દીપન્યા કેવલા ચૈવ ચતુર્ધા તુ પ્રકલ્પયેત્ ॥

નવવર્ણમ્ ઇદં દેવિ સપ્તમં પદમ્ ઉદ્ધૃતમ્
અમ્બિકા શૂલદણ્ડસ્થા ગુહ્યશક્ત્યા વિભૂષિતા ॥

પુનર્ એવ તથાપ્ય્ એવં શૂલદણ્ડાસને સ્થિતા
પ્રજ્ઞાયુક્તા તુ કર્તવ્યા વામપાદં તતઃ પુનઃ ॥

શૂલદણ્ડાસનાસીનં જ્ઞાનદેવ્યા હ્ય્ અલઙ્કૃતમ્
પ્રાણં જીવસમાયુક્તં શૂલદણ્ડાસને સ્થિતમ્ ॥

સાવિત્ર્યા સહિતં કાર્યં ભૂષિતં ભૂષણેન તુ
વામકર્ણસ્ય દેવેશિ ક્રિયાદેવ્યા તતઃ પુનઃ ॥

બિન્દુયુક્તં તુ કર્તવ્યં પદં દેવ્યાસ્ તુ ચાષ્ટમમ્
કુબ્જે તે પ્રીતિપૂર્વેણ કથિતં તુ વિશેષતઃ ॥

ફેત્કારાદિનિયોગેન નાદિફાન્તં તુ માલિની
વિદ્યાત્રયં તથાપ્ય્ એવં [ઽ]ઘોર્યાષ્ટકસમન્વિતમ્ ॥

દ્વાદશાઙ્ગં તુ સુશ્રોણિ વિદ્યાઙ્ગાશ્ ચ નવાત્મકમ્
નવાત્મા-અઙ્ગસંયુક્તં માલિન્યાઙ્ગસમન્વિતમ્ ॥

નિગ્રહસ્ તુ સમાખ્યાતો વિલોમેનોપદેશતઃ
અથાન્યં સમ્પ્રવક્ષ્યામિ અર્ચનં વિધિપૂર્વકમ્ ॥

કૌલિકેન વિધાનેન યથાશાસ્ત્રવિધાનતઃ
સુસમે ભૂપ્રદેશે તુ ગોમયેનોપલેપિતે ॥

યોગપીઠે ઽથવા રમ્યે ગન્ધધૂપસુવાસિતે
પુષ્પપ્રકરસઙ્કીર્ણે સુગુપ્તે જનવર્જિતે ॥

તત્રાર્ચનં સમારભ્ય એકચિત્તો દૃઢવ્રતઃ
શુક્લવસ્ત્રપરીધાનઃ સુક્લયજ્ઞોપવીતિનઃ ॥

શુચિર્ ભૂત્વા સુસન્નદ્ધઃ ષોઢાન્યાસેન કુબ્જિકે
સબાહ્યાભ્યન્તરે ધ્યાત્વા એકચિત્તો વ્યવસ્થિતઃ ॥

તતઃ કર્મ સમારભ્ય પૂર્વોક્તેન વિધાનવિત્
કુઙ્કુમાક્ષતસમ્મિશ્રૈસ્ ત્રિરસ્રં વર્તયેત્ ક્રમમ્ ॥

રક્તચન્દનચૂર્ણેન સિન્દૂરેણ-મ્-અથામ્બિકે
હિઙ્ગુલેન તથા રક્તે લિખ્યાક્ષરં યથોદિતમ્ ॥

નાદબિન્દુસમાયુક્તં ષટ્પ્રકારસમન્વિતમ્
સર્વાકારસમોપેતં પરમં દિવ્યરૂપિણમ્ ॥

તત્ર પૂજા પ્રકર્તવ્યા શાસ્ત્રોક્તેન વિધાનવિત્
આદૌ પીઠાનિ ચત્વારિ ચત્વારઃ પીઠદેવતાઃ ॥

યોગિનીપઞ્ચકં ચૈવ ડાદિયાન્તાઃ ક્રમેણ તુ
પુનર્ મહાન્તારિકાઃ પઞ્ચ જ્ઞાનં ષડ્વિધમ્ ઉચ્યતે ॥

સ્રષ્ટારઃ સિદ્ધસદ્ભાવાઃ સિદ્ધાશ્ ચત્વાર્ય્ અનુક્રમાત્
ઓંકારપીઠમધ્યસ્થં દેવ્યાયા સહ વિન્યસેત્ ॥

દક્ષિણે ચૈવ જાલાખ્યં પૂર્ણપીઠં તથોત્તરે
કામરૂપં તતો ઽગ્રે તુ દેવ્યાસિદ્ધસમન્વિતમ્ ॥

ષટ્પ્રકારવિધાનેન કુલાષ્ટકમ્ અતઃ શૃણુ
પ્રયાગે તુ મહાક્ષેત્રે આ-ક્ષા-મઙ્ગલસંયુતા ॥

વૈરિઞ્ચી આદિના પૂજ્યા પૂર્વભાગે વ્યવસ્થિતા
વારાણસ્યાં મહાક્ષેત્રે ઈ-લા-ચર્ચિકસંયુતા ॥

માહેશી કાદિના પૂજ્યા આગ્નેયીં દિશમ્ આશ્રિતા
કોલાગિર્યે મહાક્ષેત્રે ઊ-હા-યોગીસમન્વિતા ॥

કૌમારી ચાદિના પૂજ્યા યામ્યાયાં દિશિ સંસ્થિતા
અટ્ટહાસે મહાક્ષેત્રે ૠ-સા-સિદ્ધિહરાન્વિતા ॥

ટાદિના વૈષ્ણવી હ્ય્ એવં નૈરૃત્યકોણમ્ આશ્રિતા
જયન્તી ચ મહાક્ષેત્રે ૡ-ષા-ભટ્ટસમન્વિતા ॥

વારાહી તાદિના હ્ય્ એવં વારુણ્યાં દિશિ ભૂષિતા
ચરિત્રે ચ મહાક્ષેત્રે ઐ-શા-કિલકિલાન્વિતા ॥

ઐન્દ્રી પાદ્યેન સમ્પૂજ્યા વાયવ્યકોણકે સ્થિતા
એકામ્રકે મહાક્ષેત્રે કાલરાત્ર્યા ચ ઔ-વ-કા ॥

ચામુણ્ડા યાદિના પૂજ્યા કૌબેરીદિશિ સંસ્થિતા
દેવિકોટ્ટે મહાક્ષેત્રે અઃ-હ્લા-ભીષણસંયુતા ॥

લક્ષ્મી શાદ્યેન સમ્પૂજ્યા ઐશાન્યાં દિશિ ભૂષિતા
ક્ષવર્ણે કુબ્જિનીશાનં મધ્યસંસ્થં પ્રપૂજયેત્ ॥

ડકારે ડાકિની પૂજ્યા રકારે રાક્ષસી તથા
લકારે લાકિની ઽપ્ય્ એવં કકારે કુસુમાલિકા ॥

શકારે શાકિની વિદ્ધિ યકારે યક્ષિણી મતા
ભ્રામણી મધ્યતઃ પૂજ્યા દક્ષષટ્કં પ્રકીર્તિતમ્ ॥

ઉત્તરં સમ્પ્રવક્ષ્યામિ યથાવદ્ અનુપૂર્વશઃ
ગુહ્યાખ્યા ચ મહાખ્યા ચ બલાખ્યા મણિચન્દ્રિકા ॥

માલિની વિદ્યયા સાર્ધં ષટ્કમ્ ઉત્તરસંજ્ઞકમ્
ઊર્ધ્વતઃ સિદ્ધસન્તાનં મિત્રાદૌ ગુરવાવધિમ્ ॥

આધારીશસ્ તુ ઓંકારે કુરઙ્ગીશસ્ તુ જાલકે
ચક્રીશઃ પૂર્ણગિર્યાયાં મથનં કામરૂપકે ॥

યોગિન્યશ્ ચ યુગાશ્ ચૈવ ક્રમશઃ સમ્પ્રપૂજયેત્
ચણ્ડા ઘણ્ટા મહાનાસા સુમુખી દુર્મુખી બલા ॥

રેવતી પ્રથમા ઘોરા ભૌમ્યા ભીમા મહાબલા
જયા ચ વિજયા ચૈવ ઽજિતા ચૈવાપરાજિતા ॥

મહોત્કટા વિરૂપાક્ષી શુષ્કા ચાકાશમાતરા
સેહારી જાતહારી ચ દંષ્ટ્રાલી શુષ્કરેવતી ॥

પિપીલિકા પુષ્પહારી અશની શસ્પહારિકા
ભદ્રકાલી સુભદ્રા ચ ભદ્રભીમા સુભદ્રિકા ॥

કાદિવર્ણૈઃ પ્રપૂજ્યૈતાઃ સ્વરૈઃ પીઠાધિપાસ્ તથા
સિદ્ધક્રમમ્ ઇદં દેવિ સિદ્ધમાત્ટ્ઃ પ્રપૂજયેત્ ॥

ગોપનીયં પ્રયત્નેન યદીચ્છેચ્ છિરજીવિતમ્
ન દેયં દુષ્ટબુદ્ધીનામ્ ઇત્ય્ આજ્ઞા પારમેશ્વરી ॥

પૂજનીયં પ્રયત્નેન નિત્ યમ્ એવ ન સંશયઃ
યોગાચારસમો યોગી માનસં સમ્પ્રપૂજયેત્ ॥

ત્રિકાલમ્ એકકાલં વા ષોઢાન્યાસપ્રપૂર્વકમ્
ષટ્પ્રકારમ્ ઇદં દેવિ ત્રિસન્ધ્યં સમ્પ્રપૂજયેત્ ॥

સ્વરૈઃ ષોડશભિર્ દેવ્યઃ સિદ્ધાશ્ ચૈવ પ્રપૂજયેત્ ॥

પીઠં પીઠેશ્વરીમ્ ઈશં પીઠાધિપસપાલકમ્
નાથદેવ્યા સમાયુક્તં સિદ્ધદેવ્યાન્વિતં યજેત્ ॥

પઞ્ચમં પીઠમધ્યસ્થં દેવીચતુષ્ટયાન્વિતમ્
સિદ્ધૈશ્ ચતુર્ભિઃ સંયુક્તં પૂજયેત્ સમનુક્રમાત્ ॥

ષડઙ્ગભોગસંસ્થાનં પઙ્ક્તિ રત્નં ચ પઞ્ચકમ્
ગુહ્યષટ્કં તથા ડાદિ સ્થાનષટ્કમ્ અતઃ પરમ્ ॥

યોગિનીષટ્કમ્ એતદ્ ધિ પઞ્ચકં ચ તતઃ પુનઃ
ક્ષેત્રાષ્ટ-મ્-અષ્ટકં ચૈવ અષ્ટકં ચ ચતુષ્ટયમ્ ॥

ષટ્કમ્ અન્યત્ તતો બાહ્યે પૂજનીયં પ્રયત્નતઃ
યો વેત્તિ યોગ્યતા તસ્ય અન્યથા નામધારકઃ ॥

ષોઢાન્યાસં તતઃ પશ્ચાદ્ વાચનીયં પ્રયત્નતઃ
સ્વભ્રા ચૈવ નિરભ્રા ચ ભૂચરી ખેચરી તથા ॥

ગોચરી ગણમુખ્યા ચ યોગિન્યઃ ષટ્ કુલે સ્થિતાઃ
સૂક્ષ્મા ચૈવ સુસૂક્ષ્મા ચ અન્તિમામૃત-મ્-અન્તિમા ॥

કામરૂપાદિતઃ કૃત્વા યોગિન્યઃ સિદ્ધસંયુતાઃ
કમલા બર્બરા ચૈવ મહાન્તારી તૃતીયકા ॥

લઘ્વિની ચ ચતુર્થી સ્યાદ્ બિમ્બાખ્યા વૃદ્ધપઞ્ચકમ્
રક્તાખ્યા ચ કરાલાખ્યા ચણ્ડા ઉચ્છુષ્મસંજ્ઞિકા ॥

ખણ્ડિકા પઞ્ચમી જ્ઞેયા પઞ્ચ દેવ્યા ઉદાહૃતાઃ
માતઙ્ગી ચ પુલિન્દા ચ શબરી ચમ્પકા તથા ॥

મધ્યતઃ કુબ્જનામા તુ રત્નભૂષણભૂષિતા
વિશુદ્ધાનાહતં ચૈવ તથા ચ મણિપૂરકમ્ ॥

સ્વાધિષ્ઠાનં તથાધારં પઞ્ચરત્નં પ્રપૂજયેત્
ષોઢાન્યાસસ્ય તત્ત્વજ્ઞો અન્યથા ચ વિલોમકૃત્ ॥

પૂજ્યપૂજકદિગ્ભાગે ક્રમશુદ્ધિક્રમેણ તુ
સ ચ યોગ્યો ઽન્વયી શિષ્યો અન્યથા નામધારકઃ ॥

ગન્ધૈશ્ ચ વિવિધૈઃ પુષ્પૈર્ જવાબન્ધૂકપાટલૈઃ
કરવીરકુબ્જકુણ્ડૈશ્ ચ જાતીમલ્લિકચમ્પકૈઃ ॥

સૈવલ્યોત્પલયૂથીભિઃ સિન્દૂરૈઃ કિંશુકૈસ્ તથા
એભિશ્ ચ બહુભિશ્ ચાન્યૈઃ સુગન્ધૈર્ ધૂપગુગ્ગુલૈઃ ॥

વામામૃતાદિભિર્ દ્રવ્યૈઃ કુણ્ડગોલોદ્ભવૈસ્ તથા
પઞ્ચામૃતૈસ્ તથા ચાન્યૈર્ અલિફલ્ગુસમન્વિતૈઃ ॥

મહાપિશિતધૂપૈસ્ તુ નાલાજૈર્ દીપકૈઃ સહ
એવં કુર્યાદ્ વિધાનેન અર્ચનં વિધિપૂર્વકમ્ ॥

મહાશઙ્ખાર્ઘપાત્રેણ અર્ઘં દત્ત્વા યથાક્રમમ્
તસ્યાપિ પૂર્વતો દેવિ મણ્ડલાનાં ચતુષ્ટયમ્ ॥

પીતપુષ્પૈઃ સમભ્યર્ચ્ય એકૈકસ્ય ક્રમેણ તુ
પુનર્ દક્ષિણતો દેવિ ચત્વારઃ કૃષ્ણપુષ્પકૈઃ ॥

ઉત્તરે ચૈવ ચત્વારિ રક્તપુષ્પૈઃ પ્રપૂજયેત્
ચત્વારઃ પશ્ચિમે દેવિ શ્વેતપુષ્પૈઃ પ્રપૂજયેત્ ॥

પ્રણામઃ ક્રિયતે પશ્ચાદ્ અષ્ટાઙ્ગં માનસેન તુ
સ્તોત્રં પશ્ચાત્ પ્રકુર્વીત તચ્ ચ દેવિ વદામ્ય્ અહ્ અમ્ ॥

નમો ઽસ્તુ તે મહામાયે સૂક્ષ્મદેહે પરાપરે
એકાકિનિ વિશુદ્ધાત્મે નાદાખ્યે બિન્દુમાલિનિ ॥

અદેહાચ્ ચ સમુત્પન્ને અચલે વિશ્વધારિણિ
મહાકુણ્ડલિની નિત્યે હંસમધ્યે વ્યવસ્થિતે ॥

સોમસૂર્યાગ્નિમધ્યસ્થે વ્યોમવ્યાપી પરાપરે
ઓંકારવિગ્રહાવસ્થે હકારાર્ધાર્ધધારિણિ ॥

વાલાગ્રશતધાસૂક્ષ્મે અનન્તે ચાક્ષયે ઽવ્યયે
હકારાર્ધકલાધારે પદ્મકિઞ્જલ્કમ્ આશ્રિતે ॥

સકલાખ્યે મહામાયે વરદે લોકપૂજિતે
એકૈકનાડિમધ્યસ્થે મર્મ-મ્-એકૈકભેદિનિ ॥

અષ્ટત્રિંશત્કલા દેવિ ભેદિનિ બ્રહ્મરન્ધ્રગે
બ્રહ્મા વિષ્ણુશ્ ચ રુદ્રશ્ ચ ઈશ્વરશ્ ચ સદાસિવઃ ॥

એતે પઞ્ચ મહાપ્રેતાઃ પાદમૂલે વ્યવસ્થિતાઃ
ત્રૈલોક્યજનની દેવિ નમસ્ તે શક્તિરૂપિણી ॥

ઇડાપિઙ્ગલમધ્યસ્થે મૃણાલતન્તુરૂપિણિ
બિન્દુમધ્યગતે દેવિ કુટિલે ચાર્ધચન્દ્રિકે ॥

તુષારકણિકાભાસે દ્વાદશાન્તાવલમ્બિનિ
ઉમાખ્યે હૃદ્ગતે ગૌરિ દ્વાદશાદિત્યવર્ચસે ॥

શૂન્યે શૂન્યાન્તરાવસ્થે હંસાખ્યે પ્રાણધારિણિ
લમ્બાખ્યે પરમે દેવિ દક્ષિણોત્તરગામિનિ ॥

નાસાગ્રે તુ સમુત્તીર્ણે મધ્યસૂત્રપ્રવાહિનિ
હૃલ્લેખે પરમાનન્દે તાલુમૂર્ધ્નિ વ્યવસ્થિતે ॥

નાદઘણ્ટિકસઙ્ઘૃષ્ટે ગુણાષ્ટકસમન્વિતે
સ્થૂલસૂક્ષ્મે તુ સઙ્ક્ષુબ્ધે ધર્માધર્મપુટદ્વયે ॥

કાર્યકારણકર્તૃત્વે ત્રિશૂન્યે નાદવિગ્રહે
પરાપરપરે શુદ્ધે ચૈતન્યે શાશ્વતે ધ્રુવે ॥

સર્વવર્ણધરી દેવિ ગુહ્યતત્ત્વેતિ વિશ્રુતે
અશરીરે મહાભાગે સંસારાર્ણવતારિણિ ॥

જયા ચ વિજયા ચૈવ જયન્તી ચાપરાજિતા-
તુમ્બુરુબીજમધ્યસ્થે નમસ્ તે પાપમોચનિ ॥

બન્ધમોક્ષકરી દેવિ ષોડશાન્તે વ્યવસ્થિતે
ભ્રામણી શક્તિશૂલેન મહાવ્યૂહસમન્વિતે ॥

ભ્રમણિ ભ્રામણી ગૌરિ માયાયન્ત્રપ્રવાહિનિ
સ્વચ્છન્દભૈરવી દેવિ ક્રોધ-ઉન્મત્તભૈરવિ ॥

પઞ્ચાશદ્વર્ણરૂપસ્થે ત્વયા રુદ્રાઃ પ્રકીર્તિતાઃ
અમૃતાખ્યે રુરુશ્ ચણ્ડે નમસ્ તે જ્ઞાનભૈરવિ ॥

દંષ્ટ્રોત્કટે વિદ્યુજ્જિહ્વે તારકાક્ષિ ભયાનકે
નમામિ દેવદેવેશિ અઘોરે ઘોરરૂપિણિ ॥

જ્વાલામુખી વેગવતી ઉમાદેવિ સરસ્વતિ
હંસસ્વરોદ્વહે દેવિ ગોમુખિ શક્તિમાલિનિ ॥

ક્રોષ્ટુકે સુભગે દેવિ દુર્ગે કાત્યાયની તથા
નિત્યક્લિન્નાસમાખ્યાતે રક્તે એકાક્ષરે પરે ॥

બ્રાહ્મી માહેશ્વરી ચૈવ કૌમારી વૈષ્ણવી તથા
વારાહી ચૈવ માહેન્દ્રી ચામુણ્ડા ત્વ્ અભયાનના ॥

યોગેશી ત્વં હિ દેવેશિ કુલાષ્ટકવિભૂષિતે
ઐન્દ્રી ચૈવ તુ આગ્નેયી યામ્યા નૈરૃત્યવારુણી ॥

વાયવ્યા ચૈવ કૌબેરી ઈશાની સમુદાહૃતા
પ્રયાગા વરુણા કોલ્લા અટ્ટહાસા જયન્તિકા ॥

ચરિત્રેકામ્રકે ચૈવ દેવિકોટ્ટં તુ ચાષ્ટધા
તથા કાલી ઉમા દેવી દેવદૂતિ નમો ઽસ્તુ તે ॥

ભદ્રકાલિ મહાદેવિ ચર્મમુણ્ડે ભયાવહે
મહોચ્છુષ્મે મહાશાન્તે નમસ્ તે શક્તિરૂપિણિ ॥

ભૂર્ ભુવઃ સ્વેતિ સ્વાહાન્તે દયાં નાથે કુરુષ્વ મે
જ્ઞાનાર્થિનો મહામાયે એતદ્ ઇચ્છામિ વેદિતુમ્ ॥

યસ્ ત્વ્ ઇદં પઠતે સ્તોત્રં ત્રિસન્ધ્યં ચૈવ માનવઃ
પ્રાપ્નોતિ ચિન્તિતાન્ કામાન્ સ્ત્રીણાં ભવતિ વલ્લભઃ ॥

કુલજાનાં મહેશાન પવિત્રારોહણં કથમ્
કસ્મિન્ કાલે કથં કાર્યં કિમર્થં વદ મે પ્રભો ॥

પુરા દેવાસુરૈર્ દેવિ ક્ષીરોદો મથિતો યદા
તત્ર નેત્રો મહાભાગે કશ્યપસ્ય સુતો બલી ॥

મન્થાને યોજિતો ભદ્રે વિષનિદ્રાવિમૂર્છિતઃ
ન શક્નોતિ તલસ્યાન્તે વર્ષાસુ વસિતું યદા ॥

તેનાહં રાધિતો દેવિ પવિત્રેણ મહાત્મના
દિવ્યં વર્ષસહસ્રં તુ વાયુભક્ષો મહાબલઃ ॥

તુષ્ટો ઽહં તસ્ય દેવેશિ કિં કર્તવ્યં પુરોદિતમ્
તતો ઽસૌ દણ્ડવદ્ ભૂમૌ મમ પાદાગ્રતઃ સ્થિતઃ ॥

પ્રાવૃટ્કાલે ન શક્નોમિ તલાન્તે વસિતું હર
તતઃ સો ઽપિ મયા દેવિ કરાભ્યાં ગૃહ્ય ભૂતલાત્ ॥

શિરસા ધારિતો દેવિ જટાજૂટે વરાનને
તતઃ સર્વૈસ્ તુ દેવેશિ શિરસા ધારિતઃ શુચિઃ ॥

દશકોટિસ્ તુ પૂજાનાં પવિત્રારોહણે સમા
વૃથા દીક્ષા વૃથા જ્ઞાનં ગુર્વારાધનમ્ એવ ચ ॥

હરતે નાગરાજસ્ તુ વિના દેવિ પવિત્રકાત્
વૃથા પરિશ્રમસ્ તસ્ય યો ન કુર્યાત્ પવિત્રકમ્ ॥

તસ્માત્ સર્વપ્રયત્નેન કર્તવ્યં કુલજૈઃ પ્રિયે
આષાઢે શુક્લપક્ષે તુ મિથુનસ્થે દિવાકરે ॥

તદાલાભે પ્રકર્તવ્યં કર્કટસ્થે દિવાકરે
અવિરોધેન કર્તવ્યં યાવત્ સ્યાત્ તુલપૂર્ણિમા ॥

સૌવર્ણં તુ કૃતં સૂત્રં સૂક્ષ્મં તુ ત્રિગુણીકૃતમ્
તત્ર તન્તુશતં પ્રોક્તં ગ્રન્થિપાદં ગુરોર્ મતમ્ ॥

પૂજ્યસ્ય દ્વ્યધિકં કાર્યં પ્રતિપૂજ્યે ચતુરાધિકમ્
સપ્તાધિકં શિવસ્યોક્તં યોગેશીનાં ષડુત્તરમ્ ॥

વિદ્યાપીઠસ્ય સર્વસ્ય કુર્યાત્ તચ્ ચ ષડુત્તરમ્
પાદુકાનાં પ્રકર્તવ્યં શતમ્ અષ્ટાધિકં પ્રિયે ॥

અષ્ટત્રિંશચ્ ચ ગ્રન્થ્યો વૈ પઞ્ચાશદ્ વા વિકલ્પના
અષ્ટાધિકં ગુરોર્ ઉક્તં વટુકસ્ય તથા ભવેત્ ॥

અથવા રાજતં સૂત્રમ્ અભાવાદ્ વસ્ત્રજં ભવેત્
શુક્લસૂત્રં સમાદાય ત્રિગુણં ત્રિગુણીકૃતમ્ ॥

તેન તન્તુશતં કુર્યાદ્ અષ્ટાધિકં મહાતપે
શ્રીકણ્ઠાદિ ચતુર્વિંશૈર્ અજેશાદ્યૈસ્ તુ ષોડશ ॥

અષ્ટાભિશ્ ચ મહાકાલૈર્ વિદ્યામાતા ચતુષ્ટયમ્
ષટ્તન્તુ ડાદિષટ્કસ્ય કુલાષ્ટે ચાષ્ટતન્તુકમ્ ॥

ગ્રન્થયશ્ ચ યથાશોભા યથાશક્ત્યા પવિત્રકમ્
ગોરોચના પ્રકર્તવ્યા અથવા કુઙ્કુમેન તુ ॥

એવં નિષ્પાદયિત્વા તુ યાગં કૃત્વા વરાનને
દાતવ્યં ભક્તિયુક્તેન પૂજાન્તે તુ પવિત્રકમ્ ॥

ગીતં નૃત્યં પ્રકર્તવ્યં સ એવાત્ર વરાનને
હિન્દોલં વાથ કર્તવ્યં મન્દતારયુતેન તુ ॥

પ્રાપ્તાઃ સમયિનો યે તુ તે પૂજ્યાસ્ તુ પ્રયત્નતઃ
તત્ સર્વં તુ પ્રકર્તવ્યં ચાતુર્માસ્યં વરાનને ॥

સપ્તવાસરમ્ એવં તુ ત્રીણિ વા એકમ્ એવ વા
વીરક્રીડાકૃતે દેવિ સમ્પન્નં ભવતે પ્રિયે ॥

તત્ પવિત્રં વરારોહે કૃત્વા ચૈવ ક્ષમાપયેત્
બહુયજ્ઞફલં દેવિ બહુતીર્થફલં તથા ॥

દાનધર્મસ્ય દેવેશિ કલાં નાર્ઘન્તિ ષોડશીમ્
પવિત્રં પરમં પુણ્યં સર્વદોષવિવર્જિતમ્ ॥

તેન કાર્યમ્ ઇદં દેવિ કુલજૈસ્ તુ વરાનને
લઙ્ઘનં સમયાનાં તુ કર્મ વિધિવિનાકૃતમ્ ॥

તે દોષા નાશમ્ આયાન્તિ પવિત્રેણ વરાનને
વર્ષે વર્ષે પ્રકર્તવ્યં યથાવિભવવિસ્તરાત્ ॥

કાશૈઃ કુશૈઃ પ્રકર્તવ્યં ભક્તિયુક્તેન ભૈરવિ
વિત્તશાઠ્યં ન કર્તવ્યમ્ ઇહૈવ તુ કુલાગમે ॥

શાઠ્યેન યત્ કૃતં કર્મ ન તત્ સિદ્ધિપદં ભવેત્
એવં જ્ઞાત્વા વરારોહે વિત્તશાઠ્યં ન કારયેત્ ॥

તદ્ગ્રહશ્ ચ તથા પૂજા પવિત્રારોહણં પરમ્
એતત્ સર્વં સમાખ્યાતં કિમ્ અન્યત્ પરિપૃચ્છસિ ॥